Opera və Balet Teatrı üçün Hacı Zeynalabdin Tağıyev niyə mərcə girmişdi?

Bakı:

14 °C

67 %

3 m/s

Əlaqə

AZ RU EN

Ana səhifə / Mədəniyyət / Opera və Balet Teatrı üçün Hacı Zeynalabdin Tağıyev niyə mərcə girmişdi?

Opera və Balet Teatrı üçün Hacı Zeynalabdin Tağıyev niyə mərcə girmişdi?

28.09.2023 [12:28]

M.BAYRAMLI

Bu gün sizinlə paytaxt Bakımızın memarlıq incilərindən olan Azərbaycan Dövlət Akademik Opera və Balet Teatrına virtual səyahət edəcəyik. Bura Azərbaycanın ən böyük musiqili teatrdır. Bu günlərdə mədəniyyət ocağında cari təmir işləri aparılır. Buna baxmayaraq, qapıları yeni teatr mövsümündə də operasevərlərin üzünə taybatay açıqdır.

Bəlkə, bir qədər tarixin dərin qatlarına yol alaq? 1910-cu ilin sonlarında Bakı milyonçusu Danil Mayılov Rusiyadan Bakıya gəlmiş məşhur opera müğənnisi ilə söhbətləşir. Söhbət əsnasında belə böyük şəhərdə opera binasının olmaması faktı Mayılova bərk təsir edir. Cəmi bir il ərzində opera teatrını tikməyə qərar verir. Gələcək teatr binası üçün Qubernski – Torqovı (indiki Nizami) küçəsində yer alınır və tikinti başlayır. Bu cür təşəbbüsləri həmişə alqışlayan Hacı Zeynalabdin Tağıyev belə bir binanın bir ilə tikilməsinin mümkünsüz olduğunu deyir. Mərc gəlirlər ki, əgər opera teatrı vaxtında hazır olsa, onun bütün xərclərini Tağıyev özü çəkəcək. Belə də olur. Qotik üslubda bina vaxtından öncə – 1911-ci il fevralın 28-də təhvil verilir. Cəmi on ay ərzində memar N.Q.Bayevin layihələşdirdiyi teatr binası hazır olur.

Azərbaycan Opera və Balet Teatrı 1920-ci ildən bu günədək bu yaraşıqlı binada fəaliyyət göstərir. 1928-ci ildə teatra M.F.Axundovun adı verilir. Bu sənət məbədi 1959-cu ildən Akademik Opera və Balet Teatrı adlanır.

Teatrın repertuarı ənənəvi klassik opera formasında yazılmış "Şahsənəm" "Nərgiz" və "Koroğlu" operaları ilə zəngin olub. 1940-cı ildə ilk milli Azərbaycan baleti - "Qız qalası" (E.Bədəlbəyli), "Vətən" (1945, Q.Qarayev və C.Hacıyev), "Xosrov və Şirin" (1942, Niyazi) "Nizami" (1948, E.Bədəlbəyli) operaları məhz burada tamaşaya qoyulub.

Müxtəlif dövrlərdə teatrın səhnəsində bir çox dünya şöhrətli sənətkarlar – Fyodr Şalyapin, Leonid Sobinov, Valeri Barsov, İrina Arxipova, Yelena Obraztsova, Mariya Bieşu, Maya Plisetskaya, Vyaçeslav Qordeyev, Zurab Sotkilava, Vladislav Pyavko, Monserrat Kabalye, Anastasiya Voloçkova, Svetlana Zaxarova və başqaları çıxış ediblər.

Bu gün də görkəmli səhnə ulduzlarının iştirakı ilə dünya baletinin məşhur nümunələri teatrda nümayiş etdirilir. Hazırda Azərbaycan Dövlət Akademik Opera və Balet Teatrı paytaxtımızın aparıcı sənət ocaqlarındandır. Repertuarında milli, klassik opera və balet sənətinin dəyərli nümunələri yer alır. Teatrda opera truppası, simfonik orkestr, balet truppası və xor kollektivi fəaliyyət göstərir. Teatrın binasında dəfələrlə bərpa işləri aparılıb. Sonuncu əsaslı bərpa işləri 1985-ci ildə yanğından sonra həyata keçirilib. Sonrakı illərdə də binada cari təmir işləri gerçəkləşdirilib.

Paylaş:

Baxılıb: 918 dəfə