Latviyada 28 May - Respublika Günü qeyd edilib

Bakı:

24 °C

65 %

12 m/s

Əlaqə

AZ RU EN

Ana səhifə / Siyasət / Latviyada 28 May - Respublika Günü qeyd edilib

Latviyada 28 May - Respublika Günü qeyd edilib

31.05.2017 [10:16]

Azərbaycanın Latviyadakı səfirliyi 28 May - Respublika Günü münasibətilə Latviya paytaxtında təntənəli qəbul təşkil edib.
Qəbulda Azərbaycan Milli Məclisinin sədri Oqtay Əsədov, Latviya Seyminin spikeri İnara Murniyetse, yüksək vəzifəli rəsmi şəxslər, Seymin deputatları, XİN-in əməkdaşları, Azərbaycan parlamenti nümayəndə heyətinin üzvləri, Latviyanın sabiq prezidenti Valdis Zatlers, bu ölkədə akkreditə edilmiş diplomatik korpusun nümayəndələri, işgüzar dairələrin təmsilçiləri, ictimai-siyasi xadimlər, Azərbaycan diasporunun üzvləri, KİV nümayəndələri iştirak ediblər.
Ümumlatviya Mahnı və Rəqs Bayramının baş dirijoru Xarald Bardzinşin rəhbərliyi ilə orkestrin ifasında Azərbaycanın və Latviyanın dövlət himnləri səslənib.
Tədbirin rəsmi hissəsində Azərbaycanın Latviyadakı səfiri Cavanşir Axundov çıxış edib. Səfir tədbir iştirakçılarını Azərbaycanın dövlət bayramı - Respublika Günü münasibətilə təbrik edib və çıxış üçün Azərbaycan parlamentinin sədri Oqtay Əsədova söz verib.
Oqtay Əsədov müsəlman Şərqində ilk demokratik respublikanın məhz Azərbaycanda yaradılması barədə məlumat verib. O qeyd edib ki, Azərbaycan Xalq Cümhuriyyəti xalqımızın demokratik ənənələrinin əsasını qoyub, milliyyətindən, siyasi mövqeyindən və dini etiqadından asılı olmayaraq bütün vətəndaşlar üçün bərabər hüquqlar təmin edib. Spiker diqqətə çatdırıb ki, 1991-ci il oktyabrın 18-də Azərbaycanın dövlət müstəqilliyi bərpa edilib. Müstəqilliyin bərpasından sonrakı ilk illərdə ölkəmiz Ermənistan tərəfindən Azərbaycan ərazilərinin 20 faizinin işğal edilməsi, 1 milyondan çox həmvətənimizin qaçqın və məcburi köçkün vəziyyətinə düşməsi faktları ilə üzləşib.
Spiker Azərbaycan dövlətinin ən ağrılı problemi olan Ermənistan-Azərbaycan, Dağlıq Qarabağ münaqişəsindən danışaraq xatırladıb ki, ATƏT-in Minsk qrupu bu münaqişənin tənzimlənməsi üçün yaradılıb. Lakin təəssüf ki, bu qurumun fəaliyyəti gözlənilən nəticələri verməyib. Oqtay Əsədov vurğulayıb ki, heç şübhəsiz, Azərbaycan istənilən yolla bu problemi həll edəcək, ölkənin ərazi bütövlüyünün bərpa edilməsinə nail olacaq.
Parlamentin sədri qeyd edib ki, bu gün beynəlxalq arenada nüfuzlu bir dövlət olan Azərbaycan Avropanın enerji təhlükəsizliyinin təmin edilməsində mühüm rol oynayır. Ölkəmiz Avropa ölkələri ilə, o cümlədən Latviya ilə əlaqələrin möhkəmləndirilməsinə xüsusi əhəmiyyət verir.
Latviya Seyminin spikeri İnara Murniyetse öz adından və Latviya xalqı adından tədbir iştirakçılarını Azərbaycan Xalq Cümhuriyyətinin yaradılmasının 99 illiyi münasibətilə təbrik edib. İ.Murniyetse vurğulayıb ki, bu gün Latviya və Azərbaycan qürurla deyə bilər: “Biz müstəqil və azad dövlətlərik!”.
Spiker vurğulayıb ki, onun ölkəsi Azərbaycanın müstəqilliyini və ərazi bütövlüyünü dəstəkləyir. Azərbaycan ilə Latviyanı möhkəm dostluq telləri bağlayır. İki ölkə arasında fəal siyasi dialoq aparılır. Latviya Azərbaycan ilə Avropa İttifaqı arasında inkişaf etməkdə olan əlaqələri alqışlayır. Gələn il hər iki ölkə öz müstəqilliyinin 100 illiyini qeyd edəcək. Vətənə məhəbbət hissi bizə öz dövlətçiliyimizi qoruyub saxlamaq üçün güc verir.
Bayram tədbirində orkestr Üzeyir Hacıbəylinin, Fikrət Əmirovun, habelə latış və Avropa bəstəkarlarının əsərlərindən ibarət konsert proqramı ilə çıxış edib.
Riqa Klassik Gimnaziyası nəzdində Bazar günü Azərbaycan məktəbinin şagirdləri Azərbaycan haqqında ana dilində şeirlər oxuyublar.
Qonaqlar Azərbaycan milli mətbəxinin ləziz nümunələrini dadıblar.

Paylaş:

Baxılıb: 426 dəfə