Prezidentin İctimai-siyasi məsələlər üzrə köməkçisi Əli Həsənov 2018-ci yubiley ilində Azərbaycan diasporunun qarşısında duran vəzifələrdən danışıb

Bakı:

26 °C

54 %

1 m/s

AZ RU EN

Ana səhifə / Siyasət / Prezidentin İctimai-siyasi məsələlər üzrə köməkçisi Əli Həsənov 2018-ci yubiley ilində Azərbaycan diasporunun qarşısında duran vəzifələrdən danışıb

Prezidentin İctimai-siyasi məsələlər üzrə köməkçisi Əli Həsənov 2018-ci yubiley ilində Azərbaycan diasporunun qarşısında duran vəzifələrdən danışıb

28.02.2018 [10:04]

Xəbər verdiyimiz kimi, fevralın 27-də Amsterdamda Avropa Azərbaycanlıları Konqresinin növbədənkənar qurultayı keçirilib. Azərbaycan Respublikası Prezidentinin İctimai-siyasi məsələlər üzrə köməkçisi Əli Həsənov qurultayda çıxış edib.
Əli Həsənov 2018-ci ilin Prezident İlham Əliyev tərəfindən “Azərbaycan Xalq Cümhuriyyəti İli” elan edilməsini xatırladaraq, bununla əlaqədar Azərbaycan diasporunun qarşısında duran əsas vəzifələr üzərində ətraflı dayanıb. O qeyd edib ki, yüz il bundan əvvəl İslam və türk dünyasında ilk demokratik cümhuriyyətin elan edilməsi, həmçinin 1991-ci ildə dövlət müstəqilliyinin bərpası XX yüzillikdə Azərbaycan xalqının ən böyük nailiyyətləri olub. Müasir müstəqil Azərbaycan dövlətinin memarı və qurucusu Heydər Əliyevin rəhbərliyi ilə ölkəmiz iqtisadi və siyasi cəhətdən möhkəmlənib, sosial sahədə böyük uğurlar qazanıb və bu gün Ümummilli liderin siyasəti uğurla davam etdirilir. Bu uğurun başlıca şərti ümummilli birliyə nail olmağımız, Azərbaycan cəmiyyətinin dövlətçilik və azərbaycançılıq ideologiyası ətrafında sıx birləşməsidir.
Prezidentin köməkçisi vurğulayıb ki, ümumxalq dəstəyi və birlik olmasa, heç bir dövlətin ömrü uzun ola bilməz. Bu gün Azərbaycanın dünya dövlətləri arasında layiqli yer tutması faktı Azərbaycan iqtidarının indiki fəaliyyət kursunun xalq tərəfindən tamamilə dəstəklənməsinə parlaq sübutdur.
Əli Həsənov deyib: “Yubiley ili olan 2018-ci ildə Azərbaycan diasporuna məsul bir vəzifə - Ermənistan-Azərbaycan, Dağlıq Qarabağ münaqişəsinin kökləri və mahiyyəti barədə dünya ictimaiyyətini daha da məlumatlandırmaq, habelə erməni lobbisinin fəaliyyətini neytrallaşdırmaq vəzifəsi həvalə edilib”.
Prezidentin köməkçisi xatırladıb ki, daşnaklar 100 il bundan əvvəl də Azərbaycan xalqına qarşı soyqırımı törədiblər. O deyib: “Bu, elə bir mövzudur ki, diaspor heç bir halda ona diqqəti azaltmamalıdır”.
Əli Həsənov çıxışının sonunda bu gün, xüsusən Ermənistanın Azərbaycana qarşı təcavüzü, Xocalı soyqırımı, həmçinin Azərbaycanın dinamik inkişafı, sosial-iqtisadi sahədə uğurları və xarici siyasətdə nailiyyətləri barədə həqiqətlərin dünya ictimaiyyətinə çatdırılması məsələsində media işçiləri qarşısında duran vəzifələrə də toxunub.

Paylaş:

Baxılıb: 549 dəfə