ABŞ ova çıxır...

Bakı:

30 °C

38 %

0 m/s

Əlaqə

AZ RU EN

Ana səhifə / Siyasət / ABŞ ova çıxır...

ABŞ ova çıxır...

31.03.2022 [10:09]

Yaxud “Biz sizin hamınızı tapacağıq” mesajı

Mübariz ABDULLAYEV

Sonu görünməyən Rusiya-Ukrayna müharibəsini səciyyələndirən əsas məqamlardan biri də sanksiyalarla bağlıdır. İndiyədək ABŞ və Avropa İttifaqı (Aİ) dövlətləri tərəfindən müharibə tərəfi olan Rusiyaya qarşı dörd mərhələdə əsasən iqtisadi məzmunlu sanksiyalar tətbiq olunub. Sanksiyalar Rusiya neftinin idxalından imtina edilməsindən tutmuş bu ölkənin beynəlxalq SWİFT sistemindən çıxarılmasına, aktivlərin dondurulmasına, yüksəksəviyyəli rəsmilərə və bir sıra iş adamlarına aid qadağaların qüvvəyə minməsinədək müxtəlif məsələləri əhatə edir.

ABŞ və bu ölkə ilə həmrəylik nümayiş etdirən dövlətlər sanksiyalarla Rusiyanın iqtisadiyyatını, maliyyə sistemini çökdürmək və beləliklə də, onun müharibəni davam etdirmək imkanlarını məhdudlaşdırmaq niyyətindədirlər. Tətbiq olunan qadağalar Rusiyanın iqtisadiyyatına müəyyən mənfi təsirlər göstərsə də, sanksiyaların müəllifləri onların daha effektiv və məhvedici olmasını istəyirlər. ABŞ-da və Aİ dövlətlərində formalaşan ümumi qənaət belədir ki, sanksiyaların tətbiqində hansısa gizli, sürüşkən məqamlar və yaxud “qara dəliklər” Rusiyanın manevr imkanlarını bütünlüklə məhdudlaşdırmağa imkan vermir. Halbuki sanksiyaların tətbiqində əsas məqsəd Rusiyanın nəfəsliyini qısa müddətdə tam bağlamaqdır.

Sanksiyalarla Rusiyanın “ildırım sürətli çöküşünə” nail ola bilməyən ABŞ qadağalar üzrə müttəfiqlərini də səfərbər edərək, necə deyərlər, günahkarların ovuna çıxıb. Artıq müəyyən ipuclarının tapıldığı barədə məlumatlar yayılıb. ABŞ-ın maliyyə nazirinin müavini Uolli Adeyemo Londonda olarkən bildirib ki, Rusiyanın son aylarda sanksiyalar siyahısına düşən bir sıra vətəndaşları aktivlərini gizlətməyə uğursuz cəhdlər göstərirlər.

Belə cəhdlər əbəsdir, siyahılar məlumdur və dəqiqləşdirmələr yenə də davam etdirilir. ABŞ rəsmisi martda sanksiyalar altında olan şəxslərə nəzarətin gücləndirilməsinin koordinasiya edilməsi məqsədilə REPO (Russian Elites, Proxies, and Oligarchs) adı altında beynəlxalq qrup yaradıldığını xatırladıb. “Bu şəxslərin bir çoxu məsuliyyətdən yayınmaq üçün aktivlərinin dislokasiya yerlərini dəyişməyə cəhdlər göstərirlər”, - deyə nazir müavini vurğulayıb. O, qeyri-hüquqi yolla özlərinə sərvət toplayan Rusiya elitasına kömək əli uzadanlara “biz sizin hamınızı tapacağıq” mesajını göndərib. Fikirlərinə davam edən ABŞ rəsmisi deyib: “Biz sanksiyalar altında olan Rusiya vətəndaşlarına dəstək göstərənlərə qarşı da qadağalar tətbiq etməyə hazırıq”.

Bu arada bəlli olub ki, ABŞ-ın təşəbbüsü ilə hazırlanan beşinci sanksiyalar paketi də artıq masadadır. Beşinci sanksiyalar paketində Rusiyanın hərbi sənayesinin təchizat və istehsal imkanlarının məhdudlaşdırılması hədəflənir. Bayden administrasiyasının hazırladığı yeni sanksiyaların hərbi və kəşfiyyat qurumlarını mal və xidmətlərlə təchiz edən Rusiya şirkətlərinə şamil olunması nəzərdə tutulub.

Verilən məlumatlara görə, silah və xüsusi avadanlıqlar hazırlayan müəssisələrlə bağlı olan “Sertal” və “Serniya injinirinq” şirkətlərinin sanksiyalara məruz qalacağı gözlənilir. Yeni “qara siyahı”ya, həmçinin proqram təminatı və kommunikasiya texnologiyalarının hazırlanması üzrə ixtisaslaşan “Vektor”, Rusiyanın nəhəng mikrosxemlər istehsalçısı “Mikron” kimi istehsalatların adlarının salındığı bildirilir.

Paylaş:

Baxılıb: 633 dəfə