Ermənistan qarışdı

Bakı:

16 °C

94 %

10 m/s

Əlaqə

AZ RU EN

Ana səhifə / Siyasət / Ermənistan qarışdı

Ermənistan qarışdı

19.04.2022 [10:21]

Revanşistlərin mitinqlərininheç bir perspektivi yoxdur

Nardar BAYRAMLI

Ermənistanın baş naziri Nikol Paşinyanın Qarabağla bağlı etirafları İrəvanda etirazlara səbəb olub. Paşinyan parlamentdə çıxışı zamanı demişdi ki, beynəlxalq ictimaiyyət Ermənistandan “status”la bağlı tələblərini geri çəkməyi istəyir. Müxalifət isə baş nazirin bu sözlərini hakimiyyətin Qarabağı Azərbaycanın bir hissəsi kimi tanımağa hazır olması kimi qiymətləndirib. Bununla əlaqədar müxalif “Şərəfim var” parlament fraksiyasının rəhbəri, Ermənistan Milli Təhlükəsizlik Xidmətinin keçmiş rəhbəri Artur Vanetsyan müddətsiz etiraz aksiyası elan edib. Aprelin 18-dən İrəvanda müxalifət tərəfdarları küçələrə çıxaraq, Paşinyanın tezliklə sülh sazişinin imzalanması və Qarabağın Azərbaycana məxsus olması barədə fikirlərinə qarşı çıxıblar. Aksiya zamanı polislə etirazçılar arasında toqquşma baş verib. Belə ki, nümayişçilər İrəvanın mərkəzi küçələrindən birini bağlamağa cəhd ediblər. Bu zaman polis müdaxilə edərək bir neçə nəfəri saxlayıb.

Ermənistanda etiraz aksiyaları nə ilə nəticələnə bilər? Məsələ ilə bağlı qəzetimizə açıqlama verən Milli Məclisin deputatı Elman Məmmədov bildirib ki, Azərbaycan Vətən müharibəsində işğalçı Ermənistanı diz çökdürdü. Müharibədə Ermənistan ordusunun məhv edildiyini deyən millət vəkilinin sözlərinə görə, hazırda ermənilərin durumu çox ağırdır: “Müharibədən sonra Ermənistan öz havadarları hesabına nələrəsə nail olmaq istəyir. Amma güclü Azərbaycan dövləti bütün bunların qarşısını alır. Dövlətimiz artıq regionda yeni reallıqlar yaradıb və beynəlxalq ictimaiyyət də bu reallıqları qəbul edir. Aprelin 6-da keçirilən Brüssel görüşü bunu bir daha təsdiq edir. Paşinyanın Ermənistan parlamentindəki çıxışı da təsadüfi deyil. Bu o deməkdir ki, ermənilərin başqa çıxış yolu qalmayıb. Dünya Qarabağı Azərbaycanın ərazisi kimi tanıyır və bunu Ermənistandan da tələb edir. Elə xarici ölkə var ki, Azərbaycanın uğurlarına sevinmir, amma reallıqları qəbul etmək məcburiyyətindədir. Çünki biz görürük ki, yaxın regionumuzda baş verən mürəkkəb proseslər Avropanın Azərbaycanın neft və qazına ehtiyacını artırıb. Ona görə də, Azərbaycanla və onun düzgün siyasəti ilə razılaşmaq zorundadırlar. Onlar da Paşinyanı məcbur edirlər ki, sənin başqa çıxış yolun yoxdur. Əgər ölkəni inkişaf etdirmək istəyirsənsə, Azərbaycanın ərazi bütövlüyünü tanımalısan, Qarabağdan gözünü çəkməlisən. Paşinyan da bunu parlamentdə səsləndirdi. Ona görə də, müxalifət Paşinyana etiraz edir”.

Millət vəkili qeyd edib ki, müxalifətdə olan Robert Köçəryan və Serj Sarkisyanın erməni cəmiyyətində nüfuzu yoxdur: “Onlar əli uşaq, qoca qanına bulaşmış qatillərdir. Köçəryanla Sarkisyan erməni xalqına qarşı da çoxlu cinayət törədiblər. Bu səbəbdən də erməni cəmiyyəti onları dəstəkləmir. Müxalifətin keçirdiyi aksiyada az adamın iştirak etməsi də bunu təsdiqləyir. İndi guya müxalifət Paşinyanın Azərbaycanla razılaşmaya getməməsi üçün müddətsiz mitinqlər keçirməyə başlayıb. Onları dəstəkləyən olmayacaq. Çünki sadə ermənilər başa düşməyə başlayıblar ki, başqasının torpağına göz dikməyin axırı necə olur. Yoxsa, Sarkisyanın, Vanetsyanın başqa variantları var? 44 günlük müharibə zamanı onlar Qarabağa gəlmişdilər. Amma ordumuzun gücünü görən kimi qaçıb getdilər. Düşünürəm ki, erməni revanşistlərin keçirdikləri mitinqlərin heç bir perspektivi yoxdur”.

Paylaş:

Baxılıb: 610 dəfə