Marginal qruplaşmanın yeni virtual qeybəti, yaxud antimilli ünsürlərin növbəti özünüifşası

Bakı:

23 °C

58 %

5 m/s

Əlaqə

AZ RU EN

Ana səhifə / Siyasət / Marginal qruplaşmanın yeni virtual qeybəti, yaxud antimilli ünsürlərin növbəti özünüifşası

Marginal qruplaşmanın yeni virtual qeybəti, yaxud antimilli ünsürlərin növbəti özünüifşası

05.08.2020 [08:56]

“Milli şura”nın “videoiclas”ında səsləndirilən fikirlər radikal düşərgə təmsilçilərinin xalqımıza düşmən münasibətini və antidövlət mövqeyini bir daha əks etdirir
Dünya ölkələrində yeni növ koronavirus (COVID-19) infeksiyasının sürətlə yayılması günümüzün acı reallığına çevrilib. Ayrı-ayrı regionlarda və bütövlükdə dünya miqyasında ümumi mənzərə qənaətbəxş deyil. Ölkələr bütün zəruri resurslarını səfərbər etməklə bu xəstəliklə mübarizə aparır, vəziyyətin daha acınacaqlı olmaması üçün mövcud imkanlardan maksimum istifadə edirlər. Bütövlükdə, bir çox inkişaf etmiş dövlət pandemiya səbəbindən səhiyyə böhranı və sosial-iqtisadi problemlərlə üz-üzə qalıb.
Milli həmrəylik nümunəsi, yaxud Azərbaycan dövləti daim öz vətəndaşının yanındadır
Bu məqamda vurğulamaq yerinə düşər ki, Azərbaycanın koronavirus pandemiyasına qarşı mübarizə təcrübəsi müsbət və mütərəqqi örnək kimi diqqəti cəlb edir. Ölkəmizdə istər vətəndaşların sağlamlığının qorunması və təhlükəsizliyinin təmin olunması, istərsə də əhalinin sosial müdafiəsinin gücləndirilməsi istiqamətində ardıcıl, məqsədyönlü addımlar atılır. Bir sözlə, Prezident İlham Əliyev xalqının qətiyyətli Lideri kimi növbəti dəfə ölkə vətəndaşlarının yanında olmaq iradəsini nümayiş etdirir. Bununla yanaşı, dövlət başçısının “Biz birlikdə güclüyük” şüarı əsasında milli həmrəylik çağırışının nəticəsi aşkardır: xalqımız ən yüksək mənəvi keyfiyyətlərin - ali dəyərlərin daşıyıcısı olduğunu bir daha sübuta yetirərək milli birlik - ictimai dayanışma nümayiş etdirir. Milli həmrəyliyin, vətəndaş-dövlət birliyinin bariz nümunəsi insanların Prezident İlham Əliyevə çoxsaylı minnətdarlıq məktublarında əksini tapmış cümlələrdə ifadə olunur. “Azərbaycan xalqının taleyüklü məsələlərinin həlli ancaq Sizin qətiyyətli mövqeyiniz sayəsində mümkündür”, “Ən çətin vaxtlarda lider öz xalqının, vətəndaş isə öz liderinin yanındadır” kimi ifadələr xalqın öz Prezidentinə inamı və güvənini əks etdirir. Bu, sözün əsl mənasında, Azərbaycan dövlətinin qüdrətini, ölkəmizin milli gücünü təmin edən strateji əhəmiyyətli faktordur. Yeri gəlmişkən, mövcud sanitar-epidemioloji vəziyyəti təhlil edən Nazirlər Kabineti yanında Operativ Qərargahın ölkə üzrə karantin rejiminin avqustun 31-dək uzadılması, həmçinin mövcud sanitar-epidemioloji vəziyyətə uyğun olaraq respublikanın 13 şəhər və rayonunda sərt karantin rejimi müddətinin də həmin tarixə qədər artırılması, bununla belə, bəzi yumşaldılmaların tətbiqi barədə qərarları, hər şeydən əvvəl, insanların sağlamlığının qorunmasına xidmət edir.
Ac toyuq yuxusunda darı görər və ya dağıdıcı düşərgənin gerçəkləşməyən arzuları
Təəssüflər olsun ki, bu təqdirəlayiq addımlarla bağlı spekulyativ rəy formalaşdırmağa çalışanlar, həmçinin pandemiya şəraitində ölkəmizdə vətəndaş-dövlət birliyinin pozulmasını, hətta ölkədə çox ciddi kataklizmlərin baş verməsini istəyənlər də var. Bu arzuda olanlar xalqımıza qarşı düşmənçilik mövqeyi sərgiləyənlərdir. Bunlar təkcə ermənilər deyil, həm də onlara xidmət edən, sinxron fəaliyyət göstərən “sapı özümüzdən olan baltalar” - “beşinci kolon”dur.
Başqa sözlə, “Milli şura” adlanan antimilli dəstənin sıralarında yer alan radikallar, özünə “müxalifət” deyərək radikalizm, anarxizm kimi dağıdıcı ideyaları mənimsəyən və təbliğ edənlərdir. Bu antimilli ünsürlər “gözəgörünməz düşmənlə müharibə” adlandırılan pandemiya şəraitində - vətəndaş məsuliyyətinin, milli həmrəyliyin hər zamankından daha çox tələb olunduğu vaxtda da anti-xalq, anti-dövlət xarakterli çağırışlar edirlər. İnsanlara “karantin rejiminə əməl etməyin” deyərək vətəndaş itaətsizliyini təbliğ edirlər. Amma necə deyərlər, ac toyuq yuxusunda darı görər. Çünki radikal ünsürlərin məkrli arzuları gözlərində qalıb, onların xaos diləkləri və fəlakət ssenariləri gerçəkləşməyib.
Pandemiya şəraitini fürsət kimi görənlər, yaxud “Milli şura”çıların miskin görüntüsünün daha bir fraqmenti
Yeri gəlmişkən, bu qondarma qurumun virtual qeybət xarakterli yeni “videoiclas”ında səsləndirilən fikirlər marginal ünsürlərin Azərbaycan xalqına düşmən münasibətini, milli maraqlara zidd olan, antidövlət mövqeyini bir daha əks etdirib. Səsləndirilən fikirlərin məzmumundan görünür ki, bu radikal dəstə üzvləri koronavirusu bəla deyil, bayram və fürsət kimi qəbul edirlər, dövlətə qarşı “qara piar” kampaniyası aparmaq üçün insan ölümünü, iqtisadiyyatın geriləməsini, vətəndaşlarımızın maddi təminatının aşağı düşməsini arzulayırlar.
Beləliklə, “karantin rejiminin uzadılması bizə sərf edir”, - deyən dağıdıcı düşərgə təmsilçiləri - “Milli şura”çılar bununla öz cılızlıqları, miskinlikləri, xalqa düşmən münasibətlərini bir daha aşkar surətdə nümayiş etdirirlər. Görünən budur ki, bu dağıdıcı ünsürlər öz çirkin məqsədlərinə çatmaq üçün xalqın ən ağır duruma düşməsinə də razıdırlar.
Nurlan QƏLƏNDƏRLİ

Paylaş:

Baxılıb: 391 dəfə