Avropa-Azərbaycan Cəmiyyəti Londonda unikal aksiya keçirib

Bakı:

8 °C

93 %

0 m/s

Əlaqə

AZ RU EN

Ana səhifə / Siyasət / Avropa-Azərbaycan Cəmiyyəti Londonda unikal aksiya keçirib

Avropa-Azərbaycan Cəmiyyəti Londonda unikal aksiya keçirib

27.02.2010 [21:45]

Xocalı soyqırımının 18-ci ildönümü münasibətilə Avropa-Azərbaycan Cəmiyyətinin (AAC) təşkilatçılığı ilə Londonda tədbir keçirilib. AAC-dən APA-ya verilən məlumata görə, Londondakı Temza çayı üzərində təşkil olunan mərasimdə siyasi, diplomatik dairələrin, QHT və diaspor təşkilatlarının nümayəndələri Savoy Körpüsündə (Savoy Pier) qayığa toplaşaraq, o faciəli gündə baş vermiş qanlı hadisələri əks etdirən foto sərgiyə baxıblar. Həlak olanların xatirəsinə Temza çayına 613 qırmızı qərənfil atılıb, hər birinə soyqırımı qurbanlarının adı yazılmış 613 şar havaya buraxılıb. Londonun mərkəzində səyyar ekran vasitəsilə qətliamın donmuş, emosional təsvirləri və “Xocalıya Ədalət” kampaniyasının veb-sayt məlumatları nümayiş etdirilib. Tədbirdə çıxış edən AAC sədri Taleh Heydərov bildirib ki, AAC “Xocalıya Ədalət” hərəkatı ilə əlaqədar bu tədbiri təşkil etməkdən şərəf duyur. Azərbaycanın Böyük Britaniyadakı səfiri Fəxrəddin Qurbanov Xocalı hadisəsini xalqın və dövlətin tarixində qara gün adlandırıb. Diplomat deyib ki, Xocalı hadisəsi bütün dünyada anılır, amma Londondakı mərasim daha unikaldır.
AAC Məşvərət Şurasının üzvü Lord Kilkluni parlament, Avropa Şurası və Lordlar Palatasının üzvü kimi uzun müddət Azərbaycanla məşğul olduğunu qeyd edib. O bildirib ki, Azərbaycanda qaçqın və məcburi köçkünlərin çadır düşərgələrinə baş çəkib və öz doğma yurd-yuvalarından didərgin düşmüş insanların vəziyyəti onu sarsıdıb. Kilkluni, həmçinin qeyd edib ki, bu cür tədbirlər “dondurulmuş” Dağlıq Qarabağ münaqişəsinin və Xocalı unudulmuş qətliamın dünya ictimaiyyətinin diqqətinə çatdırılmasında mühüm rol oynayacaq: “Bir milyona yaxın azərbaycanlı qaçqın və məcburi köçkün hələ də müvəqqəti qəsəbələrdə yaşayır. Onlar daimi məskunlaşmaq istəmir, onların yeganə arzusu doğma torpaqlarına qayıtmaqdır. Azərbaycan və Ermənistan arasındakı münaqişə “dondurulmuş münaqişə” kimi təqdim edilsə də, cəbhə xəttində tez-tez atışmalar olur. Keçən həftə üç Azərbaycan əsgəri cəbhə xəttindəki atışmada həlak olub. Uzun illər aparılan danışıqlara baxmayaraq, Ermənistan hələ də BMT Təhlükəsizlik Şurasının Ermənistan Silahlı Qüvvələrinin Azərbaycan ərazilərindən qeyd-şərtsiz çıxmasını nəzərdə tutan 822, 853, 874 və 884 saylı qətnamələrini yerinə yetirmir”.
Qeyd edək ki, iki həftə əvvəl AAC Böyük Britaniya baş nazirinin internet saytına müraciət göndərərək qətliamı pisləməyə çağırıb. Bu günədək çağırışa bir çoxları imza atıb. Bu müraciəti Britaniyanın bütün siyasi partiyalarında gündəmə gətirmək üçün daha böyük dəstək tələb olunur. Bu müraciət bir il müddətində açıq olacaq. AAC Britaniya vətəndaşlarını beynəlxalq ictimaiyyəti bu vəhşiliklə bağlı məlumatlandırmağa, Azərbaycan torpaqlarının qaytarılması üçün Ermənistana təzyiqi artırmağa səsləyir.

Paylaş:

Baxılıb: 1183 dəfə