Heydər Əliyev
yeni azerbaycan logo

Ana səhifə / Müsahibə / "Azərbaycan qadınları çox şanslıdır"

"Azərbaycan qadınları çox şanslıdır"

02.12.2022 [12:10]

Müsahibimiz  "Medical Media" şirkətinin direktoru,  Azərbaycanda Qadın Sahibkarlığının İnkişafı Assosiasiyanın üzvü, fəal ictimaiyyətçi Günay Kazımova fəaliyyəti ilə gənc xanımlar üçün həm motivasiya, həm də nümunədir.  Müsahibimizin qadın inkişafı, Zəfər tariximiz, sahibkar qadınlara dövlətin dəstəyi,  keşməkeşli zamanda gənclərin  yalnız müsbət dəyərlərə sahiblənməsi və  bir sıra digər suallarımızla bağlı   cavabları kifayət qədər maraqlıdır. 

- Günay xanım siz işgüzar fəaliyyətinizlə seçilən,  fəal ictimaiyyətçisiniz. Vətən müharibəsi zamanı işgüzar xanımların, onların fəaliyyəti, cəbhəyə qatqısı...  Öncə istərdik, bu barədə fikirlərinizi eşidək. 

 - Etiraf edək  ki, böyük Qələbəyə qədər içimizdə bir kövrəklik hissi vardı, torpaqlarımız işğalda olduğu, rayonlarımız talan olunduğu, məcburi köçkünlərimiz öz doğma yurd-yuvalarından didərgin düşdüyü, minlərlə şəhidlər verdiyimiz üçün içimizdə bir qüssə, kədər hissi vardı. 

Amma bu gün əksinədir.   Hətta Qarabağı görməyən, orda doğulmayan  gənclərimizin müharibə zamanı yüksək əhval-ruhiyyəsini gördük. Gənclərin könüllü müharibəyə yazılmaqlarının şahidi olduq. Bu  göstərici o deməkdir ki, vətənpərvərlik ruhunda bir gənclik yetişib. Bu gənclər Zəfəri əldə etməyimiz üçün əsas qüvvə oldu. Vətən anlayışı, vətənpərvərlik ideologiyası nəinki gənclərimizi, bütün vətəndaşlarımızı öz ətrafında birləşdirdi. Eynilə də Azərbaycan qadını  müharibədə öz missiyasını, məncə layiqincə yerinə yetirdi. Həmin ağır günlərdə müxtəlif strukturların idarəedici funksiyalarında fəaliyyət göstərən xanımların, sahibkar qadınların hər birinin Vətən, Torpaq naminə bacardığı töhfəni verdiyinin şahidi olduq. Hətta,  bir çox qadınların kiçik biznesindən gələn bütün gəlirlərini 44 günlük Vətən müharibəsi zamanı  əsgərlərimizə göndərdiklərini də müşahidə etdik. Əlbəttə, dövlətimizin Ordu, müharibə üçün bütün təminatı vardı.  Amma bu bir könüllülük prinsipi, bir olmaq istəyi, əsgərlərimizin yanında olmaq arzusu idi. Üzvü olduğum Azərbaycanda Qadın Sahibkarlığının İnkişafı Assosiasiyanın həmin dönəmdəki fəaliyyəti bütün cəmiyyətə bəllidir. Sahibkar xanım olaraq biz hamımız AQSİA çətiri altında toplandıq. Həmin dönəmdə pandemiya şəraitində yaşayırdıq. Təbii, heç də asan deyildi. Müharibədən gələn şəhid xəbərləri, sağlamlığını itirən  qazilərimiz, pandemiyadan əziyyət çəkən insanlarımız... Bu həssas dönəmdə ehtiyac hiss edən vətəndaşlarımızın yanında olmağa çalışdıq. Bu bizim həm insanlıq borcumuz , həm də  vətəndaşlıq məsuliyyətimiz idi. Zənnimcə, bu kimi aksiyaların mənəvi çəkisi daha ağır,  motivasiya mənbəyi idi. Təbii ki, direktoru olduğum   Medical Media və Saffarma əczaçılıq şirkəti olaraq bu könüllülük aksiyalarından kənarda qalmadıq.  Həm əczaçı, həm media qurumu olaraq  44 günlük müharibədə daim dövlətimizin, Ordumuzun yanında, ön cəbhədə olduq, bacardığımız  dəstəyi göstərdik: dərman pereparatları, qida məhsulları, üst geyimləri və s.  Media Medical və Saffarma Əczaçılıq şirkətinin təsisçisi başda olmaqla, biz komanda olaraq həmin günlərdə vətəndaşlıq borcumuzu yerinə yetirməyə var gücümüzlə  çalışdıq.  

-  Azərbaycanın Zəfərdən öncəki və sonrakı tarixini siz necə izah edərdiniz? 

-  İkinci Qarabağ Müharibəsi bizi bir daha  dünyaya qalib xalq kimi tanıtdı. Bu gün doğrudan da,   hər bir Azərbaycan vətəndaşı  ölkə xaricində özünü daha qürurlu, daha məğrur,  qalib bir xalqın nümayəndəsi kimi hiss edir.   Öncəki illərlə müqayisəyə gəldikdə, mənə elə gəlir ki, bu gün müşahidə edilən    "insanlarımızın birliyi, bütövlüyü"  qürurvericidir.  Ən böyük fərq isə Azərbaycanın ərazisinin bütövlüyünün təmin olunması, həsrətlə işğaldan azad olunmasını gözlədiyimiz müqəddəs torpaqlarımıza ayaq basa bilməyimizdir. Şuşa bizim üçün müqəddəs bir məkandır.  Şuşa ili çərçivəsində Şuşada, Azərbaycanın bütün bölgələrində, dünyanın müxtəlif ölkələrində o qədər tədbirlər keçirilir ki,..  Bu gün xarici ölkələrin, beynəlxalq təşkilatların nümayəndələri Şuşaya səfər edirlər. Azərbaycanın dilbər guşəsinin gözəlliyini və bu torpaqların Azərbaycana məxsus olduğunun şahidi olurlar. Qarabağın, Şuşanın bizim əzəli torpaqlarımız olduğunu dünüyaya sübut və təsdiq etməkdən daha böyük nə ola bilər ki? Bu fərqlər hamımızı sevindirir, bugünkü və gələcək nəsillər üçünsə bir xoşbəxtlikdir.  Əlbəttə,  Ali Baş Komandanın  yürütdüyü siyasət nəticəsində  xalqımızın, dövlətimizin birliyi, qələbəsi təmin olundu. Bu uğurları, fərqləri görməmək, qürurlanmamaq  mümkün deyil. Ulu öndər Heydər Əliyevin sözləri ilə ifadə etsək, bu gün biz gerçəkdən  fəxr edirik ki,  azərbaycanlıyıq. 

- Qarabağda imkan yaransa, hansı işləri görmək istəyərsiniz?

-  Mən ixtisasca həkiməm. Bəlkə də buna görə, Qarabağda imkan yaranarsa, ilk tibbi məntəqələrin yaranmasında, səhiyyə ocaqlarının qurulmasında yer almaq istərdim. Bu mənim ən böyük arzularımdandır. Eyni zamanda Media Agentliyi olaraq Qarabağda media qurumu yaratmağı və Qarabağa media dəstəyi ilə xidmət göstərməyə də hazırıq. 

- Dediniz ki,  ixtisasca həkimsiniz. Amma fərqli sahədə çalışırsınız... 

- Doğru,  mən Azərbaycan Tibb Universitetinin məzunuyam. Amma həkim kimi heç çalışmadım.  Tibb Universitetini bitirdiyim gündən əczaçılıq sahəsində işləməyə başladım. Əslində arzum həkim olmaq idi. Amma həyat mənə  seçimimi  dəyişdirəcək istiqamətə apardı.  Beləcə, öncə əczaçılıq sahəsinə gəldim, sonra isə pandemiya dönəmi bizi media sahəsinə gətirib çıxartdı. Covid 19 pandemiyası zamanı düşündük ki, insanların mövcud durumda maarifləndirilməsinə, sağlam informasiya ilə təmin olunmasına ehtiyac var. Bu düşüncə ilə yeni yola çıxdıq.  "Medical Media"nı yaratdıq   və biz YouTube üzərindən onlayn şəkildə fəaliyyətə başladıq. Fəaliyyətimiz bizi   Səhiyyə televiziyasının yaradılmasına qədər gətirdi.  

- Niyə məhz Səhiyyə televiziyası?

-  Bilirsiniz,  hər bir televiziyada fərqli-fərqli tibbi proqramlar yayımlanır. Bilirsiniz ki, bu proqramların əksəriyyəti reklam xarakterlidir.  Amma biz  düşündük ki, insanlarımızı, xalqımızı tibbi istiqamətdə, əczaçılıqla bağlı, dərmanlarla bağlı planlı, ardıcıl, kompleks şəkildə  maarifləndirməyə ehtiyac var.  Niyyətimiz insanların sağlamlığına, səhiyyənin inkişafına dəstək olmaqdır.  Onu da qeyd etmək istərdim ki, Səhiyyə TV-nin kifayət qədər tibbi proqramları var. Hətta  layihələrimizdən birində dünyada olan azərbaycanlı həkimləri bir araya toplamışıq və onlarla davamlı canlı proqramlarımız olur. Həmin proqramlarda soydaşlarımızı həm xalqımıza təqdim edirik, həm də onların vasitəsilə dünya səhiyyəsində baş verən yenilikləri insanlarımıza çatdırırıq. Eyni zamanda insanlarımızın sağlamlıqla bağlı sualları müxtəlif ölkələrdə yaşayan azərbaycanlı həkimlərimiz tərəfindən cavablandırıllr.    Məqsədimiz  ixtisaslaşmış tibbi jurnalistikanın əsasını qoymaqdır. Bu yolda inamla irəliləyirik. Hədəflərimiz böyükdür, Hələ ki, Azərbaycanda, gələcəkdə isə beynəlxalq aləmdə tanınmaqda iddialıyıq. Onu da deyim ki,  bu gün dünyada  olan azərbaycanlı həkimləri Səhiyyə TV-yə cəlb etməklə (onların arasında   məşhur həkimlər,  ən müasir yeniliklərə imza atan institut rəhbərləri də var)   həm də bu vasitə ilə   Azərbaycan səhiyyəsini, öz tibbimizi dünyaya tanıdırıq. 

- Sizcə, qadınlarımız indi sosial həyatda necə rol oynayır?

- Baxır kim onu necə istifadə edir, bu çox önəmlidir. Elə insanlar var ki, sadəcə şou xatirinə gündəmdə qalmaq istəyir. Amma mən Azərbaycan qadınını sosial cəmiyyətdə olmağını dəstəkləyirəm.  Bu gün sosial şəbəkələrdə nə qədər maarifləndirici tədbirlər keçirilir, nə qədər online konfranslar olur. Əksər hallarda  sosial şəbəkələrdən məlumatlar əldə edirik. Bu çox ciddi maarifləndirmə vasitəsidir.    Bu gün imkanı olan da, olmayan da, evdar qadınlar belə sosial şəbəkə vasitəsilə nəsə öyrənə bilər. Amma önəmli olan odur ki,  nə öyrənmək istəyirik, seçimimiz nədir?  Bu baxımdan   doğru istiqamətdə sosiallaşmaq bütün cəmiyyət üçün , eləcə də xanımlar üçün faydalı olar. Sosial mediada nə qədər müsbət nümunələr görəriksə, bir o qədər müsbət nəticələr olar, deyə düşünürəm. 

 - Sosial mediada müsbət nümunələr deyərkən, hansı üstünlükləri nəzərdə tutursunuz?

 - Bilirsiniz ki, qloballaşma, müasir dünya düzəni verdiyi üstünlüklərlə bərabər müəyyən arzuolunmaz hallar da yaradır. Məni qayğılandıran məqam  mənəvi dəyərlərimizə, bizi biz edən dəyərlərimizə yeni nəsillərin yanaşmasıdır. Düşünürəm ki, biz dəyərlərimizi qorumağa, bizə çatdırıldığı kimi, biz də onları gələcək nəsillərə ötürməyə    borcluyuq. Bu mənə görə həssas və diqqət tələb edən məsələdir. Sosial şəbəkələr həyatımızın ayrılmaz hissəsinə çevrilib. Bütün uşaqlar, yeniyetmələr sosial media istifadəçiləridir. Bu baxımdan hesab edirəm ki, sosial media hesablarında övladlarımızı ruhlandıracaq, onlarda vətənə-millətə sevgi oyadacaq, azərbaycançılıq ideologiyasına xidmət edəcək nümunələr, paylaşımlar üstünlük təşkil etməlidir. Əvvəllər tək  televiziyalar   nüfuzetmə xüsusiliyi ilə seçilirdi. İndi  yeniyetmələrin, gənclərin fikirlərinin formalaşmasında   sosial şəbəkələr də ciddi təsir mexanizmidir. Məncə, gələcəyimiz naminə bu məsələni  kifayət qədər ciddiyə almalıyıq. 

 - Sizcə sahibkar xanımlar göstərilən dövlət dəstəyindən yetərli faydalana bilirmi?

- Azərbaycanda Qadın  Sahibkarlığının  İnkişafı Assosiasiyasının dövlət qurumları tərəfindən dəstəklənməsi, bu istiqamətdə həya keçirilən müxtəlif  layihələr sahibkar qadınlara ciddi təkandır.   Dövlət qurumları ilə  əlaqələrin yaradılması, qarşıya çıxan  çətinliklərin, qayğıların aradan qaldırılması  sahibkarlara diqqətin göstəricisidir. Həmçinin Assosiasiya tərəfindən gerçəkləşdirilən çoxsaylı maarifləndirmə proqramları gənc və iş qurmaq istəyən xanımlar üçün  mayakdır.   Açığını deyim ki, bu gün iş qurmaq istəyən bir xanım üçün heç bir problem yoxdur. Sadəcə zəhmət çəkmək və məqsədə doğru addımlamaq lazımdır.  Yeri gəlmişkən, gələcəkdə tibblə bağlı özəl bir təhsil mərkəzi yaratmağı düşünürəm. Həmin məktəbdə  tibbin satış və marketinqi təlimlərini keçmək, tibb sahəsində satış və marketinq mütəxəssisləri yetişdirmək istərdim. Məncə,  bu sahədə mütəxəssislərə  böyük ehtiyac var.

  Bizim özümüzü inkişaf etdirmək, fəaliyyətimizi genişləndirmək, qurmaq-yaratmaq üçün  Birinci vitse-prezident Mehriban Əliyeva kimi nümunəmiz, örnəyimiz, ilham mənbəyimiz var.  Bu gün Azərbaycan qadını dünyaya Mehriban Əliyeva kimi mütərəqqi bir xanımın simasında təqdim olunur. Bu baxımdan Azərbaycan qadınları çox şanslıdır.  Qarşımızda bu qədər güclü bir xanımın nümunəsi varkən, biz qadınların  inkişaf etməməyə haqqı varmı?

- İndi cəmiyyətdə qayğılar sanki  daha çox qadınların üzərinə yüklənib...

 - Bu fikirlə tam razı deyiləm...  20 ildir ki, işgüzar fəaliyyətlə məşğulam. Hərdən mənə sual verirlər ki, siz bu qədər işi necə çatdırırsız? İnsan işini, zamanını, planını doğru şəkildə böldükdə, məncə ailəyə də, övlada da vaxt ayıra bilir və hər bir qadın qayğını üzərinə çəkməyi bacarır. Bu fədakarlıq bütün Azərbaycan qadınlarına məxsusdur.   Həmişə  qadın və kişi hüquqlarının bərabərliyi müzakirə mövzusu olurdu,  tez-tez qadın azadlığı ilə bağlı fikirlərə rast gəlirdik.  Məncə bu gün artıq qadın azaddır, işləyir, inkişaf edir,  ailəsinə dəstək olur,  bacarıqlarını üzə çıxarır. Bu çox gözəl tendensiyadır. Bu tendensiya alqışlanmalı və davam etdirilməlidir.

Paylaş:
Baxılıb: 326 dəfə

Xəbər lenti

Hamısına bax

Xəbər lenti

Xəbər lenti

Neft ucuzlaşıb

30 Yanvar 09:45

Arxiv
B Be Ça Ç Ca C Ş
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31