Üçüncü Bakı Beynəlxalq kitab sərgi – yarmarkası çərçivəsində “Heydər Əliyevin elmi irsi” kitabının təqdimatı olub

Bakı:

23 °C

46 %

4 m/s

AZ RU EN

Ana səhifə / Siyasət / Üçüncü Bakı Beynəlxalq kitab sərgi – yarmarkası çərçivəsində “Heydər Əliyevin elmi irsi” kitabının təqdimatı olub

Üçüncü Bakı Beynəlxalq kitab sərgi – yarmarkası çərçivəsində “Heydər Əliyevin elmi irsi” kitabının təqdimatı olub

24.09.2013 [09:32]

Sentyabrın 23-də Mədəniyyət və Turizm Nazirliyinin təşkilatçılığı ilə keçirilən və Ümummilli lider Heydər Əliyevin 90 illik yubileyinə həsr edilmiş III Bakı Beynəlxalq kitab sərgi-yarmarkası çərçivəsində Yeni Azərbaycan Partiyası Səbail rayon təşkilatının sədri, professor Zahid Qaralovun “Heydər Əliyevin elmi irsi” ikicildliyinin təqdimatı olub.
AzərTAc xəbər verir ki, “Şərq-Qərb” nəşriyyatı direktorunun müavini Rafiq Kazımov Ulu öndərin xatirəsinə həsr olunmuş kitabın məziyyətindən söz açıb. Bildirib ki, professor Z.Qaralovun bu dəyərli əsəri Azərbaycan xalqının Ümummilli lideri Heydər Əliyevin 90 illik yubileyinə sanballı töhfədir. R.Kazımov kitabda Heydər Əliyev siyasətinin fəlsəfi mahiyyətini, elmi-nəzəri əhəmiyyətini xüsusi vurğulayıb.
Kitabın müəllifi, professor Zahid Qaralov Ümummilli lider Heydər Əliyevin əvəzsiz şəxsiyyət olmasından, respublikamızın inkişafında və dünyada tanınmasında, inkişafın Azərbaycan modelinin yaradılmasında Ulu öndərin əvəzsiz rolundan danışıb. O, eyni zamanda, Azərbaycan milli dövlətçiliyinin formalaşmasında, onun suverenliyi, ərazi bütövlüyü, dünya birliyinə inteqrasiyası, ölkənin iqtisadi inkişafı sahəsində cari və uzunmüddətli layihələrin işlənib hazırlanmasında və həyata keçirilməsində dahi şəxsiyyət Heydər Əliyevin misilsiz xidmətlərini qeyd edib.
Alim bildirib ki, “Heydər Əliyevin elmi irsi” kitabı 1969-cu ildən bəri topladığı materiallar əsasında, son bir ildə tərtib olunub. Kitabı fərqləndirən cəhət ondan ibarətdir ki, burada Azərbaycanın yeni tarixində baş vermiş siyasi hadisə və proseslərə sadəcə olaraq xronoloji ardıcıllıqla deyil, elmi nöqteyi-nəzərdən yanaşılıb. Kitab Ümummilli lider Heydər Əliyevin yalnız elmi irsinin deyil, həmçinin Onun mənəvi, əxlaqi və dövlətçilik irsinin də öyrənilməsi baxımından əhəmiyyətli mənbədir. Əsərdə Ulu öndərin elmi irsi on beş istiqamət üzrə araşdırılıb.
Zahid Qaralov qeyd edib ki, son on ildə ölkədə həyata keçirilmiş islahatlar da kitabda əksini tapıb. Ulu öndərin siyasi kursunun məqsədyönlü şəkildə həyata keçirilməsinin nəticəsidir ki, bu gün Azərbaycan dünyanın ən dinamik inkişaf edən dövlətinə çevrilib. Ümummilli lider Heydər Əliyev siyasəti Azərbaycanı daha xoşbəxt gələcəyə aparır və buna görə də xalq daim Onun xatirəsini ehtiramla yad edəcək. Ziyalılarımız və elm adamlarımız Ulu öndərin irsini bundan sonra da araşdıracaq, yeni dəyərli əsərlər yaradacaqlar.
Müəllif qeyd edib ki, Ulu öndərin özünəməxsus iş üslubu, bilik və bacarığı, psixologiyası, hadisələrə yanaşma tərzi var idi. Onun yaradıcı təfəkkürünü təhlil edib elmi nəticələr əldə etmək mümkündür. Ümummilli lider Heydər Əliyev çox yüksək səviyyəli humanizmə, mənəvi keyfiyyətlərə malik bir dövlət xadimi idi. Onun heç vaxt şəxsi marağı olmayıb. Ömrü boyu ictimai və dövlət maraqlarının müdafiəsində dayanıb, xalqın mənafeyini qoruyub. Bütün bunlar dahi şəxsiyyət Heydər Əliyevin bəşəri ideyalara, insanlığa xidmət etdiyi üçün əbədiyaşardır və xalqın xatirəsində daim müdrik şəxsiyyət kimi qalacaq.

Paylaş:

Baxılıb: 1009 dəfə