“Ulu öndər və incəsənət xadimləri” adlı tədbir çərçivəsində zəmanəmizin görkəmli rəssamı Tahir Salahovun 85 illik yubileyi qeyd edilmişdir

Bakı:

31 °C

40 %

6 m/s

AZ RU EN

Ana səhifə / Mədəniyyət / “Ulu öndər və incəsənət xadimləri” adlı tədbir çərçivəsində zəmanəmizin görkəmli rəssamı Tahir Salahovun 85 illik yubileyi qeyd edilmişdir

“Ulu öndər və incəsənət xadimləri” adlı tədbir çərçivəsində zəmanəmizin görkəmli rəssamı Tahir Salahovun 85 illik yubileyi qeyd edilmişdir

29.11.2013 [16:19]

Noyabrın 29-da “İçərişəhər” Dövlət Tarix-Memarlıq Qoruğu tərəfindən Tahir Salahovun ev-muzeyində ümummilli lider Heydər Əliyevin 90 illik yubiley tədbirləri silsiləsindən “Ulu öndər və incəsənət xadimləri” adlı mərasim keçirilmişdir.
AzərTAc xəbər verir ki, ulu öndərin mədəniyyətimizin qorunması, təbliği, incəsənət xadimlərinə göstərdiyi diqqət və qayğısından bəhs edilən tədbirdə müasir Azərbaycan rəssamlıq məktəbinin görkəmli nümayəndəsi, dünya şöhrətli sənətkar, SSRİ-nin və Azərbaycanın Xalq Rəssamı, Rusiya Rəssamlıq Akademiyasının vitse-prezidenti, Avropa Elm və İncəsənət Akademiyasının (AEİA) həqiqi üzv Tahir Salahovun 85 illik yubileyi qeyd edilmişdir.
Mərasimdə “İçərişəhər” Dövlət Tarix-Memarlıq Qoruğu İdarəsinin rəisi Samir Nuriyev, təhsil naziri Mikayıl Cabbarov, Azərbaycan Yazıçılar Birliyinin sədri, Xalq Yazıçısı Anar, Azərbaycan Bəstəkarlar İttifaqının sədri, Xalq Artisti Firəngiz Əlizadə, Xalq Yazıçısı Çingiz Abdullayev və başqaları çıxış edərək ulu öndər Heydər Əliyevin Azərbaycan mədəniyyətinin, incəsənətinin inkişafı naminə gördüyü əvəzsiz işlərdən söz açmışlar.
Bildirilmişdir ki, ulu öndər hər zaman böyük sənət adamları, o cümlədən görkəmli rəssam Tahir Salahovla çox yaxın dost olmuş və onların münasibəti qarşılıqlı ehtiram və hörmət əsasında qurulmuşdur.
Tədbirdə sənətkarın zəngin yaradıcılığından, Azərbaycan təsviri sənətinə verdiyi dəyərli töhfələrdən söz açılmışdır.
Bildirilmişdir ki, Tahir Salahov əsərlərində həm özünün daxili aləmini, həm də mənsub olduğu xalqının ruhunu – onun amallarını, hisslərini və duyğularını əks etdirir.
Vurğulanmışdır ki, Prezident İlham Əliyevin müvafiq Sərəncamı ilə yaradılmış ev-muzeyində Tahir Salahovun Azərbaycan dövlətinə bağışladığı öz rəsm əsərlərindən və şəxsi arxivindən ibarət kolleksiya nümayiş olunur.
Tədbirdə mədəniyyət və turizm naziri Əbülfəs Qarayevin Xalq Rəssamı Tahir Salahova ünvanladığı təbrik məktubu oxunmuşdur.
Mərasimdə Mirzə Fətəli Axundzadə adına Azərbaycan Milli Kitabxanasının direktoru Kərim Tahirov “Tahir Salahov. Biblioqrafiya” kitabını təqdim etmişdir.
Mədəniyyət və Turizm Nazirliyinin Milli Kitabxana ilə birdə hazırladığı bu dəyərli toplu görkəmli sənətkara həsr edilmiş ilk biblioqrafik mənbədir.
“Tahir Salahov və Abşeron” yeni turist marşrutunun təqdim olunduğu tədbirdə “Tahir Salahovun rəsmləri xalçada” mövzusunda sərgi də maraqla qarşılanmışdır.
Sonda tədbir iştirakçıları Ulu Öndər və Tahir Salahova həsr olunmuş fotosərgi və sənətkarın zəngin və çox şaxəli yaradıcılıq nümunələri ilə tanış olmuşlar.

Paylaş:

Baxılıb: 1439 dəfə