Misirdə “Azərbaycan Mədəniyyəti Gecəsi” keçirildi

Bakı:

10 °C

71 %

7 m/s

Əlaqə

AZ RU EN

Ana səhifə / Mədəniyyət / Misirdə “Azərbaycan Mədəniyyəti Gecəsi” keçirildi

Misirdə “Azərbaycan Mədəniyyəti Gecəsi” keçirildi

15.10.2025 [15:03]

Son illərdə Misirdəki Azərbaycan diasporu iki ölkə arasında mədəni əlaqələrin inkişafına fəal töhfə verir, Azərbaycanın zəngin irsini Misir ictimaiyyətinə tanıdır.

Bu əməkdaşlığın parlaq nümunələrindən biri də “Azərbaycan Mədəniyyəti Gecəsi” oldu. Tədbir Azərbaycan və Misir köklərinə malik gənc alim və həkim Dr. Sandy Salimin təşəbbüsü ilə Qahirədə təşkil edildi.
Tamamilə gənclərin təşəbbüsü ilə reallaşan bu tədbir Misirdə öz növündə ilk olmaqla yanaşı, Azərbaycan Respublikasının Prezidenti cənab İlham Əliyevin 2025-ci ili “Gənclər ili” elan etməsi ilə eyni vaxta təsadüf etdi.

Dr. Sandy Salimin əsas məqsədi xalqlar arasında mədəni körpülər qurmaq və etnik müxtəlifliyin onun şəxsiyyətinə və ictimai fəaliyyətinə necə təsir etdiyini göstərmək idi.

Tədbir Misir və Azərbaycanın dövlət himnlərinin səsləndirilməsi ilə açıldı və bu an mərasimə vətənpərvər, emosional bir ruh bəxş etdi.

Daha sonra Sandy Salim özü məşhur Azərbaycan xalq mahnısı - UNESCO-nun qeyri-maddi mədəni irs siyahısına daxil edilmiş “Sarı Gəlin” əsərini canlı ifa etdi.

Gecənin əsas ulduzu tanınmış xoreoqraf, beynəlxalq müsabiqələr laureatı və milli rəqslərin ifaçısı Lenay Seidəli-zadə oldu.

O, tamaşaçılara “Tərəkəmə”, “Mirzəyi”, “Ağ çiçək”, “İnnabı” və “101” adlı beş Azərbaycan milli rəqsini təqdim etdi.

Lenay xanımın çıxışı tamaşaçılar tərəfindən böyük maraq və alqışlarla qarşılandı.

Xüsusilə duyğulu anlardan biri səhnəyə üç yaşlı Adam Havvasın - Misirdəki Azərbaycan diasporunun ən gənc nümayəndəsinin çıxışı idi. O, milli geyimdə Lenay Seidəli-zadəni “İnnabı” rəqsində müşayiət edərək nəsillərarası bağın və milli sevgisinin rəmzinə çevrildi.

Tədbir əsl mədəniyyətlər mozaikasına çevrildi.

Məşhur misirli müğənni Şahinazın çıxışı, Said bölgəsinə məxsus xalq rəqsləri və tanura (fırlanan dərviş rəqsi) tamaşaçılar tərəfindən böyük maraqla qarşılandı. Tədbirin Türkiyə səfirinin iqamətgahında keçirilməsi isə Azərbaycan, Türkiyə və Misir arasında qardaşlıq və mədəni yaxınlığın təcəssümü oldu. Gecədə digər türk dilli respublikalardan olan nümayəndələr də iştirak etdilər - Tatarıstandan Regina Əhmədiyeva və Başqırdıstandan Elvira Fəxrətdinova.
Ümumilikdə səhnədə 13 sənətçi çıxış etdi.

Tədbir çərçivəsində Qahirədə fəaliyyət göstərən Azərbaycan Mədəniyyət Mərkəzinin təşkil etdiyi “Misirdə Azərbaycanı kəşf et” müsabiqəsinin 5 illik yubileyi qeyd olundu.

Yubiley münasibətilə keçirilən tort kəsmə mərasimini Mərkəzin rəhbəri Dr. Sada Ali və Misirdəki Azərbaycan icmasının rəsmi koordinatoru Dr. Sabina Sultan idarə etdilər.

Gecənin kulminasiya anı “Yallı” dostluq rəqsi oldu. Bu rəqsə 150-dən çox iştirakçı qoşuldu və onlar Zülfiyyə Xanbabayevanın “Azərbaycan” mahnısının sədaları altında birgə rəqs etdilər.
Bu an tədbirin əsas ideyasını –-birlik, həmrəylik və dostluğun gücünü təcəssüm etdirdi.

Tədbirin sonunda Dr. Sandy Salim öz hisslərini belə ifadə etdi:

“Hər zaman arzum olub ki, mədəniyyətlər arasında körpülər qurum və digər ölkələrə göstərim ki, etnik müxtəliflik mənim şəxsiyyətimə və sosial fəaliyyətimə necə təsir göstərib. Hamınızı Azərbaycanı kəşf etməyə dəvət edirəm.”

Bu gecə hər baxımdan zəngin, səmimi və unudulmaz bir mədəniyyət hadisəsi kimi yadda qaldı.

Tədbir Azərbaycan Diasporuna Dəstək Fondunun dəstəyi ilə təşkil edilmiş və Misir mediasında geniş maraq doğurmuşdur.

Paylaş:

Baxılıb: 470 dəfə