Soçidən Brüsselə...

Bakı:

30 °C

39 %

3 m/s

Əlaqə

AZ RU EN

Ana səhifə / Siyasət / Soçidən Brüsselə...

Soçidən Brüsselə...

02.12.2021 [10:25]

Soçi görüşünün nəticələri Brüssel danışıqlarına necə təsir göstərəcək?

N.Qələndərli

Noyabrın 26-da Soçidə baş tutmuş üçtərəfli görüşün nəticələri ekspertlər tərəfindən müzakirə olunmaqdadır. İfadə edilən əsas qənaət budur ki, Azərbaycan Prezidentinin mövqeyi görüş çərçivəsində imzalanan Bəyanatda öz əksini tapdı. Ümumiyyətlə, üçtərəfli görüşün nəticələri qalib Azərbaycanın məqsədlərinə nail olduğunu göstərir. Analitiklərin vurğuladıqları kimi, Üçtərəfli görüşdə Azərbaycan Prezidentinin, Rusiya Prezidentinin və Ermənistan Baş nazirinin mətbuata bəyanatlarında əksini tapan məqamlar Soçi görüşünün nəticələrini müsbət qiymətləndirməyə əsas verir.

Aİ Şurasının Prezidentindən dialoq çağırışı...

Hazırda isə müzakirə predmetinə çevrilən məsələlərdən biri Soçi görüşünün nəticələrinin dekabrın 15-də Brüsseldə Avropa İttifaqının (Aİ) vasitəçiliyi ilə Azərbaycan Prezidenti İlham Əliyev və Ermənistanın Baş naziri Nikol Paşinyan arasında keçiriləcək görüşə necə təsir göstərəcəyidir. Yeri gəlmişkən, Aİ Şurasının Prezidenti Şarl Mişel “Şərq Tərəfdaşlığı Vətəndaş Cəmiyyəti Forumu”nun illik assambleyasına video-müraciətində Azərbaycan və Ermənistanı dialoqa çağırıb: “Azərbaycan və Ermənistan arasında münasibətlər vəziyyətin nə dərəcədə kövrək olduğunu göstərir. Mən inanıram ki, yalnız siyasi dialoq dayanıqlı həll yoluna apara bilər”.

Azərbaycan məsələlərin həlli üçün kifayət qədər imkanlara və siyasi iradəyə malikdir

Milli Məclisin deputatı Arzu Nağıyev “Yeni Azərbaycan”a açıqlamasında deyib ki, Brüssel danışıqlarını Soçi görüşünün davamı kimi qiymətləndirmək olar: “Azərbaycan bu görüşə şərtləri diktə edən tərəf kimi hazır paketlə gedir. Bizim əsas məramımızın, məqsədimizin nədən ibarət olduğu Soçi görüşündə də tam və dəqiq açıqlandı. Sərhədlərin delimitasiyası və demarkasiyası, kommunikasiyaların bərpası xüsusi diqqət mərkəzindədir. Ola bilsin ki, Brüsseldə keçiriləcək Şərq Tərəfdaşlığı Sammitində və sammit çərçivəsində Azərbaycan Prezidenti ilə Ermənistanın Baş nazirinin görüşü zamanı məqam kimi insan hüquqları, ərazilərin minalardan təmizlənməsi əsas şərt ola bilər. Çünki Avropa daim insan hüquqları ilə bağlı məsələləri önə çəkir. Azərbaycan tərəfi buna da hazırdır. Bizim əsas məqsədimiz Böyük Qayıdışı təmin etməkdir, bunun üçün də işğaldan azad edilmiş ərazilərin minalardan təmizlənməsi və infrastruktur quruculuğu əsas məsələdir”.

Arzu Nağıyev qeyd edib ki, Azərbaycan tərəfi bütün bu məsələlərin həlli üçün kifayət qədər imkanlara, siyasi iradəyə malikdir və Brüssel danışıqlarına da hazırdır.

Paylaş:

Baxılıb: 930 dəfə