Ukrayna güzəştə gedəcəkmi?

Bakı:

16 °C

72 %

8 m/s

Əlaqə

AZ RU EN

Ana səhifə / Siyasət / Ukrayna güzəştə gedəcəkmi?

Ukrayna güzəştə gedəcəkmi?

11.03.2022 [10:58]

Taleh AĞAVERDİYEV

Bütün dünya ictimaiyyətini narahat edən əsas mövzulardan biri hələ də Ukraynadakı hərbi münaqişədir. Bu günlərdə Ukrayna prezidenti Vladimir Zelenski Krım, eləcə də “DXR” və “LXR” ilə bağlı Rusiya ilə dialoqa hazır olduğunu bildirib.

“Danışıqlar aparmağa hazıram, güzəştə getməyə hazıram. Lakin onlar mənim xalqıma xəyanət şəklində ola bilməz”, - deyən Zelenski Rusiya tərəfinin də kompromislərə hazır olması lazım olduğunu qeyd edib. Ukrayna lideri daha əvvəl qeyd edib ki, Rusiya hakimiyyətindən başqa heç kim psevdo-respublikaların müstəqilliyini tanımayıb: “Ancaq biz bu ərazilərin necə yaşayacağını müzakirə edib kompromis tapa bilərik. Mənim üçün vacib olan Ukraynanın bir hissəsi olmaq istəyən insanların orada necə yaşayacağıdır”. Eyni zamanda, o, Ukraynanın “ultimatumlara hazır olmadığını” vurğulayıb. Qeyd edək ki, Kreml bundan əvvəl Rusiyanın Ukraynadakı “hərbi əməliyyatı” üç şərtlə dayandıracağını bəyan etmişdi: Kiyev Krımı Rusiyanın ərazisi kimi tanısa, qondarma “DXR” və “LXR”nin müstəqilliyini tanıyarsa və “hər hansı bloka” qoşulmaqdan imtina edərsə.

Bəs Ukraynanın nəticə etibarilə Rusiyanın şərtlərini qəbul etməsi nə dərəcədə mümkündür? Bu məsələnin həlli üçün hansı alternativlər var, tərəflər hansı güzəştlərə gedə bilər? Bu suallarla bağlı rəy bildirməsi üçün azərbaycanlı politoloq, “Cənubi Qafqaz” Politologiya Klubunun rəhbəri İlqar Vəlizadəyə müraciət etdik.

“Vəziyyətin belə bir ssenari üzrə inkişaf etmə ehtimalı çox azdır, əks halda, Ukrayna tərəfinin son həftələrdə məruz qaldığı itkilərə, qurbanlara necə haqq qazandırmaq olar? Təbii ki, Ukraynanın hazırkı hakimiyyəti çətin ki, Krımı Rusiyanın ərazisi kimi və qondarma “DXR” və “LXR”-i tanısın, lakin bu istiqamətdə müəyyən kompromislər mümkündür”,- deyə həmsöhbətimiz bildirib.

Onun sözlərinə görə, kompromislər ondan ibarət ola bilər ki, Ukrayna tərəfi bu separatçı ərazilərin müəyyən federal statusunu tanıya bilər, amma bu məsələdə tez bir zamanda kompromis tapmaq mümkün olmayacaq”, - Vəliyev qeyd edib.

Ekspert hesab edir ki, bu gün atəşkəs, vəziyyətin dinc məcraya keçməsi üçün şəraitin yaradılması məsələsi daha aktualdır.

“Bu isə ümumilikdə bu gün mübahisəli olan bu məqamların müəyyən müddətdən sonra yenidən aktuallaşdırılması üçün mövcud vəziyyətin müəyyən müddətə saxlanılması deməkdir. Rusiya tərəfinin reaksiyasına əsasən demək olar ki, Moskva belə bir ssenariyə o qədər də hazır deyil. Yarımçıq həll yolları Moskva üçün qəbuledilməzdir. Digər tərəfdən, indiki şəraitdə Kiyev daha çox bu məsələdə müəyyənliyə ümid edir. Tərəflərə bu gün qeyri-müəyyənlik və ya təxirə salınan qərarlar lazım deyil və məsələnin praktik müstəvidə necə həll olunacağını yəqin ki, zaman göstərəcək. Hər halda danışıqlar qaçılmazdır, davam edir və bu gün, qeyd etdiyim kimi, ən aktual məsələ hərbi əməliyyatların dayandırılması məsələsidir. Bu mümkün razılaşma nə qədər davam edəcək, bunu zaman göstərəcək”, - deyə politoloq bildirib.

Paylaş:

Baxılıb: 1066 dəfə