COP29-a həsr edilən “Ruhun və təbiətin ekologiyası: fərqli baxış” sərgisi açılıb

Bakı:

13 °C

76 %

2 m/s

Əlaqə

AZ RU EN

Ana səhifə / Mədəniyyət / COP29-a həsr edilən “Ruhun və təbiətin ekologiyası: fərqli baxış” sərgisi açılıb

COP29-a həsr edilən “Ruhun və təbiətin ekologiyası: fərqli baxış” sərgisi açılıb

08.11.2024 [14:12]

Bakıda COP29-a həsr edilən “Ruhun və təbiətin ekologiyası: fərqli baxış” sərgisinin açılışı olub.

AZƏRTAC xəbər verir ki, tədbir Azərbaycan Rəssamlar İttifaqının Vəcihə Səmədova adına sərgi salonunda keçirilib.

“Biz COP29-a həsr olunan sərgi keçirmək ideyasını müzakirə edəndə belə bir sual yarandı: özünəməxsusluğu ilə seçiləcək sərgini necə təşkil etmək olar? Avqustun sonu - sentyabrın əvvəlində ilk dəfə olaraq Azərbaycanın abstrakt incəsənətinə həsr olunmuş böyük sərgi keçirildi. Rəhbərlikdə bu xətti davam etdirmək fikri yarandı, çünki ekoloji problemi abstrakt, şərti incəsənət vasitəsilə çatdırmaq maraqlı addımdır. Ekologiya təkcə təbiətlə deyil, həm də insanın daxili dünyası, onun ruhu ilə bağlıdır.

Burada sual yaranır: ətraf aləmdə gördüklərimiz - ağaclar, çaylar, mənzərələr real formalarda təsvir edilə bilər. Bəs qəlbimizdə baş verənləri, ruh halımızı və təbiətə görə narahatlığımızı necə ifadə edə bilərik? Bu baxımdan abstrakt üslub ən məhsuldardır. Bu o demək deyil ki, belə mövzuları yalnız abstrakt sənət ifadə edə bilər, lakin bu, maraqlı istiqamətlərdən biridir və Azərbaycan rəssamlarında bu üslubda zəngin təcrübə və müxtəliflilik var. Emalatxanalara baş çəkərək, biz bu sərgidə istifadə oluna biləcək çoxlu əsərlər kəşf etdik”, - deyə sərginin kuratoru Elçin Şamilli AZƏRTAC -ın müxbirinə müsahibəsində bildirib.

Azərbaycan mədəniyyət nazirinin müavini Murad Hüseynov qeyd edib ki, bu sərgi artıq ikinci dəfədir keçirilir. “İlk dəfə Muzey Mərkəzində keçirilib. Burada Azərbaycanın gənc və tanınmış rəssamlarının əsərləri təqdim olunur. Hesab edirəm ki, COP29 çərçivəsində gələcəkdə də oxşar sərgilər, konsertlər və digər tədbirlər təşkil olunacaq. Bizi daha çox sayda maraqlı tədbirlər gözləyir”, - deyə nazir müavini vurğulayıb.

Azərbaycan Rəssamlar İttifaqı sədrinin müavini Səlhab Məmmədov, Azərbaycan Dövlət Rəssamlıq Akademiyasının rektoru Natiq Əliyev və Azərbaycan Milli İncəsənət Muzeyinin direktoru Şirin Məlikova çıxışlarında qeyd ediblər ki, bu sərgi insan və təbiətin qarşılıqlı əlaqələri haqqında dərin düşüncələrin bir-birinə qarışdığı sənət dünyasına qərq olmaq üçün unikal imkan yaradır. Onlar vurğulayıblar ki, rəssamlar ziyarətçiləri ətrafdakı reallığa fərqli nəzər salmağa vadar edəcək unikal əsərlər yaradıblar.

Sonra qonaqlar sərgi ilə tanış olublar.

Təqdim olunan sərgi Azərbaycan Rəssamlar İttifaqının təşəbbüsü sayəsində həm bütün cəmiyyətin, həm də fərdin həyatının ifadə edilməsi ilə bağlı yeni sınaqlar, yeniliklər və axtarış dalğası yaradır. Abstrakt üslub məna və formaları çatdırmaq üçün universal metoda malikdir, bu da COP formatına uyğun gəlir. Bu sərgi Azərbaycan Rəssamlar İttifaqının təsviri incəsənətin beynəlxalq formatda inkişafı üzrə öz proqramını və strategiyasını əks etdirən Azərbaycan mədəniyyətinin gələcək bədii fəaliyyəti silsiləsinin mühüm tərkib hissəsidir.

Sərgi noyabrın 23-dək davam edəcək.

Paylaş:

Baxılıb: 500 dəfə