Avropa ilə ABŞ-ın mövqeləri üst-üstə düşmür

Bakı:

29 °C

37 %

0 m/s

Əlaqə

AZ RU EN

Ana səhifə / Siyasət / Avropa ilə ABŞ-ın mövqeləri üst-üstə düşmür

Avropa ilə ABŞ-ın mövqeləri üst-üstə düşmür

18.01.2022 [10:32]

“Köhnə qitə” Moskvaya qarşı tətbiq olunan sanksiyalardan narahatdır

İndiki mərhələdə Avropanın Rusiyadan tam imtinası mümkün görünmür

Pərviz

Avropa İttifaqının (Aİ) Rusiyaya yönəlik iqtisadi sanksiyaları daha altı ay artırması “köhnə qitə”nin özündə belə birmənalı qarşılanmadı. Belə ki, bir sıra ölkələrin aparıcı siyasətçiləri ABŞ-ın maraqları çərçivəsindən çıxış edərək atılan bu addımın Avropa məkanı üçün yaxşı nəticələr vəd etmədiyi fikrindədirlər. Məsələn, Almaniyanın Xristian-Demokratik İttifaqı (XDİ) partiyasının təyin olunmuş sədri Fridrix Merts bəyan edib ki, Rusiyanın banklararası SWIFT sistemindən sıxışdırılması yaxşı nəticə vəd etmir. “SWIFT məsələsi kapital bazarları, mal və xidmət bazarları üçün atom bombası ola bilər”, - deyə o, qeyd edib. Merts sözügedən banklararası sistemə toxunmamağa çağırıb. Almaniyalı siyasətçi xəbərdarlıq edib ki, Rusiyanı banklararası sistemdən kənarlaşdırmaq bütün iqtisadiyyatın, o cümlədən Almaniya iqtisadiyyatının zəifləməsinə səbəb olar. “Biz, güclü ixrac olkəsi olaraq, özümüzə əhəmiyyətli ziyan vurarıq”, - deyə o qeyd edib. Siyasətçi əlavə edib ki, bundan nəinki Rusiya və Avropa arasında əmtəə dövriyyəsi, həm də dünya ticarəti ziyan çəkər.

Maraqlıdır ki, bu kimi açıqlamalar, Avropanın etirazı artıq ABŞ-ın da Rusiyaya qarşı ritorikasının dəyişməsinə səbəb olur. Bunun nəticəsidir ki, ABŞ dövlət katibi Entoni Blinkenlə NATO-nun Baş katibi Yens Stoltenberq arasındakı telefon danışığı zamanı NATO-Rusiya Şurasının iclasından sonra atılacaq qarşılıqlı addımlar müzakirə edilib. Bu barədə məlumat yayan ABŞ Dövlət Departamenti rəsmi Vaşinqtonun və NATO-nun Rusiya ilə yeni görüş keçirməyə hazır olduğunu diqqətə çatdırıb: “Birləşmiş Ştatlar və NATO Rusiya ilə yenidən görüşməyə, diplomatik fəaliyyəti və qarşılıqlı dialoqu davam etdirməyə hazırdır”, - deyə ABŞ-ın xarici siyasət qurumunun mətbuat xidmətinin rəhbəri Ned Praysın yazılı bəyanatında bildirilib. ABŞ Prezidentinin milli təhlükəsizlik məsələləri üzrə müşaviri Ceyk Sallivan da bildirib ki, gələn həftə Rusiya ilə diplomatik münasibətlərlə bağlı əlavə məlumat verilə bilər.

Məsələ ilə bağlı fikirlərini bölüşən Milli Məclisin Beynəlxalq münasibətlər və parlamentlərarası əlaqələr komitəsinin üzvü Ramil Həsən bildirib ki, Rusiyaya qarşı münasibətdə Avropa ilə ABŞ-ın mövqeləri tam üst-üstə düşmür. Belə ki, Avropa ölkələri rəsmi Kremlə münasibətdə daha loyal münasibətin sərgilənməsinin tərəfdarıdır. Burada bir sıra amillərin rolu var: “Rusiya Avropanın mühüm ticarət tərəfdaşı olmaqla yanaşı, “köhnə qitə”nin enerji təhlükəsizliyi məsələsində də önəmli rol oynayır. Düzdür, son illərdə Avropanın ənənəvi enerji daşıyıcılarından imtina edərək daha səmərəli enerji istehlakına keçidi ilə bağlı fikirlər yayılsa da, strategiyalar hazırlansa da, bunun üçün zaman lazımdır. İndiki mərhələdə Avropanın Rusiyadan, yəni onun bazarından, investisiyasından, enerjisindən və tərəfdaşlığından tam imtinası mümkün görünmür. Bunu Avropa dövlətləri özləri də görürlər və anlayırlar. Hətta deyərdim ki, NATO-Rusiya mübarizəsinin son bir il ərzində hərbi müstəviyə transfer edilməməsinin mühüm səbəblərindən biri məhz Avropanın buna mane olmasıdır”.

Millət vəkili qeyd edib ki, 2022-ci il ABŞ-Rusiya münasibətlərinin inkişafında əhəmiyyətli yer tutacaq. Belə ki, NATO Şərqə doğru genişlənmə planından və ya Avropada tamhüquqlu söz sahibi olmaq istəyindən geri çəkilməsə, bu, çox böyük gərginliklərə səbəb olacaq. Eyni zamanda, Rusiya öz xarici siyasətində müəyyən korrektələr edə bilər. “Avropanın aparıcı dövlətləri anlayır ki, Rusiyanın regionun iqtisadi inkişafında rolu böyükdür. Rusiyaya qarşı tətbiq olunan sanksiyalardan avropalı iş adamları da əziyyət çəkirlər. Eyni zamanda, Rusiya dünyanın ən aparıcı iqtisadiyyatlarından birinə malik olan dövlətdir, yeraltı və yerüstü sərvətlərə, böyük kapitala malikdir. Almaniya Xristian-Demokratik İttifaqı partiyasının sədri bu baxımdan həyacan təbili çalmaqdadır. İnanıram ki, yaxın zamanda bu iki dövlət arasındakı münasibətlər normallaşacaq və dünya yeni siyasi nizam əldə edəcək”, - deyə R.Həsən əlavə edib.

Paylaş:

Baxılıb: 817 dəfə