“Siyasi-hüquqi kateqoriyaların kontekstində Azərbaycan Respublikası və Rusiya Federasiyasında İnformasiya Təhlükəsizliyi”

Bakı:

25 °C

62 %

5 m/s

AZ RU EN

Ana səhifə / Siyasət / “Siyasi-hüquqi kateqoriyaların kontekstində Azərbaycan Respublikası və Rusiya Federasiyasında İnformasiya Təhlükəsizliyi”

“Siyasi-hüquqi kateqoriyaların kontekstində Azərbaycan Respublikası və Rusiya Federasiyasında İnformasiya Təhlükəsizliyi”

05.11.2014 [09:58]

Bu mövzuda Bakı şəhərində beynəlxalq konfrans keçirilib
Məlum olduğu kimi, Bakı şəhərində “Siyasi-hüquqi kateqoriyaların kontekstində Azərbaycan Respublikası və Rusiya Federasiyasında İnformasiya Təhlükəsizliyi” mövzusunda beynəlxalq konfrans keçirilib. Konfransın açılış mərasimində çıxış edən Milli Məclisinin Hüquq siyasəti və dövlət quruculuğu komitəsinin sədri Əli Hüseynli bildirib ki, Azərbaycan Respublikasının Prezidenti İlham Əliyev informasiya texnologiyalarının inkişafına xüsusi önəm verir: “Cənab Prezidentin apardığı uğurlu siyasət, informasiya texnologiyaları sahəsində qanunvericilik təşəbbüsünün davamlı olması Azərbaycanın neft ölkəsi ilə yanaşı, İKT ölkəsi kimi də tanınmasına gətirib çıxaracaq”.
Ə.Hüseynli qeyd edib ki, belə əlamətdar bir konfransın Rusiya və Azərbaycan alimlərinin iştirakı ilə Bakı şəhərində keçirilməsi xüsusi əhəmiyyətə malikdir. Komitə sədri Azərbaycanda bu sahədə qanunvericiliyin təkmilləşdirildiyini və son illərdə bu sahənin xüsusən inkişaf etdiyini qeyd edərək, Rusiyadan olan alimlərin bu mövzuda azərbaycanlı alimlərlə birgə gələcəkdə də davamlı əməkdaşlıq edəcəyini və iki ölkə arasında bütün sahələrdə səmərəli əməkdaşlığın hüquq elmi sahəsində də davamlı olacağına ümid etdiyini bildirib. Konfransda hüquq elmləri doktoru A.V.Morozova “İnformasiya hüququ üzrə yüksək ixtisaslı kadrların hazırlanması” barədə xüsusi məruzə ilə çıxış edib və Rusiya təcrübəsini Konfrans iştirakçları ilə bölüşüb. O qeyd edib ki, artıq Rusiyada bu sahədə xüsusi ixtisaslar, kafedralar, fakültələr mövcuddur. Hüquq elmləri doktoru, professor K.Səlimov “Əməliyyat-axtarış tədbirləri zamanı informasiya təhlükəsizliyi problemləri” mövzusunda xüsusi məruzə ilə çıxış edib və bu sahədə Azərbaycan və beynəlxalq təcrübə barədə qeyd edib.
Hüquq elmləri doktoru, professor T.A.Polyakova “İnformasiya təhlükəsizliyinin hüquqi təminatı üzrə aktual məsələlər” (beynəlxalq aspekt) adlı məruzə ilə çıxış edib. Hüquq elmləri namizədi L.Filotova “Hüquq sistemində informasiya hüququnun yeri və rolu”, iqtisad elmləri doktoru, professor Ç.İsmailov “İqtisadi əməkdaşlığın genişləndirilməsi regionda informasiya təhlükəsizliyinin təminatı kimi”, hüquq elmləri doktoru, professor R.F.Məmmədov “Müasir dünyada informasiya təhlükəsizliyi: siyasi-hüquqi məsələlər”, hüquq üzrə fəlsəfə doktoru, dosent R.Aslanov “İnformasiya texnologiyaları sahəsində cinayətlər” adlı məruzələrlə çıxış ediblər.
Konfrans Rusiya və Azərbaycan təcrübəsindən elmi və nəzəri müzakirələrlə başa çatıb. Rusiya Federasiyasından konfransda iştirak edən alimlər Azərbaycanda bu sahədə islahatların çox qısa vaxtda aparıldığına baxmayaraq məhsuldar və önəmli olduğunu qeyd ediblər. Rusiyalı və azərbaycanlı alimlər gələcəkdə də bu sahədə daha sıx əməkdaşlığın vacib olduğunu vurğulayıblar. Belə bir konfransın azərbaycanlı hüquqşünasların iştirakı ilə Rusiya Federasiyasında da keçirilməsi alimlər tərəfindən təklif edilib.
N.BAYRAMLI

Paylaş:

Baxılıb: 716 dəfə