Zəngəzur dəhlizi yenidən aktuallaşır

Bakı:

16 °C

88 %

5 m/s

Əlaqə

AZ RU EN

Ana səhifə / Siyasət / Zəngəzur dəhlizi yenidən aktuallaşır

Zəngəzur dəhlizi yenidən aktuallaşır

27.08.2022 [07:19]

Danışıqların əsas mövzusu kommunikasiyaların açılmasıdır

Bu ayın sonunda Rusiya paytaxtında Azərbaycanla Ermənistan arasında sərhədlərin demarkasiyası və delimitasiyası, təhlükəsizliyi məsələləri üzrə komissiyaların nümayəndələrinin iclasının keçirilməsi planlaşdırılır. Bununla bağlı Ermənistan baş nazirinin müavini Mqer Qriqoryanın ofisi məlumat yayıb. Məlumatda bildirilir ki, hazırda məsələlərin ayrıca gündəliyi müəyyən edilməyib.

Bir müddət öncə Brüsseldə Aİ nümayəndəsinin iştirakı ilə Azərbaycan və Ermənistan rəsmiləri arasında baş tutan görüşün ardınca belə bir məlumatın yayılması prosesin dinamizm qazanmasından xəbər verir. Ən əsası isə, davamlı sülhün təmin olunması, kommunikasiyaların açılması məsələsində mühüm addımların atılması da məhz bu görüşlərin nəticəsindən asılıdır.

Bu arada, Ermənistandakı bəzi revanşist qüvvələr növbəti dəfə “fəallaşıb”. Belə ki, Ermənistan müxalifət təşkilatı olan Müqavimət Hərəkatı sentyabrın 2-də mitinq keçirməyi planlaşdırır. Bunu erməni parlamentin üzvü İşxan Saqatelyan deyib. O əlavə edib ki, Müqavimət Hərəkatı mübarizəni tam tərkibdə davam etdirəcək. Saqatelyan iddia edib ki, İrəvanda keçirilən mitinqlə paralel Xankəndi və diaspor da aksiya təşkil edəcək. Nəzərdə tutulan görüşlər öncəsi erməni revanşistlərin yenidən baş qaldırmaq cəhdi təxribat ola bilərmi?

Məsələ ilə bağlı fikirlərini “Yeni Azərbaycan”a bölüşən politoloq İlqar Vəlizadə bildirib ki, avqustun sonunda Avropa İttifaqı Şurasının sədri Şarl Mişelin vasitəçiliyi ilə Azərbaycan Prezidenti ilə Ermənistanın baş naziri arasında görüşü planlaşdırılır. Paralel olaraq həm Brüsseldə, həm də Moskvada görüşlərin planlaşdırılması isə vasitəçilərin tərəfləri müəyyən razılığa gətirməyə çalışıldığının göstəricisidir: “Hər iki vasitəçi regionda kommunikasiyaların açılmasında maraqlıdır. Burada öncəliklə söhbət Zəngəzur dəhlizindən gedir. Hətta Zəngəzuru regional kommunikasiyaların şahı da adlandırırlar. Bu dəhlizin açılması bütün tərəflər üçün vacibdir. Avropa bu yolla Mərkəzi Asiyaya, Rusiya isə öz növbəsində Türkiyə və Cənubi-Qərbi Asiya bazarlarına çıxış əldə edir. Bu baxımdan prosesi daha təhlükəsiz və əlverişli şəraitdə inkişaf etdirmək üçün regionda sülhü formalaşdıran mühit yaranmalıdır, sərhədlər müəyyənləşməlidir. Bu baxımdan da, tərəfləri tələsdirirlər”.

Zəngəzur dəhlizinin açılmasına Azərbaycanın da tələsdiyini vurğulayan İ.Vəlizadə bunun bizim üçün də prioritet olduğunu qeyd edib. “Azərbaycan bu günlərdə Qazaxıstanla çoxtərəfli sənədlər imzalayıb və nəqliyyat-logistika üzrə mühüm əlaqələr formalaşdırılır. Orada da dəhliz məsələsi gündəmdədir. Qazaxıstan - Azərbaycan - Türkiyə üçtərəfli formatı mövcuddur və bu formatın effektivliyinin təmini üçün də dəhlizlər, rabitələr gərəklidir. Digər tərəfdən, iki ay öncə Azərbaycan Prezidentinin Özbəkistana səfəri zamanı da nəqliyyat məsələsi gündəmdə olmuşdu. Bu məsələdə Azərbaycan da, Türkiyə də, o cümlədən digər oyunçular - Aİ, Moskva və Mərkəzi Asiya ölkələri də maraqlıdır. Bir Ermənistan məsələni ləngidir. Fikrimcə, mövcud təzyiqlər Ermənistanı da yola gətirəcək. Artıq onlarda 3 keçid məntəqəsi ilə bağlı qərar qəbul olunub. Bu isə müəyyən mənada Ermənistanın sərhədlərin normallaşması ilə bağlı addımlar atdığını göstərir. Belə addımlar öz növbəsində delimitasiya prosesini də sürətləndirəcək”, -deyən politoloq onu da əlavə edib ki, Ermənistan daxilində təxribat yaratmaq istəyənlər isə öz məqsədlərini güdürlər. Məqsədləri isə bəllidir - qarışıqlıq yaratmaq, bununla da hakimiyyətə gəlməyə cəhd göstərmək: “Amma bu qüvvələr aciz və zəifdirlər. Hətta oyunlarında Rusiya kartından istifadə etməyə çalışsalar da, buna nail ola bilmədilər. Rusiya Ermənistana nota da göndərdi. Rusiya regionda dəhlizlərin fəaliyyətində maraqlıdır. Ermənistanın daxili siyasi oyunları artıq bütün tərəflərə maneə törədir. Düşünürəm ki, bu tip mitinqlərin heç bir əhəmiyyəti olmayacaq”.

P.İSMAYILOV

Paylaş:

Baxılıb: 569 dəfə