Azərbaycan-Fransa əlaqələrində yeni mərhələ

Bakı:

26 °C

58 %

11 m/s

Əlaqə

AZ RU EN

Ana səhifə / Siyasət / Azərbaycan-Fransa əlaqələrində yeni mərhələ

Azərbaycan-Fransa əlaqələrində yeni mərhələ

17.03.2017 [10:09]

Vüqar Rəhimzadə: Möhtərəm Prezidentimiz İlham Əliyevin Fransaya rəsmi səfəri zamanı gələcək əməkdaşlığın yeni konturları müəyyənləşdirilib
“Hər zaman təşəbbüsləri reallığa çevirən, regional və beynəlxalq miqyasda əməkdaşlığın yeni formatlarını yaradan Azərbaycan bu gün dünya dövlətlərinin, xüsusilə Avropanın maraq dairəsindədir. Ölkəmizin yerləşdiyi əlverişli coğrafi məkan, sahib olduğu təbii resurslar, həyata keçirdiyi uğurlu daxili və xarici siyasət özünə olan marağı daha da artırır. Bu günlərdə möhtərəm Prezidentimiz İlham Əliyevin Fransaya rəsmi səfəri, keçirdiyi yüksək səviyyəli görüşlər, müzakirə olunan məsələlər, əldə olunan razılaşmalar bir daha bu reallığı ortaya qoyur”. Bu fikirləri YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə Azərbaycan Prezidentinin Fransaya səfərinin yekunlarını şərh edərkən bildirib.
V.Rəhimzadənin sözlərinə görə, səfər iki ölkə arasındakı münasibətlərin daha da möhkəmlənməsi baxımından mühüm əhəmiyyət kəsb edir: “Məlum olduğu kimi, Fransa 1992-ci il yanvarın 3-də Azərbaycanın müstəqilliyini tanıyıb və bu sırada ilk dövlətlərdən biri olub. Hazırda Azərbaycan ilə Fransa arasında siyasi və iqtisadi, eləcə də digər sahələrdə uğurlu əməkdaşlıq mövcuddur. Ölkəmizdə 50-dən artıq fransız şirkəti fəaliyyət göstərir və iqtisadiyyatımıza yatırılan investisiyaların həcmi 2 milyard dollardan çoxdur. Təkcə bu rəqəm onu deməyə əsas verir ki, ölkələrimiz arasındakı münasibətlərin parlaq gələcəyi var. Təbii ki, möhtərəm Prezidentimiz İlham Əliyevin Fransaya rəsmi səfəri zamanı bu və digər məsələlər ətrafında geniş fikir mübadiləsi aparılıb, gələcək əməkdaşlığın yeni konturları müəyyənləşdirilib”.
YAP Siyasi Şurasının üzvü qeyd edib ki, bu gün Azərbaycanda əlverişli biznes mühiti mövcuddur: “Azərbaycan artıq uzun illərdir ki, xarici investorlar üçün cəlbedici məkan kimi tanınır. Ölkəmizdə iqtisadiyyatın bütün sahələrinə, xüsusilə də neft sektoruna böyük həcmdə investisiyalar yatırılır. Əbəs yerə ölkəmizin qardaş Türkiyə ilə birgə reallaşdırdığı, eləcə də Qərbin böyük dəstək verdiyi dünya səviyyəli “Cənub Qaz Dəhlizi” Avropanın ən böyük infrastruktur layihəsi adlandırılmır. Layihənin əsas komponentləri olan TANAP və TAP kəmərlərinin tikintisi sürətlə davam edir. İlkin mərhələdə Azərbaycan qazının Avropaya nəqli nəzərdə tutulur. Möhtərəm Prezidentimizin Fransaya səfəri zamanı, həmçinin enerji sahəsində əməkdaşlıq xüsusi müzakirə mövzusu olub. Bu mənada Fransanın “Total” şirkəti və SOCAR arasında uzun illərdir davam edən əməkdaşlığı xüsusi olaraq vurğulamaq lazımdır. Hesab edirəm ki, bu sahədəki əməkdaşlığımızın uğurlu gələcəyi var”.
“İki sahil” qəzetinin baş redaktoru vurğulayıb ki, prezidentlərin görüşü zamanı Ermənistan-Azərbaycan, Dağlıq Qarabağ münaqişəsinin həlli əsas müzakirə mövzularından biri olub: “Bu gün ölkəmiz Ermənistan-Azərbaycan, Dağlıq Qarabağ münaqişəsinin həllində Fransanın səylərini yüksək qiymətləndirir. Fransa Prezidenti Fransua Olland çıxışı zamanı qeyd edib ki, Dağlıq Qarabağ məsələsi haqda danışıldı və bildirildi ki, mövcud status-kvo qəbuledilməzdir. Fransa Prezidenti bu qənaətdədir ki, Dağlıq Qarabağ münaqişəsinin həlli yollarının tapılmasında irəliləməyin vaxtı çoxdan çatıb. Azərbaycan Prezidenti möhtərəm İlham Əliyev də hər zaman olduğu kimi, qətiyyətli mövqeyini ortaya qoyub, münaqişənin ancaq beynəlxalq hüququn normalarına uyğun və Azərbaycanın ərazi bütövlüyü çərçivəsində həll olunmasının vacibliyini bəyan edib. Dövlətimizin başçısı bildirib ki, status-kvo qəbuledilməzdir. Dağlıq Qarabağ tarixi Azərbaycan torpağıdır. Danışıqlar zamanı bu əminlik ifadə edilib ki, Fransa-Azərbaycan əlaqələri gələcəkdə daha da genişləndiriləcək. Sadaladığımız bu və digər məqamları nəzərə alaraq deyə bilərik ki, möhtərəm Prezidentimiz İlham Əliyevin Fransa səfəri iki ölkə arasında əlaqələrin daha da möhkəmlənməsinə öz töhfəsini verəcək”.

Paylaş:

Baxılıb: 489 dəfə