Biz Xocalıya qayıdacağıq!

Bakı:

27 °C

78 %

2 m/s

Əlaqə

AZ RU EN

Ana səhifə / Siyasət / Biz Xocalıya qayıdacağıq!

Biz Xocalıya qayıdacağıq!

25.02.2015 [00:57]

Müdafiə naziri, general-polkovnik Zakir Həsənovun təsdiq etdiyi tədbirlər planına əsasən, Xocalı soyqırımının 23-cü ildönümü ilə əlaqədar olaraq Silahlı Qüvvələrin birlik, birləşmə, hərbi hissə və xüsusi təyinatlı təhsil müəssisələrində silsilə tədbirlər keçirilir.
Müdafiə Nazirliyinin mətbuat xidmətindən AzərTAc-a bildiriblər ki, yerli icra hakimiyyəti orqanları, mülki təşkilatlar, idarə və müəssisələrin kollektivləri ilə nazirliyin birgə tədbirlər təşkil etməsi artıq ənənə halını alıb.
Fevralın 24-də Müdafiə Nazirliyinin dəstəyi ilə Bakıxanov qəsəbəsindəki “Kaspi” Liseyində bu təhsil müəssisəsinin “Milli yaddaş” layihəsi çərçivəsində “Biz Xocalıya qayıdacağıq!” devizi altında xatirə mərasimi keçirilib.
Əvvəlcə mərasim iştirakçıları “Xocalı faciəsi şagirdlərin gözü ilə” mövzusunda rəsm işlərindən ibarət sərgi ilə tanış olublar.
Tədbirdə “Kaspi” Təhsil Şirkətinin və “Kaspi” qəzetinin təsisçisi Sona Vəliyeva Azərbaycan xalqının tarixində ən dəhşətli faciələrdən olan Xocalı soyqırımı barədə geniş çıxış edib və böyük əminliklə bildirib ki, işğal altında olan torpaqlarımız, eləcə də yerlə-yeksan edilmiş Xocalı şəhəri Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin apardığı məqsədyönlü daxili və xarici siyasət nəticəsində tezliklə azad ediləcək, bayrağımız Xankəndi, Şuşa, Laçın və yolumuzu gözləyən digər əzəli və əbədi yurd yerlərimizdə dalğalanacaqdır.
Müdafiə Nazirliyinin zabiti, polkovnik Abdulla Qurbani, Respublika Müharibə, Əmək və Silahlı Qüvvələr Veteranları Təşkilatının sədri, istefada olan general-mayor Dadaş Rzayev, Silahlı Qüvvələrin zabiti, mayor Ramil Səfərov, ehtiyatda olan polkovnik Cəlil Xəlilov və başqaları dünya xalqlarının gec-tez Xocalının harayına səs verəcəklərinə, bu dəhşətli soyqırımını törədənlərin tezliklə beynəlxalq müttəhimlər kürsüsünə çıxarılacaqlarına inamlarını ifadə ediblər.
Silahlı Qüvvələrin Mahnı və Rəqs Ansamblının xoreoqrafiya qrupunun, solistlərin, incəsənət ustalarının və Liseyin bədii özfəaliyyət kollektivlərinin iştirakı ilə ədəbi-bədii kompozisiya, videosüjetlər, Azərbaycan Hərb Tarixi Muzeyinin layihəsi olan “Briqada, irəli!” qəhrəmanlıq balladası təqdim edilib.
“Kaspi” Liseyinin direktoru Tural Əliyev Xocalı faciəsinin ildönümü ərəfəsində təşkil olunan tədbirin şagirdlərin hərbi vətənpərvərlik ruhunda tərbiyəsində əhəmiyyətini qeyd edib və bundan sonra da Müdafiə Nazirliyi ilə birgə silsilə tədbirlər keçirəcəklərini vurğulayıb.

Paylaş:

Baxılıb: 704 dəfə