“Birinci Avropa Oyunları Azərbaycan üçün çox önəmli məsələ idi”

Bakı:

22 °C

65 %

5 m/s

Əlaqə

AZ RU EN

Ana səhifə / Siyasət / “Birinci Avropa Oyunları Azərbaycan üçün çox önəmli məsələ idi”

“Birinci Avropa Oyunları Azərbaycan üçün çox önəmli məsələ idi”

01.07.2015 [10:22]

Birinci Avropa Oyunlarının açılış və bağlanış mərasimi dünyanın diqqət mərkəzində oldu. Xarici ölkə KİV-ləri möhtəşəm mərasimi işıqlandırmaqla Azərbaycanın uğurunu dünyaya çatdırdılar. Bir çox xarici ölkələrin təzyiqləri, iftira xarakterli silsilə xəbərləri, qərəzli yazıları Azərbaycanın tarixi uğuruna kölgə sala bilmədi. Azərbaycan dövləti bütün bunların öhdəsindən gələrək öz gücünü, qüdrətini dünyaya nümayiş etdirdi. Oyunlar ərəfəsində və ərzində Azərbaycana xeyli sayda turist, rəsmi qonaq və idmançı gəldi. Azərbaycana gələn xarici qonaqlar ölkəmizə hansı təəssüratlarla gəlib, hansı təəssüratlarla getdilər?
Həmin sualı cavablandıran Milli Məclisin deputatı Yeni Azərbaycan Partiyası (YAP) İcra katibinin müavini Siyavuş Novruzov deyib ki, Oyunlar zamanı ölkəmizə gələnlərin hər biri Azərbaycan haqda çox yüksək təəssüratlarla qayıtdılar. “Çünki onlar Azərbaycanda olan inkişafın, ictimai-siyasi sabitliyin, iqtisadi inkişafın, quruculuq və abadlıq işlərinin, ölkəmizin mədəniyyətinin, incəsənətinin, mətbəxinin və digər məsələlərin şahidi oldular. Təbii ki, onların həm “Facebook”, həm də “Twitter” səhifələrində ölkəmizdə çəkdirdikləri müxtəlif şəkilləri paylaşmaları, özlərinin dostları ilə yazışmalarında da ölkəmiz haqda yazdıqları fikirlər Azərbaycanın geniş şəkildə təbliğidir”.
Millət vəkili bildirib ki, bəzi ölkələrin səfirlikləri öz səhifələrində Azərbaycanı təhlükəli bir ölkə kimi təqdim ediblər: “Təbii ki, burada onların öz maraqları var. Çünki bu cür ölkələrdə işləyəndə onlar ikiqat və üçqat maaş alırlar. Ona görə də onlar çalışırlar ki, şəxsi maraqları hesabına öz səhifələrində və ya turizmlə bağlı olan səhifələrində Azərbaycan haqda düzgün olmayan başqa məlumatlar versinlər. Amma Azərbaycana gələn turistlər və idmançılar bunun həqiqətə uyğun olmadığını gördülər. Demək olar ki, bütün dünyadan Azərbaycana turistlər, o cümlədən, dünyanın məhşur televiziyaları da bu Oyunları yayımlamağa gəlmişdilər. Həmin televiziyalar vasitəsilə ölkəmizin müxtəlif guşələri, rayonları, Bakı şəhəri, Azərbaycanın mədəniyyəti, incəsənəti qədimliyi, tarixi, müasirliyi nümayiş olundu. Bu baxımdan birinci Avropa Oyunları Azərbaycan üçün çox önəmli bir məsələ idi. Çox güclü bir təbliğat işi nəticəsində Azərbaycan həqiqətləri dünya ictimaiyyətinə çatdırıldı”.
YAP İcra katibinin müavini Azərbaycanın ilk olaraq birinci Avropa Oyunlarına ev sahibliyi etdiyini xatırladaraq “Bu artıq Azərbaycanın qoyduğu standartlar deməkdir. Bundan sonra Oyunları keçirəcək ölkə sırf Azərbaycanın standartlarına yaxınlaşmağa çalışacaq” deyib.

Paylaş:

Baxılıb: 677 dəfə