2015-ci ildə Bakıda təşkil olunacaq birinci Avropa Oyunlarına hazırlıq yüksək səviyyədə gedir

Bakı:

24 °C

70 %

4 m/s

Əlaqə

AZ RU EN

Ana səhifə / Siyasət / 2015-ci ildə Bakıda təşkil olunacaq birinci Avropa Oyunlarına hazırlıq yüksək səviyyədə gedir

2015-ci ildə Bakıda təşkil olunacaq birinci Avropa Oyunlarına hazırlıq yüksək səviyyədə gedir

30.10.2013 [09:43]

2015-ci ildə Bakıda təşkil olunacaq birinci Avropa Oyunlarına hazırlıq yüksək səviyyədə gedir.
AzərTAc xəbər verir ki, bu sözləri oktyabrın 29-da “Fairmont Baku” otelində 2015-ci ildə ilk dəfə Azərbaycanda təşkil olunacaq birinci Avropa Oyunlarına hazırlıqla bağlı keçirilən mətbuat konfransında Avropa Olimpiya Komitəsinin (AOK) prezidenti Patrik Hikke deyib.
P.Hikke ölkəmizdə yaradılan idman infrastrukturunu yüksək qiymətləndirib, Atletlər Kəndinin yüksək səviyyədə təşkil edildiyini diqqətə çatdırıb və mötəbər yarışa hazırlıqdan məmnunluqlarını ifadə edib.
Qonaq vurğulayıb ki, burada güclü və peşəkarlardan təşkil olunmuş komanda çalışır. Dövlətin idmana göstərdiyi qayğı isə bizi çox sevindirir. Azərbaycan dövlətinin başçısı İlham Əliyevin Milli Olimpiya Komitəsinin prezidenti olması burada idman siyasətinin düzgün istiqamətdə aparılmasından xəbər verir.
AOK-nın prezidenti görüləcək işlərə dair ciddi müzakirələrin aparıldığını diqqətə çatdırıb. Qeyd edib ki, Avropa Oyunlarına qalan 19 ay əslində çox az müddətdir. Amma biz peşəkarları cəlb etməklə qısa vaxt ərzində məqsədlərimizə nail olacağıq. Avropa Oyunlarına öz yanaşmamız olacaq. Bakının bu mötəbər yarışa təşkilatçılıq etməsi mühüm hadisədir.
Gənclər və idman naziri Azad Rəhimov ölkəmizdə idmana göstərilən dövlət qayğısından danışıb. O, idmançılarımızın qazandıqları nailiyyətləri yüksək qiymətləndirib.
Bildirib ki, iki gün ərzində Bakıda Avropa Olimpiya Komitəsinin İcraedici Komitəsinin növbəti iclası keçirilib. İclas çərçivəsində idman infrastrukturu, atletlərin məskunlaşması istiqamətində müzakirələr aparılıb. Komitənin üzvlərinə mövcud idman obyektləri nümayiş olunub, inşası davam edən infrastruktur barədə ətraflı məlumat verilib.
İşlərin plan üzrə davam etdiyini diqqətə çatdıran nazir infrastrukturun əksəriyyətinin 2014-cü ilin sonunda idmançıların ixtiyarına veriləcəyini diqqətə çatdırıb. Bildirib ki, yalnız Olimpiya stadionu və Su İdman Sarayının 2015-ci il fevralın 1-də istifadəyə verilməsi nəzərdə tutulub.
Nazir noyabrda AOK-un Romada təşkil olunacaq konqresində “Bakı 2015” ilə bağlı təqdimatın keçiriləcəyini bildirib. Qeyd edib ki, bununla əlaqədar hazırda Bakıda ölkəmizin turizm potensialını, mədəniyyətini və incəsənətini özündə əks etdirən videoçarxlar çəkilir. Növbəti təqdimatın isə Soçidə təşkil olunması nəzərdə tutulub.
Avropa Olimpiya Komitəsinin İcraedici Komitəsinin üzvü Spiros Kapralos yarışın başlanmasına az vaxt qaldığını, bu səbəbdən də hazırlığın sürətlə davam etdiyini bildirib. S.Kapralos sponsorluq və yarışın yayımlanması istiqamətində hazırlanmış proqramın müzakirə edildiyini vurğulayıb.
Birinci Avropa Oyunları 2015-ci il iyunun 12-dən 28-dək keçiriləcək. İlk Oyunlarda 19 növ üzrə 6 min 351 idmançı qüvvəsini sınayacaq. Bunlar kamandan oxatma (128 idmançı), su idman növləri (üzgüçülük, su polosu, suyatullanma - 1000), atletika (800), badminton (160), basketbol (3X3, 160 idmançı), boks (300), kanoe (350), velosiped (BMX, dağ velosipedi, şosse - 350), çimərlik futbolu (256), gimnastika (bədii gimnastika, idman gimnastikası, tamblinq və akrobatika - 406), cüdo (350), karate (96), atıcılıq (stend və güllə (350), stolüstü tennis (128), taekvondo (128), triatlon (125), voleybol (zal və çimərlik - 464), güləş (450) və qılıncoynatma (300) növləridir.
İdman növlərindən yalnız kanoe Bakıdan kənarda - Mingəçevirdəki “Kür” Təlim-Tədris İdman Mərkəzində təşkil olunacaq.

Paylaş:

Baxılıb: 1098 dəfə