Qürurunu Şah dağlardan alıb...

Bakı:

28 °C

57 %

5 m/s

Əlaqə

AZ RU EN

Ana səhifə / Mədəniyyət / Qürurunu Şah dağlardan alıb...

Qürurunu Şah dağlardan alıb...

31.07.2009 [10:00]

Əmir Pəhləvanın yarıməsrlik ömür hekayəsi
Tanınmış publisist, dramaturq və kinorejissor Əmir Pəhləvan bu günlərdə ömrünün əllinci ilini geridə qoydu. Yaradıcılığına Pəhləvan təxəllüsü ilə başlayan Əmir Hacıyev 1959-cu il iyulun 29-da Şahbuz rayonunun Mahmudoba kəndində dünyaya göz açıb. Ali təhsilini Bakı Dövlət Universitetinin jurnalistika fakültəsində alıb.
Bu gün Azərbaycan mədəniyyətinə, incəsənətinə xidmət edən hər kəs, istər yazıçılar, istərsə də kinossenaristlər onu özlərinə doğma biri sayırlar. Ə.Pəhləvan həm də ölkənin ictimai-siyasi həyatında öz rolu olan qələm sahiblərinə-jurnalistlərə çox doğmadır. Vaxtilə “Bakı”, “Baku” axşam qəzetlərində, “Azərbaycan müəllimi” qəzetində müxbir kimi çalışıb. 1990-cı ildə ümumittifaq Teatr Yaradıcılıq İstehsalat Birliyinin köməyi ilə “İlham” adlı mədəniyyət qəzeti təsis edib. Baş redaktor kimi çapa imzaladığı “İlham” qəzetinin müasir mətbuat tarixində öz yeri var. Bundan başqa, yubilyar Azərbaycan radiosunun Cənub verilişləri redaksiyasında “Gəncliyin səsi” proqramının yaradıcısı hesab olunur.
“Mənim dilim
Anam Odlar yurdu kimi,
Alovları dilim - dilim!...
... Qürurunu
Şah dağlardan alıb bu dil!
Mənim dilim - ən uludur,
Ulu Türkün özü kimi”.
Əmir Pəhləvanın yazıçı və kino xadimi kimi xidmətlərinə gəldikdə, o, 1995-ci ildə “Step LTD” kino şirkətini yaradıb. ümumilikdə, şirkətdə 10-dan artıq bədii və sənədli film istehsal olunub. Şirkətin xətti ilə çəkilən “Fransız”, “Qarabağ şikəstəsi”, “Spasibo”, “Qız qalası” bədii filmlərinin böyük uğur qazanmasında ssenari müəllifi kimi onun böyük xidməti var. Əmir Pəhləvan həm də “Bakı nefti və Nobellər”, “Göyçay yəhudiləri”, “Doqquzuncu oğuz- uyğurlar”, “Kurqanlar” və başqa sənədli filmlərin ssenari müəllifi və rejissorudur.
Hələ 1998-ci ildə kinorejissorun “Spasibo” filmi Hollivudda sənədli filmlər festivalında mükafata layiq görülüb. Los-Ancelesin 18 televiziya kanalı ilə nümayiş olunub. 2001-ci ildə Fransada təşkil olunan “üç qitə” festivalında “Bakı nefti və Nobellər” üçhissəli sənədli filmi isə iki medala layiq görülüb. “Hollivud” Beynəlxalq Kino Assosiasiyasının üzvü olan Ə.Pəhləvan Azərbaycan teatr tarixində özünəməxsus yeri olan gözəl səhnə əsərlərinin də müəllifidir. Belə ki, onun “İnsan və İblis” dram əsəri Bələdiyyə Teatrında səhnə ömrünü yaşayır. Musiqili Komediya Teatrında isə müəllifin librettosu əsasında “Buna da şükür” tamaşası ərsəyə gətirilib. 20-yə yaxın kitabın müəllifi olan yubilyarın nəşrləri nəinki döğma vətəndə, Türkiyə, ABŞ və Almaniyada da nəşr olunub.

Paylaş:

Baxılıb: 1635 dəfə