“Sarkisyan başqa hiyləgərliyə əl atıb”

Bakı:

24 °C

61 %

4 m/s

Əlaqə

AZ RU EN

Ana səhifə / Siyasət / “Sarkisyan başqa hiyləgərliyə əl atıb”

“Sarkisyan başqa hiyləgərliyə əl atıb”

16.11.2013 [10:05]

“Prezidentlərin görüşü ərəfəsində Serj Sarkisyanın Dağlıq Qarabağa gələrək hərbi təlimlərdə iştirak etməsi ermənilərin növbəti hiyləgərliyidir və məqsəd Azərbaycanı danışıqlarda iştirak etməməyə sövq etməkdir”. Yeni Azərbaycan Partiyası (YAP) İcra katibinin müavini, deputat Mübariz Qurbanlı “Media forum” saytına açıqlamasında belə deyib.
YAP-ın İcra katibinin müavininin fikrincə, Azərbaycanın məqsədi Dağlıq Qarabağ münaqişəsinin danışıqlar yolu ilə həll edilməsi və sülhə nail olmaqdır: “ATƏT-in Minsk qrupu həmsədrlərinin çağırışlarına uyğun olaraq Ermənistan da sülh prosesində iştirak etməlidir. Əks halda ermənilər danışıqlar prosesindən çıxmış kimi görünər. Ermənistan hiyləgərlik edir, müxtəlif vasitələrlə oyunlar qurur və danışıqların nəticə verməməsinin günahını Azərbaycanın üstünə yığmağa çalışır. ATƏT-in Minsk qrupunun fəaliyyətindəki zəifliyə baxmayaraq Azərbaycan danışıqlar prosesində qalır və səmimi müzakirələr aparır, danışıqların beynəlxalq hüquqa uyğun aparılmasını istəyir, ərazi bütövlüyü və suverenlik haqqından geri çəkilmir. Çünki bu bizim haqqımızdır.
Ermənistan isə neçə ildir ki, özünü zahirən elə aparır ki, guya danışıqlarda nəyəsə nail olunmasını istəyir, amma arxada hiyləgərlik işlədir, danışıqları pozmaq üçün müxtəlif variantlardan istifadə edir. Bunu Ki-Vest, Rambuye danışıqlarında da gördük. Ermənistan prezidentinin qarın ağrısına düşüb müzakirələrdən qaçmasının da şahidi olmuşuq.
Minsk qrupunun həmsədrləri Azərbaycan və Ermənistan Prezidentlərinin görüşməsi üçün təklif verib. Belə bir vəziyyətdə Serj Sarkisyan görüşdən imtina edə bilməzdi. Çünki əlində hər hansı bəhanəsi yoxdur. Amma başqa hiyləgərliyə əl atıb və Dağlıq Qarabağa gələrək hərbi təlimlərdə iştirak edib, pafoslu çıxış söyləyib, danışıqların gedişinə, sülh prosesinə zərbə vuran fikirlər işlədib. Bunu ona görə edir ki, Azərbaycan narazı qalsın və belə hərəkətlərə görə Serj Sarkisyanla görüşməkdən imtina etsin. Son nəticədə isə günahı bizim üzərimizə atsınlar. Guya Azərbaycan danışıqlardan yayınır, sülh prosesindən çıxmaq istəyir, kompromisə getmir. Bu, ermənilərin növbəti hiyləgərliyidir”.
Mübariz Qurbanlı deyib ki, Azərbaycan diplomatiyası ermənilərin indiyədək olan hiyləgərliklərini ifşa edib və bu proses davam edir. Onun fikrincə, ermənilər rəsmi Bakının diplomatik gedişləri qarşısında acizdir: “Ona görə də Azərbaycan və Ermənistan prezidentlərinin görüşünün baş tutması, danışıqların davam etməsi Azərbaycanın taktikasına uyğundur. Prezident İlham Əliyev uzaqgörən gedişlərlə erməniləri hər zaman seytnota salıb və görüşə razılıq verməklə bu dəfə də ölkəmizin milli maraqlarına uyğun addım atıb. Azərbaycan görüşdən imtina etsə, erməni diplomatiyasının qurduğu hiyləgər oyunun iştirakçısı olardıq”.

Paylaş:

Baxılıb: 1071 dəfə