Musa Urudun "Uruda iki səfər" kitabının təqdimatı keçirilib

Bakı:

27 °C

52 %

7 m/s

Əlaqə

AZ RU EN

Ana səhifə / Mədəniyyət / Musa Urudun "Uruda iki səfər" kitabının təqdimatı keçirilib

Musa Urudun "Uruda iki səfər" kitabının təqdimatı keçirilib

22.04.2011 [09:29]

Dünən Azərbaycan Yazıçılar Birliyinin (AYB) Natəvan klubunda millət vəkili, şair Musa Urudun Qarabağ problemindən bəhs edən “Uruda iki səfər” adlı kitabının təqdimatı keçirilib. AYB-nin gənclər üzrə katibi Rəşad Məcid tədbiri giriş sözü ilə açaraq günümüzün ədəbi tələblərindən danışıb. Onun sözlərinə görə, bir neçə əsrdir ki, xalqımızın baş bəlasına çevrilən erməni təcavüzü və vandalizminin bədii ədəbiyyatda öz əksini tapması çox vacib bir məsələdir.
Rəşad Məcid deyib ki, bununla bağlı bəzi əsərlər işıq üzü görsə də, reallığı və tarixi faktları əks etdirən, bütün həqiqəti çılpaqlığı ilə ortaya qoyan əsərlərin sayı azdır. Belə əsərlərdən biri də Musa Urudun “Uruda iki səfər” əsəridir.
Tədbirdə çıxış edən millət vəkilləri Məlahət İbrahimqızı, Azay Quliyev və başqaları əsərin məhz bu məziyyətlərinə diqqət çəkiblər. Onlar vurğulayıblar ki, hər bir yaranan ədəbiyyat nümunəsi həm də ekran əsəri üçün mövzu olur. Bu mənada Musa Urudun “Uruda iki səfər” əsərinin ekranlaşdırılması çox vacibdir.
“Yeni Azərbaycan” qəzetinin baş redaktoru Hikmət Babaoğlu da çıxışında Musa Urudun poeziyaya gəlişini xatırlayıb və söyləyib ki, bu gəliş ritorikasız, hay-küysüz olub: “Onun ötən əsrin 90-cı illərində siyasətə gəlişi də ədəbiyyata gəlişi kimi hay-küysüz olub. Amma Musa Urudun istər poeziyada, istərsə də siyasətdə öz çəkisi var”.
“Uruda iki səfər” kitabı haqqında danışan Hikmət Babaoğlu haqlı olaraq əsəri Azərbaycanın qədim torpaqları haqqında tarixi sənəd kimi dəyərləndirib: “Musa Urud Ukraynanın Saki şəhərinə xitabən yazdığı şeirdə deyir:
Sən itin dilini öyrəndin,
Qurdun dilini öyrənmədin
Mən hesab edirəm ki, bu böyük mənada tarixi yaddaşa söykənən bir giley idi. Eyni zamanda, bizə tarixi istiqamət verirdi. Krımdan tutmuş Şəkiyə qədər toponimlərimizin eyniliyi və onların arasındakı mənəvi və tarixi bağlılıq tarixi kimliyimizdən, həmçinin, bəşər tarixindəki yerimizdən xəbər verir. Bu mənada Musa Urudun “Uruda iki səfər” əsəri tarixi oçerk kimi bu tarixi bağlılığı özündə əks etdirir, oxucuya həqiqətlərimizi çatdırmaqla yanaşı, bir insanın yaşantıları timsalında böyük bir xalqın yaşadığı faciələri açıb danışır. Musa müəllimin əsərlərində Yusif Vəzir çəmənzəminlinin romanları içərisindəki tarixi istiqaməti görməmək mümkün deyil. Tariximizin əsərlərə köçməsi bu günümüz və gələcəyimiz üçün çox vacibdir və mən hesab edirəm ki, Musa Urudun bu əsəri günün reallığına cavab verən bir əsərdir”.
Daha sonra şair-tərcüməçi Səlim Babullaoğlu, tənqidçi Vaqif Yusifli və digərləri danışaraq əsərin tarixi məziyyətlərini açıqlayıblar. Tədbir iştirakçıları onu da vurğulayıblar ki, Musa Urudun “Uruda iki səfər” əsəri kino xadimlərimizin də diqqətini çəkəcək XX əsrin Qarabağ savaşı tarixində yaranmış ən real əsərdir.
Qeyd edək ki, Ermənistan-Azərbaycan-Dağlıq Qarabağ münaqişəsi nəticəsində doğma yurdundan didərgin düşən sadə insanların vətən həsrətindən bəhs edən “Uruda iki səfər” kitabı üç dildə - Azərbaycan, ingilis və fransız dillərində nəşr edilib.
İki hissədən ibarət olan kitabda Zəngəzur mahalından və qədim yurdumuz İrəvandan söhbət açılır. Ermənistanın işğalı altında olan torpaqlarımıza yolçuluq zamanı müəllifin keçirdiyi hisslər, görüşdüyü insanlar və nəhayət ata ocağına sahib çıxmış sadə erməni qocası ilə görüşündən bəhs edilir. Həyata göz açdığı yurddan, doğma torpağından qoparılmış müəllifin ağrı-acısı çox böyük bəşəri bir duyğunu ifadə edir-insan heç bir halda və heç bir zaman diskriminasiyaya məruz qalmamalı, deportasiya olunmamalı, insan insanı qətlə yetirməməlidir.
KƏBUTƏR

Paylaş:

Baxılıb: 1506 dəfə