Nikol Paşinyanın hədəfi daxili auditoriyadır

Bakı:

29 °C

41 %

4 m/s

Əlaqə

AZ RU EN

Ana səhifə / Siyasət / Nikol Paşinyanın hədəfi daxili auditoriyadır

Nikol Paşinyanın hədəfi daxili auditoriyadır

22.12.2021 [11:46]

Erməni baş nazirin məsuliyyətsizcə absurd ifadələr səsləndirməsinin heç bir əhəmiyyəti yoxdur

Nurlan

Ermənistanın baş naziri Paşinyan Milli Təhlükəsizlik Xidmətinin iclasında Cənubi Qafqazda münasibətlərin tənzimlənməsindən bəhs edib. O, bölgədə yeni geosiyasi vəziyyətin yarandığını deyib. Digər tərəfdən, erməni baş nazir növbəti dəfə sərsəm fikirlər səsləndirərək yerli və beynəlxalq ictimai rəyi yanıltmağa çalışıb. O, “Artsax”, “status” kimi ifadələrdən istifadə edərək ziddiyyətli yanaşma ortaya qoyub. Bəs Qarabağın Azərbaycan ərazisi olduğunu etiraf edən, kommunikasiyaların açılması ilə əlaqədar pozitiv mövqe sərgiləyən Paşinyanın yenə də qeyri-konstruktiv yanaşma ortaya qoyması nə ilə əlaqədardır?

Başqa yolu yoxdur

Politoloq Ramiz Alıyev “Yeni Azərbaycan”a açıqlamasında deyib ki, Nikol Paşinyan reallıqları qəbul edib və etmək məcburiyyətindədir: “Onun başqa yolu yoxdur. Çünki 44 günlük müharibədə qələbə qazanan, yeni reallıqlar yaradan Azərbaycan şərtləri diktə edir. Soçi və Brüssel görüşünün nəticələri də Azərbaycanın haqlı və üstün mövqeyini təsdiqlədi. Regionda tənzimləmə prosesi məhz Azərbaycanın geosiyasi iradəsinə uyğun cərəyan edir və ölkəmiz strateji hədəflərinə doğru irəliləyir. Paşinyanın Brüssel görüşündən sonra verdiyi açıqlamalar da bu reallıqları ifadə edir, həmçinin Ermənistan hakimiyyətinin situasiya ilə barışdığını göstərir. Bu gün vacib və aktual məsələ regional təhlükəsizliyin möhkəmləndirilməsi, postmünaqişə dövründə yaranmış əməkdaşlıq imkanlarından maksimum səmərəli istifadə olunmasıdır. Amma Paşinyanın Milli Təhlükəsizlik Xidmətinin iclasında sərsəm açıqlamalar verməsi isə, zənnimcə, daxili auditoriyaya hesablanıb. Çünki rəqibləri - müxalif qüvvələr Azərbaycanın ardıcıl diplomatik nailiyyətləri fonunda Paşinyanı ciddi ittiham və tənqid edirlər. Bu da təbiidir”.

Paşinyanın nə deməyindən asılı olmayaraq...

Politoloq əlavə edib ki, Paşinyanın nə deməyindən asılı olmayaraq, reallıqlar aydındır: “Onun məsuliyyətsizcə absurd ifadələr səsləndirməsinin heç bir əhəmiyyəti yoxdur. Çünki indi nə status-kvo var, nə də status. İkisi də Azərbaycan tərəfindən cəhənnəmə göndərilib. Azərbaycanın ərazi bütövlüyü təmin olunub, separatizm faktı aradan qaldırılıb. Qarabağ Azərbaycandır və bunu həm Ermənistanda iqtidar, müxalifət - hər kəs, həm də dünya ictimaiyyəti yaxşı bilir. Erməni baş nazir sadəcə olaraq, daxili auditoriyanı sakitləşdirməyə çalışır. Çünki bilir ki, kommunikasiyalar da bərpa olunacaq, Zəngəzur dəhlizi də açılacaq, sərhədlər də dəqiqləşdiriləcək, gec-tez sülh müqaviləsi də imzalanacaq. Ermənistanın reallıqları dəyişdirmək gücü və imkanı yoxdur. Azərbaycanın hədəfi Cənubi Qafqazda qarşılıqlı-faydalı maraqlara və sağlam münasibətlərə əsaslanan yeni geostrateji vəziyyətin formalaşmasıdır. Bu, sülhün, sabitliyin, təhlükəsizliyin və işbirliyinin təmin olunması baxımından olduqca önəmlidir. Paşinyanın hədəfi isə, görünən odur ki, daxili auditoriyadır”.

Paylaş:

Baxılıb: 878 dəfə