Müxtəlif mədəniyyətlərin və dinlərin mərkəzi...

Bakı:

22 °C

68 %

4 m/s

Əlaqə

AZ RU EN

Ana səhifə / MEDİA / Müxtəlif mədəniyyətlərin və dinlərin mərkəzi...

Müxtəlif mədəniyyətlərin və dinlərin mərkəzi...

21.04.2023 [11:47]

Azərbaycan dünyaya nümunədir

Artıq bir neçə ildir ki, dünyada diskriminasiyanın, milli-dini ədavətin artan xətlə inkişaf etməsi müşahidə edilməkdədir. Qeyd edilən məsələnin bir çox fikir adamları, siyasətçilər tərəfindən artıq qlobal bir problem kimi qiymətləndirilməsi də təsadüfi deyildir. Çünki demokratik ənənələri özünün yaşam prinsipi elan etmiş bəzi dövlətlərdə belə bu hal olduqca təhlükəli vəziyyət alır. Müxtəlif platformaların, sosial şəbəkələrin bəlkə də ən çox istifadə edildiyi indiki bir vaxtda dünyanın ən müxtəlif yerlərində, nöqtələrində digər dinlərə, mədəniyyətlərə qarşı ən çirkin kampaniyaların təşkil edildiyini, keçirildiyini tez-tez görürük. Buraya hansısa dinlərə məxsus olan müqəddəs kitabların yandırılması, peyğəmbərlərin təhqir olunması, onların karikaturalarının hazırlanması, ibadət yerlərinin dağıdılması və başqa dırnararası məqsədlər üçün istifadə edilməsi kimi bir çox məqamlar daxildir. Analoji hadisələrin ardıcıllığını istənilən qədər uzatmaq olar, amma, ehtimal ki, belə hallardan artıq çoxları məlumatlıdır. Hər kəs üçün açıq bir platforma olan internetdə sadalanan nüanslarla bağlı yüz minlərlə faktlara - hətta foto və video görüntülərə - rast gəlmək olar. Ən dəhşətlisi və ən təəccüblüsü isə odur ki, müxtəlif dinlərin, mədəniyyətlərin təhqir edilməsi, onlara qarşı kobud münasibətin göstərilməsi kimi hadisələrin baş verməsi artıq mənfi bir tendensiyaya çevrilib.

Bütün bunların əksinə, multikultural həyatı özünün yaşam tərzinə çevirmiş Azərbaycanda tolerant dəyərlər yaşamaqda və inkişaf etməkdədir. Belə ki, qədim və zəngin tarixə malik olan Azərbaycanda tarixin bütün dövrlərində müxtəlif mədəniyyətlərin, dinlərin, millətlərin və etnik qrupların nümayəndələri qarşılıqlı hörmət, ehtiram, birgəyaşayış şəraitində bir ailə kimi yaşayıb. Sevindirici və qürurverici bir haldır ki, bu ənənə günümüzə qədər davam edir. Azərbaycanda bütün dinlərə məxsus tarixi-dini, eləcə də mədəni abidələrə qayğı və diqqətlə yanaşılır.

1993-cü ildən xalqın təkidli tələbi ilə hakimiyyətə qayıdan ulu öndər Heydər Əliyevin əsasını qoyduğu və milli-dini tolerantlığı özündə əks etdirən siyasi kurs bu gün Prezidentimiz İlham Əliyev tərəfindən uğurla davam və inkişaf etdirilir. Əhalisinin böyük bir qismini müsəlmanların təşkil etdiyi Azərbaycanda İslam mədəniyyətinə məxsus olan abidələr, eləcə də maddi-mədəniyyət nümunələri ilə yanaşı, digər dinlərə məxsus abidələr də dövlətin diqqət və qayğısı ilə əhatə olunub. Ölkəmizdə bütün dinlərə məxsus insanlara və milli etnik fərqliliyi olan xalqlara bayramlarının, dini rituallarının keçirilməsi üçün şərait yaradılır, bu istiqamətdə görülən tədbirlər ardıcıl xarakter daşıyır.

Məlum olduğu kimi, işğalçı ölkə olan Ermənistan 30 ilə yaxın Azərbaycan torpaqlarını əsarətdə saxlayıb. Bu illər ərzində onlar həmin ərazilərdə olan bütün tarixi-mədəni abidələrimizi - məscidlərimizi, abidələrimizi və s. tamamilə məhv edib, dağıdıblar. Erməni vəhşiliyinin əsl siması Azərbaycan tarixinin qürur yeri olan 44 günlük Vətən müharibəsindən sonra bir daha aydın şəkildə ortaya çıxmış oldu. Bir daha məlum oldu ki, işğaldan azad edilmiş ərazilərimiz düşmənin ən müxtəlif yollarla zülmünə, məhvinə məruz qalıb, yerlə-yeksan edilib. Lakin bütün bu ağrılı, acılı həsrət dolu günlər arxada qaldı. Qarşıda çox intensiv şəkildə davam etdirilən genişmiqyaslı quruculuq işlərinin tam şəkildə başa çatacağı günlər gözləyir. Elə quruculuqdan söz düşmüşkən, bir məqamı da xüsusi olaraq yada salmaqda, xatırlatmaqda fayda var. Düşmən ölkənin bütün çirkin oyunlarına, addımlarına baxmayaraq, bu gün işğaldan azad edilmiş ərazilərimizdə həyata keçirilən bərpa-quruculuq işlərində Azərbaycan dövləti heç bir ayrı-seçkilik nümayiş etdirmir. Məsələn, işğaldan azad edilmiş Şuşa şəhərində yerləşən tarixi məscidlərlə yanaşı, Qazançı kilsəsi də yenilənir. Bu, ölkəmizdəki tolerant mühitin növbəti təsdiqidir.

Bu gün ölkəmizdə bütün dinlərin daşıyıcıları azad və rahat şəkildə öz inanclarına, dini dəyərlərinə sahib çıxır, ibadətlərini edirlər. İstər dövlət strukturlarında, istərsə də qeyri-hökumət təşkilatlarında müxtəlif etnik kökənli, fərqli dinlərə mənsub insanlar fəaliyyət göstərir. Onların hər biri Azərbaycan dövlətinin inkişafına xidmət edir.

Azərbaycan təcrübəsi əyani şəkildə göstərir ki, müxtəlif mədəniyyətlərə, müxtəlif dinlərə mənsub olan xalqlar mehribanlıq, sülh, əməkdaşlıq şəraitində yaşaya bilərlər.

Nicat Dilqəmli

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Dini və milli tolerantlıq, millətlərarası münasibətlərin inkişaf etdirilməsi” istiqaməti üzrə hazırlanmışdır

Paylaş:

Baxılıb: 869 dəfə