Dövlət siyasətinin mühüm istiqamətlərindən biri

Bakı:

17 °C

88 %

2 m/s

Əlaqə

AZ RU EN

Ana səhifə / Siyasət / Dövlət siyasətinin mühüm istiqamətlərindən biri - dinlərarası dialoq

Dövlət siyasətinin mühüm istiqamətlərindən biri - dinlərarası dialoq

07.01.2025 [09:41]

Yüksək tolerantlıq mühitinə malik olan Azərbaycanda etiqad azadlığı təmin edilir, insanların inanclarına dərin hörmətlə yanaşılır. Ölkəmizdə hər il müqəddəs Milad bayramının qeyd olunması da bunun əyani təsdiqidir. Hər zaman dünyaya multikulturalizm çağırışları edən Prezident İlham Əliyev bu müqəddəs bayram münasibətilə pravoslav xristian icmasına təbrik məktubu ünvanlayıb. Azərbaycanın bütün xristian icmasına xoş arzularını çatdıran dövlətimizin başçısı təbrik məktubunda ölkəmizin nümunəvi multikultural mühitinə diqqət çəkib.

Azərbaycanın nümunəvi tolerantlıq mühiti

Yaşıl çəmənlər rəngarəng çiçəkləri ilə cəlbedici olduğu kimi, dünya da xalqların müxtəlif adət-ənənələri, inancları, fəqli məişət tərzləri, həyata baxışları ilə gözəldir. Bu rəngarəngliyi qorumaq və gələcək nəsillərə ötürmək lazımdır. Dünyanın hansı nöqtəsində yaşamasından asılı olmayaraq hər bir xalqa, hər bir icmaya özünün inanclarını davam etdirməsinə şərait yaradılmalıdır. Lakin təəssüf doğuran haldır ki, hazırda dünyamızın mənzərəsi məhz bu cəhətdən ciddi narahatlıq doğurur. Bəşəriyyətin yüksək inkişaf səviyyəsinə çatdığı XXI əsrdə sayrı-ayrı ölkələrdə dini-mədəni müxtəlifliyə dözümsüz yanaşmalar getdikcə atır.

Dünyadakı belə kədərli mənzərə fonunda Azərbaycan tolerantlıq baxımından nümunəvi bir məkan kimi diqqət mərkəzinə gəlir. Hazırda dünyada İlham Əliyev kimi tolerantlıq ideyalarının qorunub saxlanılmasına və daha da zənginləşdirilməsinə səmimi şəkildə çağırışlar edən liderlərin sayı elə də çox deyil. Ölkəmizin hər cəhətdən nümunəvi olan multikultural mühitinə diqqət çəkən Prezident İlham Əliyev “Azərbaycanda əsrlərdən bəri xristian dininin mənsubları digər xalqların və konfessiyaların nümayəndələri ilə birgə mehriban dostluq, sülh və əmin-amanlıq mühitində yaşayırlar. Ölkəmizdə etnik-mədəni müxtəlifliyin və zəngin tolerantlıq ənənələrinin qorunub saxlanılması, mədəniyyətlərarası və dinlərarası dialoqun inkişafına qlobal miqyasda dəstək göstərilməsi apardığımız siyasətin başlıca istiqamətlərindəndir”, - deyə vurğulayıb.

Hər kəs eyni hüquq və azadlıqlara malikdir

Azərbaycan çoxkonfessiyalı cəmiyyətə malikdir. Ölkəmizdə əhalinin böyük əksəriyyəti müqəddəs İslam dininə etiqad bəsləyir. Eyni zamanda, respublikamızda digər dinlərə də böyük hörmət bəslənilir. Azərbaycanda multikulturalizm tarixdən gələn bir ənənədir və bu gün də qorunub saxlanılır. Prezident İlham Əliyevin bildirdiyi kimi, nümunəvi mültikulturalizm məkanı kimi tanınan Azərbaycanda dilindən, dinindən, etnik mənsubiyyətindən asılı olmayaraq, hər kəs eyni hüquq və azadlıqlara malikdir.

O cümlədən xristian həmvətənlərimiz də inanclarına uyğun ayin və mərasimləri sərbəst şəkildə həyata keçirməklə öz adət-ənənələrini layiqincə yaşadırlar. Pravoslav xristian icmasının hər il yanvarın 7-də ənənəvi olaraq Milad bayramını təntənəli şəkildə qeyd etməsi bunun daha bir təsdiqidir. Milad bayramı yanvarın 6-dan başlayır. Pravoslavlara görə bu, 40 günlük orucun son günüdür. Milad orucu 12 yağsız yeməyin düzüldüyü və onların hər birindən dadılması zəruri sayılan şam süfrəsi ilə bitir: yanvarın 7-də bütün məhdudiyyətlər aradan qaldırılır və artıq əsl bayram ziyafəti təşkil etmək olar.

Mübariz FEYİZLİ

Paylaş:

Baxılıb: 714 dəfə