Bölgədə daha artıq gərginlik arzuolunmazdır

Bakı:

21 °C

88 %

6 m/s

Əlaqə

AZ RU EN

Ana səhifə / Siyasət / Bölgədə daha artıq gərginlik arzuolunmazdır

Bölgədə daha artıq gərginlik arzuolunmazdır

21.04.2010 [09:13]

Dünən Bakıda Azərbaycan və Türkiyənin xarici işlər nazirləri Elmar Məmmədyarovla Əhməd Davudoğlu arasında görüş keçirilib. APA-nın xəbərinə görə, görüşdən sonra nazirlər birgə brifinq keçiriblər. E. Məmmədyarov Ə.Davudoğlunun ABŞ-da keçirilən danışıqların nəticəsi, müzakirə olunan məsələlər barədə ətraflı bilgi verdiyini, Azərbaycan Prezidentinin məlumatlandırıldığını deyib: “Bizim də ikitərəfli görüşümüz oldu. Görüşdə Ermənistan-Azərbaycan, Dağlıq Qarabağ münaqişəsini, bundan sonrakı birgə fəaliyyətimizi müzakirə etdik. Bundan başqa, Cənubi Qafqazda tezliklə sülh və sabitliyin bərqərar olması üçün atılacaq addımlar müzakirə mövzusu oldu”.
Azərbaycan XİN başçısı müzakirələrin nəticəsi olaraq, bəzi məsələlərin daha da aydınlaşdığını, Vaşinqton danışıqları barədə daha ətraflı məlumat əldə olunduğunu vurğulayıb.
Türkiyə xarici işlər naziri bütün məsələlərdə və mərhələlərdə Azərbaycanla qarşılıqlı təmas şəklində işləməkdən məmnun olduqlarını qeyd edib: “Biz buna böyük əhəmiyyət veririk. Son prosesləri əvvəlcə Prezident İlham Əliyev, sonra isə Elmar Məmmədyarovla müzakirə etdik. Vaşinqtonda keçirilən nüvə təhlükəsizlik sammitindən əvvəl Türkiyə XİN Aparatının rəhbəri Firudin Sinirlioğlu Azərbaycana gələrək, rəsmi Bakının məsələyə münasibətini öyrənmişdi. Sammit çərçivəsində xeyli görüşümüz oldu. Bütün görüşlərimizdə əsas hədəf olaraq Qafqazda sülh, təhlükəsizlik və sabitliyə əsaslanan prosesin davam etməsini göstərdik. Əvvəldən də missiyamız bundan ibarət idi. Ermənistan-Azərbaycan probleminin həlli və Azərbaycan torpaqlarının işğaldan azad edilməsi də missiyanın tərkib hissəsidir”.
Ə.Davudoğlu Azərbaycan və Türkiyənin hədəflərinin açıq olduğunu bildirib: “Bu hədəf Cənubi Qafqazda bütün əlaqələrin normalaşdırıldığı, sərhədlərin açıldığı, təhlükəsizliyin və qarşılıqlı etimadın olduğu yeni mərhələni başlatmaqdır. ümid edirik ki, ATƏT-in Minsk qrupunun səyləri ilə də bu, mümkün olacaq, hədəfə çatacağıq. Biz bütün tərəflərlə təmasları davam etdirərək, hədəfimizə çatmaq üçün lazımi səyləri davam etdirəcəyik”.
Türkiyə XİN başçısı qeyd edib ki, bölgədə daha artıq gərginlik istənilmir: “Madrid prinsipləri ətrafındakı prosesləri çox yaxından izləyirik. Vaşinqton səfərindən bir müddət öncə Baş nazir Rəcəb Tayyib Ərdoğanla Parisdə Fransanın prezidenti Nikola Sarkozi ilə görüşdük. Daha sonra Vaşinqtonda ATƏT-in Minsk qrupuna həmsədrlik edən digər ölkənin prezidenti Barak Obamayla görüşdük. Baş nazirimiz Rusiyanın prezidenti ilə görüşdü. Biz bütün həmsədr ölkələrə və Ermənistana mesajımızı çox açıq verdik. Söhbət gedən Madrid prinsipləri ətrafında həqiqətən çox böyük bir fürsət pəncərəsi var. Hər kəs bu imkandan istifadə etməlidir. Artıq zamana oynamaq yerinə hər kəsin bu prinsiplər ətrafında qalıcı bir çözüm üçün səy göstərməsi lazımdır. Türkiyə bu mövzunu hər bir beynəlxalq toplantıda gündəmin əsas maddəsi kimi səsləndirir”.
Elmar Məmmədyarov isə bildirib ki, Dağlıq Qarabağ probleminin nizamlanmasında böyük irəliləyişin olub-olmayacağını demək hələ tezdir: “Bizim üçün əsas olan odur ki, Türkiyənin dəstəyi ilə Dağlıq Qarabağ probleminin nizamlanma prosesini daha da canlandıraq”.
Azərbaycan xarici işlər naziri iranlı həmkarı Mənuçöhr Mottakinin Azərbaycan, Ermənistan və İran XİN başçılarının birgə görüşünün keçirilməsi ilə bağlı təklifinə aid sualı da cavablandırıb: “Biz tezliklə Cənubi Qafqazda sülh və sabitlik olmasını istəyirik. Bu sülh və sabitliyə nail olmağın yolları da çox önəmlidir. İran da bu regionda olan dövlətdir. İran üçün də Cənubi Qafqazda tezliklə sülh-sabitliyin olması vacibdir. Biz Azərbaycanın işğal olunmuş torpaqlarının azad olunmasına və məcburi köçkünlərin geri qayıtmasına kömək edə biləcək bütün təşəbbüsləri dəstəkləyirik”.

Paylaş:

Baxılıb: 1303 dəfə