Müasir dövrdə türkdilli dövlətlər və xalqlar arasında əlaqələrin daha da möhkəmləndirilməsi vacibdir

Bakı:

24 °C

56 %

5 m/s

AZ RU EN

Ana səhifə / Siyasət / Müasir dövrdə türkdilli dövlətlər və xalqlar arasında əlaqələrin daha da möhkəmləndirilməsi vacibdir

Müasir dövrdə türkdilli dövlətlər və xalqlar arasında əlaqələrin daha da möhkəmləndirilməsi vacibdir

17.09.2020 [09:53]

Ekspertlərin fikrincə, Azərbaycan-Türkiyə qardaşlığı digər türkdilli dövlətlər üçün də nümunə olmalıdır
Hazırda beynəlxalq aləmin aparıcı aktorlarına çevrilən iqtisadi, siyasi, mədəni birliklər, təşkilatlar bir-birinə irqi, dini, qohumluq əlaqəsi olan dövlətlərin daha sıx əməkdaşlıq platforması yaratmasında əhəmiyyətli rol oynayır. Bu mənada, 2009-cu ildə Naxçıvan şəhərində yaradılmış Türkdilli Ölkələrin Əməkdaşlıq Şurası (TDƏŞ) da türkdilli dövlətlərin qarşılıqlı inteqrasiyasında mühüm amilə çevrilib. Bununla belə, müasir dövrün çağırışları, siyasi proseslərin inkişafı və iqtisadi əlaqələrin möhkəmlənməsinin zərurəti bu əməkdaşlığın daha da genişləndiriməsini tələb edir. Yeri gəlmişkən, Türkiyənin məşhur “Türkiyə” qəzetində dərc olunmuş Məryəm Aybikə Sinanın “Türk Dünyası Nazirliyi” sərlövhəli məqaləsi də türkdilli dövlətlər arasındakı əlaqələrin daha da intensivləşdirilməsinə həsr olunub. Türk birliyinin tarixi zərurətdən irəli gəldiyini vurğulayan müəllif qeyd edir ki, müasir dövrdə ölkələr irq, din və qohumluq əlaqələrinə əsaslanaraq bir araya gəlir, birlikdə hərəkət edir, bütün sahələrdə həmrəylik nümayiş etdirərək ortaq maraqlarını genişləndirməyə çalışırlar. Vurğulanır ki, məhz bu səbəbdən Türkdilli Dövlətlərin Əməkdaşlıq Şurasına üzv ölkələr, türkdilli xalqlar da daxil olmaqla bütün dünyada yaşayan və sayı təxminən 300 milyona çatan türklərin birlikdə hərəkət etməsi önəmlidir. Müəllif onu da vurğulayır ki, əməkdaşlığın daha da genişləndirilməsi üçün Türk Dünyası Nazirliyinin yaradılması zərurəti meydana çıxıb.
Məsələ ilə bağlı Milli Məclisin deputatı Sədaqət Vəliyeva bildirib ki, türkdilli ölkələr arasında inteqrasiyanın daha da gücləndirilməsi, əməkdaşlığın genişləndirilməsi üçün istər regional, istərsə də qlobal miqyasda davamlı addımlar atılmalıdır. Azərbaycanın hazırda TDƏŞ-ə uğurla sədrlik etdiyini vurğulayan millət vəkili deyib ki, ölkəmiz hər zaman türkdilli ölkələrin inteqrasiyasında, əməkdaşlığın inkişaf etdirilməsində təşəbbüskarlığı ilə seçilir: “Möhtərəm Prezidentimiz İlham Əliyev tərəfindən irəli sürülən və türkdilli ölkələr arasındakı siyasi və iqtisadi sahələrdə əlaqələrin inkişafına yönəldilmiş layihələrin əhəmiyyəti bu mənada xüsusi vurğulanmalıdır. Bütün dünya bu gün Azərbaycan ilə Türkiyə arasındakı dostluq, qardaşlıq münasibətlərini nümunə sayır. Bununla belə, digər türkdilli ölkələrin də bu prosesdə aktiv rol alması üçün səsləndirilən təklifi dəyərləndirmək olar. Belə bir strukturun formalaşması türkdilli dövlətlərin arasında siyasi, iqtisadi, mədəni sahələrdə əlaqələrin inkişafına mühüm töhfələr verər”.
Milli Məclisin deputatı Məşhur Məmmədov da Azərbaycanın türkdilli ölkələr arasında münasibətlərin güclənməsində maraqlı olduğunu vurğulayıb. Millət vəkili onu da qeyd edib ki, vacib məqamlardan biri də türkdilli dövlətlərin beynəlxalq müstəvidə bir-birlərini hər zaman fəal surətdə dəstəkləməsidir: “Azərbaycan-Türkiyə əlaqələri bütün sahələrdə, o cümlədən siyasi, iqtisadi-ticari, humanitar, hərbi və digər istiqamətlərdə uğurla inkişaf edir. Hər iki ölkə beynəlxalq müstəvidə də bir-birini birmənalı olaraq dəstəkləyir. Fikrimcə, Azərbaycan-Türkiyə qardaşlığı digər türkdilli dövlətlər üçün də nümunə olmalı və əlaqələrin daha da genişləndirilməsi, starteji əhəmiyyətə çatması üçün addımlar atılmalıdır. Bunun üçün olduqca münbit bir şərait mövcuddur. Ümidvaram ki, yaxın gələcəkdə türkdilli dövlətlərin daha yüksək inteqrasiysının şahidi olacağıq və türkdilli dövlətlərin əməkdaşlıq platforması strateji formatda inkişaf edəcək”.
Pərviz SADAYOĞLU

Paylaş:

Baxılıb: 368 dəfə