Naxçıvanda Yeni Azərbaycan Partiyasının yaradılmasının 21-ci ildönümü qeyd edilib

Bakı:

24 °C

70 %

4 m/s

Əlaqə

AZ RU EN

Ana səhifə / Siyasət / Naxçıvanda Yeni Azərbaycan Partiyasının yaradılmasının 21-ci ildönümü qeyd edilib

Naxçıvanda Yeni Azərbaycan Partiyasının yaradılmasının 21-ci ildönümü qeyd edilib

22.11.2013 [09:07]

Yeni Azərbaycan Partiyası Şahbuz rayon təşkilatının yeni inzibati binası istifadəyə verilib
Yeni Azərbaycan Partiyasının (YAP) yaradılmasının 21-ci il dönümü tədbirləri ölkəmizin hər yerində olduğu kimi, Naxçıvan Muxtar Respublikasında da geniş qeyd edilir.
Naxçıvan Muxtar Respublikası Ali Məclisinin mətbuat xidmətindən AzərTAc-a bildiriblər ki, noyabrın 21-də Yeni Azərbaycan Partiyasının yaradılmasının 21-ci ildönümü partiyanın Şahbuz rayon təşkilatının yeni inzibati binasının istifadəyə verilməsi ilə qeyd olunub.
Binaya baxışdan sonra iclas zalında Yeni Azərbaycan Partiyasının 21-ci ildönümü münasibətilə tədbir keçirilib.
Ali Məclisin Sədri, Yeni Azərbaycan Partiyası Naxçıvan Muxtar Respublika təşkilatının sədri Vasif Talıbov Yeni Azərbaycan Partiyasının yaradılmasının 21-ci ildönümü və partiyanın Şahbuz rayon təşkilatının yeni inzibati binasının istifadəyə verilməsi münasibətilə tədbir iştirakçılarını təbrik edib, Ümummilli liderimiz Heydər Əliyevin “Yeni Azərbaycan Partiyası Azərbaycanda gedən ictimai-siyasi proseslərin içərisindən çıxan zərurətdir”, - fikrini xatırladaraq deyib: Ötən əsrin 90-cı illərinin əvvəllərində ölkəmizdə AXC-Müsavat cütlüyünün hakimiyyəti Azərbaycanın müstəqilliyini təhlükə altında qoyub, baş verən siyasi proseslər qarşıdurmaya və vətəndaş müharibəsinə gətirib çıxarıb.
Ali Məclisin Sədri deyib: “Yeni Azərbaycan Partiyası ölkəmizin siyasi həyatında gərgin proseslərin getdiyi bir dövrdə yaranmışdır. 1992-ci il oktyabrın 16-da Azərbaycanın tanınmış 91 ziyalısı “Səs” qəzeti vasitəsilə Ulu öndər Heydər Əliyevə “Azərbaycan Sizi gözləyir” adlı müraciət etmişdir. Müraciətdə dahi şəxsiyyətdən Azərbaycanı fəlakətdən qurtaracaq yeni bir siyasi təşkilatın yaradılmasına və ona rəhbərlik etməsinə razılıq vermək xahiş olunmuşdur. Ulu öndər Heydər Əliyev müraciətə cavabında bildirirdi: “Güman edirəm ki, müstəqil Azərbaycan dövlətinin gələcək həyatının və fəaliyyətinin əsasını təşkil edən demokratiya və plüralizm şəraitində sizin müraciətinizdə göstərilən Yeni Azərbaycan Partiyasının yaradılması obyektiv zərurətdən doğur. Belə partiya Azərbaycanın siyasi həyatında fəal iştirak edərək yeni, müstəqil Azərbaycan dövlətinin möhkəmləndirilməsində və inkişafında tarixi rol oynaya bilər. Əgər belə partiya yaradılarsa, onun fəaliyyətində fəal iştirak etməyə hazıram”.
Ulu öndərimizin bu cavabından sonra noyabrın 21-də Naxçıvan Dövlət Dram Teatrının binasında ölkəmizin müxtəlif bölgələrindən gələn 550-dən artıq ziyalının iştirakı ilə Yeni Azərbaycan Partiyasının təsis konfransı keçirilib. Bundan sonra Yeni Azərbaycan Partiyası qısa müddətdə formalaşdı və ölkəmizin digər bölgələrində, muxtar respublikada Yeni Azərbaycan Partiyasının rayon təşkilatlarının yaradılmasına başlanılıb. Yeni Azərbaycan Partiyası Şahbuz rayon təşkilatı da 1993-cü il martın 13-də Ümummilli liderimiz Heydər Əliyevin sədrliyi ilə keçirilən təsis konfransında yaradılıb”.
Ali Məclisin Sədri daha sonra Yeni Azərbaycan Partiyasının 21 illik fəaliyyətinə qısa nəzər salıb və ildönümü münasibətilə tədbir iştirakçılarını, Yeni Azərbaycan Partiyasının üzvlərini və təəssübkeşlərini təbrik edib.
Tədbirdə Yeni Azərbaycan Partiyası Naxçıvan Muxtar Respublika təşkilatının icra katibi Anar İbrahimov, partiyanın Şahbuz rayon təşkilatının sədri Rizvan Məmmədov çıxış edərək deyiblər ki, Yeni Azərbaycan Partiyası bu gün ölkə vətəndaşlarının siyasi istinad mənbəyidir və partiya üzvlərinin sıraları hər il genişlənir.

Paylaş:

Baxılıb: 2049 dəfə