Newtimes.az analitik-informasiya portalından Azərbaycan mətbuatına müraciət

Bakı:

27 °C

54 %

7 m/s

Əlaqə

AZ RU EN

Ana səhifə / Siyasət / Newtimes.az analitik-informasiya portalından Azərbaycan mətbuatına müraciət

Newtimes.az analitik-informasiya portalından Azərbaycan mətbuatına müraciət

03.09.2014 [10:02]

Son dövrlərdə dünya və ölkə mətbuatının ən aktual mövzularından biri də özünü ‘’İraq və Şam İslam Dövləti’’ (İŞİD) adlandıran terrorçu qruplaşmanın fəaliyyəti ilə bağlıdır. İlk növbədə, bu terror təşkilatının vəhşilikləri, insanlığa sığmayan hərəkətləri mətbuatda geniş işıqlandırılır. Bütün dünya liderləri bu terrorçular haqqında münasibət bildirirlər.
Azərbaycan mətbuatı da qlobal informasiya məkanının tərkib hissəsi olaraq bu mövzu ətrafında müxtəlif tipli videosüjet, analitik məqalə və ya xəbər verir. Lakin bu materialları verərkən bilərəkdən və ya bilməyərək müxtəlif xəbər saytları, qəzetlər və ya ayrı-ayrı jurnalist həmkarlarımız bəzən bu terror qruplaşmasının adını ‘’İslam dövləti’’ kimi çəkirlər. Bu isə daha çox dünyada, xüsusilə də Qərbdə İslamı bir qorxu mənbəyi, terror dini kimi təqdim etməyə çalışanların dəyirmanına su tökmək deməkdir. Aydındır ki, terrorçuların nə dini, nə də milləti olmur. Bu mənada terror qruplaşması olan İŞİD-i ‘’İslam dövləti’’ adlandırmaq ən azı İslam dininə qarşı hörmətsizlikdir. Məsələnin bu tərəfi ilə bağlı bizim mətbuatda müəyyən materiallar, ictimai-siyasi xadimlərin müsahibələri gedib. Lakin görünən budur ki, hələ də vəziyyət qənaətbəxş deyil. Müşahidə və təhlillər göstərir ki, Azərbaycandilli mətbuatda İŞİD-i ‘’İslam dövləti’’ kimi tanıtmağa çalışanlar sırasında “BBC”-nin Azərbaycan bölməsi, ‘’Amerikanın səsi’’, ‘’Azadlıq” radiosu liderlik edir. Bu isə terror qruplaşmasına ‘’İslam dövləti’’ adı vermək istəyənlərin əsl niyyətlərini göstərir.
Azərbaycan informasiya məkanında 2 ildən çoxdur ki fəaliyyət göstərən, daha çox beynəlxalq əhəmiyyətli mövzuların təhlili istiqamətində ixtisaslaşmış Newtimes.az analitik-informasiya portalı Azərbaycan mətbuatına və jurnalistlərə səslənir. Gəlin hər şeyi öz adı ilə adlandıraq. İŞİD haqqında məlumat verərkən ‘’İslam dövləti’’ deyil, özünü ‘’İraq və Şam İslam Dövləti’’ (İŞİD) adlandıran terrorçu qruplaşma ifadəsindən istifadə edək. Newtimes.az bu təşəbbüsün bütün həmkarlarımızdan dəstək görəcəyinə əmindir. Bir çox mətbuat orqanları ‘’İslam dövləti’’ deyərkən məsələnin siyasi tərəfinə həqiqətən fikir vermirlər. Ona görə də jurnalist həmkarlarımızı bu təşəbbüsü dəstəkləməyə çağırırıq.
Newtimes.az

Paylaş:

Baxılıb: 719 dəfə