“Qarabağın səsi” aksiyasına təqdim olunan rəsm əsərləri sərgisinin seçim mərhələsi keçirilib

Bakı:

26 °C

83 %

3 m/s

Əlaqə

AZ RU EN

Ana səhifə / Mədəniyyət / “Qarabağın səsi” aksiyasına təqdim olunan rəsm əsərləri sərgisinin seçim mərhələsi keçirilib

“Qarabağın səsi” aksiyasına təqdim olunan rəsm əsərləri sərgisinin seçim mərhələsi keçirilib

16.02.2018 [09:31]

Fevralın 15-də Dövlət Təhlükəsizliyi Xidmətinin Mədəniyyət Mərkəzində “Qarabağın səsi” aksiyasına təqdim olunan rəsm əsərlərinin seçim mərhələsi keçirilib. Aksiya Heydər Əliyev Fondunun vitse-prezidenti Leyla Əliyevanın təşəbbüsü ilə reallaşdırılan “Xocalıya ədalət!” beynəlxalq təbliğat-təşviqat kampaniyası çərçivəsində təşkil olunur.
AZƏRTAC xəbər verir ki, seçim mərhələsindən əvvəl layihənin rəhbəri Murad Qulubəyli Xocalı soyqırımının xalqımızın qan yaddaşı olmasından söhbət açıb. Qeyd edib ki, seçim mərhələsinə 300-dən çox əsər qəbul olunub. Münsiflər heyətinin seçəcəyi ən təsirli və diqqəti cəlb edən əsərlər fevralın 24-də Dövlət Təhlükəsizliyi Xidmətinin Mədəniyyət Mərkəzində nümayiş etdiriləcək. Sərgidə iştirak uçun yaş məhdudiyyəti qoyulmayıb. İştirakçıları 4-8 yaş, 8-14 yaş və 14 yaşdan yuxarı olmaqla, üç kateqoriyada qruplaşdırmaq olar. Seçim mərhələsinə həm qeyri-peşəkar, həm də peşəkar rəssamlar əsərlərini təqdim ediblər. Nəinki ölkə daxilində, hətta Rusiya, Türkiyə, İsveç və İsraildən bu mövzu ilə bağlı əsərlər göndərilib.
Tədbirdə münsiflər heyətinin üzvləri - Beynəlxalq Qadın Rəssamlar Assosiasiyasının üzvü Nərminə Vəliyeva, Xalq artistləri Aygün Kazımova, Zülfiyyə Xanbabayeva, Əməkdar artistlər Nərgiz Cəlilova, Mehriban Zəki, Tünzalə Ağayeva, layihənin rejissoru Ranar Musayev aksiya haqqında məlumat veriblər.
Çıxış edənlər sərgidə yaş məhdudiyyəti qoyulmamasının, eləcə də peşəkar və qeyri-peşəkarların iştirakının hər kəsə Xocalı faciəsi barədə öz fikirlərini fırçanın köməyilə ifadə etməyə imkan yaratdığını söyləyiblər. Qeyd edilib ki, hər bir iş orijinaldır və onlara baxan zaman insan ağrılı-acılı, fərqli hisslər yaşayır. Təqdirəlayiq və gərəkli təşəbbüs olan bu layihənin reallaşdırılması həm də çox məsuliyyətli bir işdir. Seçim mərhələsi əslində rəmzi xarakter daşıyır. Buraya təqdim edilən əsərlərin hamısı dəyərlidir. Çünki yaşından və peşəkarlığından asılı olmayaraq, hər kəs təqdim etdiyi əsərə ürəkdən yanaşaraq, bu faciə barədə hisslərini rənglərin dili ilə nümayiş etdirməyə çalışıb.
Diqqətə çatdırılıb ki, layihə həm də sənət adamlarını bu mövzu ətrafında bir araya gətirib. Aksiyada iştirak etmək hər kəsin vətəndaşlıq və mənəvi borcudur. Münsiflər heyətinin üzvləri tədbirin beynəlxalq müstəviyə çıxacağına ümidvar olduqlarını bildiriblər.
Çıxışlarda “Xocalıya ədalət!” kampaniyası çərçivəsində görülən işlərin əhəmiyyəti vurğulanıb.
Xocalı faciəsinin dəhşətlərini yaşamış Rəhilə Quliyeva acı xatirələrini tədbir iştirakçıları ilə bölüşüb.
Sonra “Qarabağın səsi” aksiyasına işlərini təqdim etmiş iştirakçılar əsərləri haqqında məlumat veriblər.
Xatırladaq ki, “Xocalıya ədalət!” beynəlxalq təbliğat-təşviqat kampaniyası 2008-ci ildə Heydər Əliyev Fondunun vitse-prezidenti Leyla Əliyevanın təşəbbüsü ilə başlanılıb. Kampaniyanın məqsədi Xocalı soyqırımı haqqında həqiqətlərin dünyada yayılmasına, bu faciənin Azərbaycan xalqına qarşı soyqırımı kimi tanınmasına nail olmaqdır. İndiyədək Avropa, Asiya, Afrika, Şimali və Cənubi Amerikanın 70-dən çox ölkəsində bu faciə ilə əlaqədar tədbirlər keçirilib. Müxtəlif ölkələrin parlamentləri və dövlət qurumları qarşısında etiraz aksiyaları, piketlər, habelə seminarlar, konfranslar təşkil edilib, kitablar nəşr olunub, filmlər çəkilib. “Xocalıya ədalət!” kampaniyası sayəsində Xocalı faciəsi bir sıra dövlətlər və beynəlxalq təşkilatlar tərəfindən soyqırımı kimi tanınıb.

Paylaş:

Baxılıb: 1124 dəfə