Azərbaycanın informasiya təhlükəsizliyində medianın rolu müzakirə olunub

Bakı:

23 °C

48 %

2 m/s

Əlaqə

AZ RU EN

Ana səhifə / Siyasət / Azərbaycanın informasiya təhlükəsizliyində medianın rolu müzakirə olunub

Azərbaycanın informasiya təhlükəsizliyində medianın rolu müzakirə olunub

06.12.2014 [12:13]

Dekabrın 5-də Beynəlxalq Mətbuat Mərkəzində Prezident Administrasiyasının, Müdafiə Nazirliyinin və Azərbaycan Mətbuat Şurasının birgə təşkilatçılığı ilə “Azərbaycanın informasiya təhlükəsizliyində medianın rolu” mövzusunda tədbir keçirilib.
AzərTAc xəbər verir ki, tədbirdə son dövrlərdə cəbhəboyu zonada baş verən hadisələrlə bağlı bir sıra KİV-lərin cəmiyyətə düzgün informasiya çatdırmaması qeyd olunub, bu sahədə mühüm işlərin görülməsinin zəruriliyi xüsusi vurğulanıb.
Bildirilib ki, belə halların qarşısının alınması üçün Prezident Administrasiyasının rəhbəri Ramiz Mehdiyevin sədrliyi ilə avqustun 29-da dövlət orqanlarının mətbuat xidmətləri və KİV rəhbərlərinin müşavirəsi keçirilib. Prezident İlham Əliyevin sentyabrın 24-də imzaladığı “Azərbaycan Respublikası Silahlı Qüvvələrinin Ermənistan Respublikası Silahlı Qüvvələri ilə təmas xəttində bəzi təhlükəsizlik tədbirləri haqqında” Sərəncamda bununla bağlı konkret vəzifələr müəyyənləşdirilib.
Prezident Administrasiyası İctimai-siyasi məsələlər şöbəsinin sektor müdiri Vüqar Əliyev çıxış edərək vurğulayıb ki, cəbhəboyu zonada baş verən hadisələr həm də Azərbaycanın informasiya məkanında müxtəlif boşluqların olduğunu, mövcud söz azadlığı mühitindən sui-istifadə hallarının, yaranmış vəziyyətdə qeyri-adekvat reaksiyaların təhlükə həddinə çatdığını göstərir. Bu istiqamətdə görülən işlərdən danışan sektor müdiri artıq müvafiq dövlət orqanlarının Azərbaycan Prezidentinin Sərəncamından irəli gələn məsələlərin icrası ilə bağlı tədbirlər həyata keçirdiyini diqqətə çatdırıb. Vüqar Əliyev deyib ki, həm Sərəncamda qarşıya qoyulan vəzifələrin yerinə yetirilməsi, həm də aparılan ictimai müzakirələr mediada dövlət sirri kəsb edən informasiyaların yayılmasının qarşısının alınmasına, dövlət orqanlarının informasiyanın verilməsinə məsul struktur bölmələrinin operativliyinin təmin edilməsinə, KİV-lərin məsuliyyətinin artmasına və bu kimi mühüm məsələlərə daha peşəkar yanaşmasına səbəb olacaq.
Ötən dövrdə bu məsələlərlə bağlı mətbuatın fəaliyyətində irəliləyişin müşahidə olunduğunu vurğulayan sektor müdiri qeyd edib ki, ilk növbədə redaksiyalarda müxtəlif sahələr üzrə ixtisaslaşmanın aparılması, həmin sferalara yaxından bələd olan jurnalistlərin müəyyənləşdirilməsi və müvafiq dövlət orqanlarında akkreditasiya olunması vacib şərtlərdən biridir. Xüsusilə hərbi sahə, cəbhə xəttində baş verən insidentlərlə bağlı informasiyalar Müdafiə Nazirliyi ilə əlaqələndirilməlidir.
Qeyd edilib ki, Azərbaycan Prezidentinin 24 sentyabr tarixli Sərəncamına uyğun olaraq Müdafiə Nazirliyi tərəfindən bu istiqamətdə zəruri tədbirlər görülməkdədir.
Çıxışlarda, həmçinin informasiya təhlükəsizliyi məsələsində hər bir vətəndaşın, o cümlədən media nümayəndələrinin dövlət maraqları mövqeyindən çıxış etməsinin, informasiyaların təhlil olunmasının, jurnalistika fakültələrində informasiya təhlükəsizliyinin tədrisinin, hərbi jurnalistika ixtisasları üzrə peşəkar media nümayəndələrinin yetişdirilməsinin və s. vacibliyi qeyd edilib.

Paylaş:

Baxılıb: 725 dəfə