Avropa Parlamenti Milli Məclislə əlaqələri inkişaf etdirməkdə maraqlıdır

Bakı:

26 °C

47 %

1 m/s

Əlaqə

AZ RU EN

Ana səhifə / Siyasət / Avropa Parlamenti Milli Məclislə əlaqələri inkişaf etdirməkdə maraqlıdır

Avropa Parlamenti Milli Məclislə əlaqələri inkişaf etdirməkdə maraqlıdır

28.04.2018 [10:16]

Aprelin 27-də Milli Məclisin sədri Oqtay Əsədov ölkəmizdə səfərdə olan Avropa Parlamentinin Azərbaycan üzrə daimi məruzəçisi xanım Norika Nikolai ilə görüşüb.
AZƏRTAC xəbər verir ki, görüşdə sədr Azərbaycanın Avropa İttifaqı və onun qurumları ilə əməkdaşlığın hərtərəfli inkişafında maraqlı olduğunu bildirib. Bu baxımdan qarşılıqlı səfərlərin həyata keçirilməsi mühüm əhəmiyyət kəsb edir. Avropa İttifaqı ilə münasibətlərdə son dövrlərdə müsbət dinamika müşahidə olunmaqdadır.
Oqtay Əsədov xanım Norika Nikolai ilə ikinci dəfə görüşdüyünü xatırladaraq, onun Milli Məclis ilə Avropa Parlamenti arasında münasibətlərin inkişafı istiqamətində səylərini və bu qurumda mövcud olan Azərbaycan ilə dostları qrupunun üzvü kimi fəaliyyətini yüksək dəyərləndirib. Bildirilib ki, Azərbaycan üzrə məruzənin hazırlanması artıq yekun mərhələdədir. “Cari ilin mayında qurumun xarici əlaqələr komitəsində sənəd müzakirəyə çıxarılacaq. Ümid edirik ki, sənəddə bölgə reallıqları öz obyektiv əksini tapacaq. Bununla yanaşı, bəzi siyasətçilər tərəfindən Milli Məclis və Avropa Parlamenti arasında son dövrlər əldə edilən nailiyyətlərə kölgə salmaq cəhdlərinə qarşıyıq. Belə hesab edirik ki, Avropa Parlamentində kifayət qədər rasional düşünən insanlar var. Məhz bunun nəticəsidir ki, son bir ildə parlamentlər arasında münasibətlər yüksələn xətlə inkişaf edir”, - deyə sədr vurğulayıb.
Görüşdə Milli Məclis sədri vurğulayıb ki, 1999-cu ildən qüvvədə olan Azərbaycan ilə Avropa İttifaqı arasında Tərəfdaşlıq və Əməkdaşlıq Sazişi bugünkü dinamikaya uyğun deyil. Buna görə də yeni sənədin hazırlanmasına ehtiyac var. 2017-ci ilin noyabrında Azərbaycan Prezidentinin Şərq Tərəfdaşlığı Sammitində iştirakı ölkəmiz tərəfindən bu quruma göstərilən diqqətin bariz nümunəsidir. Biz gələcəkdə də Avropa Parlamenti ilə münasibətlərimizi inkişaf etdirmək niyyətindəyik.
Səmimi qəbul üçün minnətdarlığını bildirən xanım Norika Nikolai növbəti dəfə Milli Məclisdə olmağından məmnunluğunu ifadə edib. Bildirib ki, onun təmsil etdiyi qurum Milli Məclislə əlaqələri inkişaf etdirməkdə maraqlıdır. Milli Məclisin fəaliyyətində əsaslandığı dəyərlər alqışa layiqdir.
Qonaq son dövrdə münasibətlərin inkişafında əldə edilmiş uğurları, Azərbaycan nümayəndə heyətinin Avronest PA-da fəaliyyətini bərpa etməsini yüksək qiymətləndirib. O, ölkəmizə səfərini və burada keçirdiyi görüşləri çox əhəmiyyətli hesab edib.
Söhbət zamanı tərəfləri maraqlandıran məsələlər ətrafında fikir mübadiləsi aparılıb.
Görüşdə Milli Məclis Aparatının rəhbəri Səfa Mirzəyev və Avropa İttifaqı-Azərbaycan Parlamentlərarası Əməkdaşlıq Komitəsinin həmsədri Cavanşir Feyziyev də iştirak ediblər.

Paylaş:

Baxılıb: 465 dəfə