Biz birlikdə güclüyük!

Bakı:

26 °C

57 %

6 m/s

Əlaqə

AZ RU EN

Ana səhifə / MEDİA / Biz birlikdə güclüyük!

Biz birlikdə güclüyük!

25.11.2022 [10:41]

MÜŞFİQƏ

Dövlətimizin diaspor quruculuğuna göstərdiyi yüksək diqqət və qayğı sayəsində xaricdə yaşayan soydaşlarımızın ictimai-siyasi fəallığı son illər nəzərəçarpacaq dərəcədə artıb. Onların doğma Vətənə bağlılığı güclənib, əsası ümummilli lider Heydər Əliyev tərəfindən qoyulan azərbaycançılıq ideologiyası ətrafında birliyi daha da möhkəmlənib.

Ölkəmizin ən çətin və sınaqlı günlərində gecəsini gündüzünə qatan soydaşlarımız “Qarabağ Azərbaycandır!”, “Biz birlikdə güclüyük!”, “Dəmir yumruq!” şüarları altında birləşdilər. Möhtəşəm milli birlik nümayiş etdirərək bütün imkanları ilə dövlətimizə dəstək göstərdilər, haqq səsimizin dünyaya çatdırılmasında da böyük fədakarlıq nümayiş etdirdilər.

Bu gün bütün dünya azərbaycanlıları başını dik tutub

Azərbaycan Prezidenti, Yeni Azərbaycan Partiyasının (YAP) Sədri İlham Əliyev partiyanın yaradılmasının 30 illiyi münasibətilə keçirilən tədbirdəki çıxışında bildirib: “...Bu quruculuq işlərində hər birimiz böyük həvəslə, bir məqsədlə iştirak edirik ki, keçmiş köçkünləri tezliklə öz dədə-baba torpaqlarına qaytaraq, dağılmış şəhər və kəndləri tezliklə bərpa edək və bütün dünyaya bir daha göstərək ki, biz böyük xalqıq. Bu gün nəinki Azərbaycan vətəndaşları, bütün dünya azərbaycanlıları başını dik tutub. Bizim üzümüz ağdır, alnımız açıqdır. Biz müzəffər xalqıq, qalib dövlətik və bu, əbədi olacaq!”.

Səfərbər olun!

Zaman yenidən həmrəy olmağın və haqq səsimizi dünyaya çatdırmağın zamanıdır. Məlum olduğu kimi, noyabrın 15-də Fransa parlamentinin yuxarı palatası olan Senat Azərbaycana qarşı sanksiyaları nəzərdə tutan bədnam qətnamə qəbul edib. Noyabrın 28-də isə hakim partiya nümayəndələrinin təqdim etdiyi bu qətnamə Fransa parlamentinin aşağı palatası olan Milli Assambleyada müzakirəyə çıxarılacaq.

Bu məqsədlə də Diasporla İş üzrə Dövlət Komitəsi dünya azərbaycanlılarına müraciət ünvanlayıb.

Müraciətdə deyilir ki, ATƏT-in Minsk qrupunun həmsədrliyində təmsil olunan Fransa dövləti 30 il ərzində Azərbaycan həqiqətlərinə ikili standartlar əsasında yanaşıb, anti-Azərbaycan qərar və bəyanatları ilə fərqlənib. Fransa Senatında qəbul olunan və Milli Assambleyada müzakirəyə çıxarılacaq son qətnamə də uzun illər davam edən münasibətin nəticəsidir.

O da vurğulanıb ki, sözügedən qətnamə layihəsi gündəmə gələn ilk gündən dünya azərbaycanlıları buna etiraz etmək məqsədilə səfərbər olaraq qüvvələrini birləşdiriblər. Bununla bağlı bəyanatlar yayılıb, məqalələr dərc olunub, sosial şəbəkələrdə kampaniyalar keçirilib. Buna misal olaraq bütün senatorların rəsmi elektron ünvanlarına 418 müraciət göndərilib, 348 senatorun tvitter hesabları vahid həştəqlə işarələnərək erməni yalanlarına uymamaq, təcavüzkar ölkəni dəstəkləməmək və Azərbaycana qarşı obyektiv olmaq çağırışları edilib.

Aparılan tvitter kampaniyası nəticəsində azərbaycanlıların haqq səsi təkcə bir gün ərzində 45 min fransıza çatdırılıb. Bu paylaşımlarda Fransa və fransızların Azərbaycan həqiqətləri - Xocalı soyqırımı, Oxçuçayın çirkləndirilməsi, Azərbaycan ərazilərinin minalarla çirkləndirilməsi, Azərbaycanla dövlət sərhədində Ermənistanın təxribatları kimi mövzulara səssiz qalmaması və bundan sonra ikili standartlardan kənar həssas yanaşma nümayiş etdirmək tələb olunub. Qətnamə layihəsi Senatda müzakirə olunan gün diaspor üzvləri Senatın binası qarşısında icazəli piket keçiriblər.

Diaspora sonda soydaşlarımızı səfərbər olmağa səsləyib: “Əziz soydaşlar! Noyabrın 28-də Azərbaycana qarşı bədnam qətnamənin Fransa parlamentinin aşağı palatası olan Milli Assambleyada müzakirəyə çıxarılacağını nəzərə alaraq sizi bir daha səfərbər olmağa, Azərbaycanın haqq səsini və ədalətli mövqeyini Assambleya üzvlərinə çatdırmaq üçün qüvvələrinizi birləşdirməyə və yaşadığınız ölkənin qanunvericiliyinin tələblərinə uyğun olaraq öz münasibətinizi bildirməyə çağırırıq. Biz birlikdə güclüyük!”

Bu gün Azərbaycan həmişəkindən daha güclüdür. Bu gücün təməlində təkcə iqtisadi və hərbi qüdrətimiz deyil, həm də sıx birliyimiz dayanır. Ona görə də harada yaşadığımızdan asılı olmayaraq, milli birlik və həmrəylik ideyaları soydaşlarımızı birləşdirən əsas dəyərlərdir.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Diaspor quruculuğu, lobbiçilik və dünya azərbaycanlılarının həmrəyliyi” istiqaməti üzrə hazırlanmışdır

Paylaş:

Baxılıb: 1016 dəfə