Bakıda İslam Mətbəxi Beynəlxalq Kulinariya Festivalının təntənəli açılış mərasimi keçirilib

Bakı:

12 °C

82 %

0 m/s

Əlaqə

AZ RU EN

Ana səhifə / Mədəniyyət / Bakıda İslam Mətbəxi Beynəlxalq Kulinariya Festivalının təntənəli açılış mərasimi keçirilib

Bakıda İslam Mətbəxi Beynəlxalq Kulinariya Festivalının təntənəli açılış mərasimi keçirilib

07.10.2009 [10:13]

Dünən Bakıda İslam Mətbəxi Beynəlxalq Kulinariya Festivalının təntənəli açılış mərasimi keçirilib. APA-nın məlumatına görə, açılış mərasimində çıxış edən mədəniyyət və turizm nazirinin müavini Sevda Məmmədəliyeva “Bakı - İslam mədəniyyəti paytaxtı - 2009” mədəniyyət ili çərçivəsində keçirilən beynəlxalq festivalın önəmindən danışıb. Açılış mərasimində çıxış edən ümumdünya Kulinariya Təşkilatları Assosiasiyasının prezidenti Qissur Qudmandsson, ümumdünya Folklor Sənəti Təşkilatının prezidenti Karmen de Padilla Azərbaycanda olmalarından məmnunluqlarını dilə gətiriblər və festival çərçivəsində keçirilən müsabiqənin nəticəsinin düzgün olacağından əminliklərini qeyd ediblər. Qonaqlar son illərdə Azərbaycan kulinarlarının beynəlxalq festivallarda göstərdikləri layiqli işlərə və qazandıqları uğurlara sevindiklərini bildiriblər.
Qonaqları salamlayan Azərbaycan Milli Kulinariya Mərkəzinin direktoru Tahir Əmiraslanov müsabiqənin nəticəsinin beynəlxalq kulinarların təmsil olunduğu münsiflər heyətinin qərarı ilə təyin olunacağını bildirib. T.Əmiraslanov Azərbaycanda ilk dəfə keçirilən beynəlxalq festivalda dəvətləri qəbul edən ölkələrə təşəkkürünü bildirib və bundan sonra da Azərbaycanda bu cür festivalların mütəmadi keçiriləcəyini deyib. Mərkəz rəhbəri bildirib ki, festivalda Belarus, Filippin, Gürcüstan, İran, İslandiya, Kanada, Nigeriya, özbəkistan, Rusiya, Serbiya, Türkiyə, Ukrayna, Yunanıstan və digər ölkələrin aparıcı kulinarlarından ibarət komandalar iştirak edirlər. Oktyabrın 10-na kimi davam edəcək festival çərçivəsində iştirakçı komandalar arasında müxtəlif yarışlar təşkil olunacaq. Eyni zamanda qonaqların iştirakı ilə “Kulinariyanın cəmiyyətdə rolu: inkişaf perspektivləri” adı altında dəyirmi masa da təşkil olunacaq. Festivalda qalib komandaların adları oktyabrın 9-da açıqlanacaq və komandalar mükafatlandırılacaqlar. Mədəniyyət və Turizm Nazirliyinin şöbə müdiri Fikrət Babayev jurnalistlərə açıqlamasında festivalın iki ildən bir keçirilməsinin nəzərdə tutulduğunu deyib.
Açılış mərasimində iştirakçı ölkələrdən Türkiyə, Belarus, özbəkistan, İran, eləcə də Azərbaycan kulinarlarının müxtəlif ərzaq məmulatlarından, meyvələrdən hazırladıqları maraqlı fiqurlar tədbir iştirakçılarına təqdim olunub, Azərbaycanın tarixini, mədəniyyətini və abidələrini əks etdirən fiqurlar satışa çıxarılıb.
Qeyd edək ki, İslam Mətbəxi Beynəlxalq Kulinariya Festivalında gündəlik olaraq müxtəlif siniflər üzrə yarışlar keçiriləcək. Müsabiqədə iştirak edən komandalar milli mətbəxlərini münsiflər heyətinin ixtiyarına verəcəklər. Azərbaycan festivalda “Azərbaycan” və “Bakı” komandası ilə təmsil olunur. Festival Mədəniyyət və Turizm Nazirliyinin təşkilatçılığı ilə keçirilir.
KƏBUTƏR

Paylaş:

Baxılıb: 1441 dəfə