Azərbaycan və Rusiya innovasiyalı inkişaf sahəsində əməkdaşlığı möhkəmləndirirlər

Bakı:

22 °C

49 %

3 m/s

Əlaqə

AZ RU EN

Ana səhifə / İqtisadiyyat / Azərbaycan və Rusiya innovasiyalı inkişaf sahəsində əməkdaşlığı möhkəmləndirirlər

Azərbaycan və Rusiya innovasiyalı inkişaf sahəsində əməkdaşlığı möhkəmləndirirlər

06.03.2020 [09:34]

Azərbaycan və Rusiya innovasiyalı inkişaf sahəsində əməkdaşlığı möhkəmləndirirlər.
Azərbaycanın Rusiya Federasiyasındakı ticarət nümayəndəliyindən AZƏRTAC-a bildiriblər ki, 2019-cu il noyabrın 20-25-də RF-yə rəsmi səfəri çərçivəsində Azərbaycanın Birinci vitse-prezidenti Mehriban Əliyeva ilə Rusiya Prezidenti Vladimir Putin arasında əldə olunan innovasiya, rəqəmsal iqtisadiyyat və insan kapitalının inkişafı sahəsində ikitərəfli əməkdaşlığın genişləndirilməsi üzrə sazişlərin icrası məqsədilə Rusiyanın İqtisadi İnkişaf Nazirliyi və Azərbaycanın İqtisadiyyat Nazirliyinin təşkilati dəstəyi ilə Azərbaycandan olan səlahiyyətli nümayəndə heyəti martın 3-4-də Moskvada səmərəli görüşlər keçirib.
Azərbaycanın Rusiyadakı ticarət nümayəndəsi Ruslan Əliyevin ölkəmiz tərəfindən həmsədri olduğu ekspert işçi qrupunun tərkibinə Azərbaycan Dövlət Neft və Sənaye Universitetinin rektoru Mustafa Babanlı, Azərbaycan Texniki Universitetinin rektoru Vilayət Vəliyev, Azərbaycan Memarlıq və İnşaat Universitetinin rektoru Gülçöhrə Məmmədova, Təhsil İnstitutunun direktoru Emin Əmrullayev, “Azərbaycan İnvestisiya Şirkəti” ASC-nin hüquqi ekspertiza və monitorinq şöbələrinin rəhbərləri Məmməd Balacanov və Tural Orucov daxil idi.
Moskvaya səfər “Skolkovo” İnnovasiya Mərkəzinə ziyarətlə başlayıb. Burada nümayəndə heyətini Mərkəzin MDB ilə regional inkişaf və qarşılıqlı əlaqələr üzrə vitse-prezidentinin müavini Aleksandr Okunev qarşılayıb. A.Okunev qonaqları “Skolkovo” Texnoloji Parkı ilə tanış edib, onun fəaliyyəti barədə ətraflı söhbət açıb. Skolkovo Elm və Texnologiya İnstitutunda strateji kommunikasiyalar və ictimai əlaqələr üzrə vitse-prezident Aleksey Sitnikov qurumun yaranma tarixi və fəaliyyətindən danışıb, həmçinin institutun Azərbaycan universitetləri ilə potensial əməkdaşlıq istiqamətləri müzakirə edilib.
Nümayəndə heyətini M.V.Lomonosov adına Moskva Dövlət Universitetinin (MDU) rektoru, Rusiya Elmlər Akademiyasının akademiki, Rəyasət Heyətinin üzvü Viktor Sadovniçi qarşılayıb. Sonra MDU-nun prorektoru, “Vorobyovı qorı” Elmi-Texnoloji İnnovasiya Mərkəzinin baş direktoru Viktor Vaypan Rusiyada buna bənzər mərkəzlərin fəaliyyətinin hüquqi nizamlanması barədə məlumat verib. D.İ.Mendeleyev adına Rusiya Kimya-Texnologiya Universitetində ali məktəbin rektoru, kimya elmləri doktoru, professor Aleksandr Majuqa tərəfindən “D.İ.Mendeleyev adına Rusiya Kimya-Texnologiya Universiteti - sərhədsiz imkanlar universiteti” və “Dolina Mendeleyeva” Elmi-Texnoloji İnnovasiya Mərkəzi - ölkənin yaşıl gələcəyi” mövzularında təqdimatlar edilib. Daha sonra elmi-tədqiqat işləri üzrə rəhbər Ruslan Səfərov nümayəndə heyətinin üzvlərini müasir avadanlıqla təchiz edilmiş yeni kimya laboratoriyaları ilə tanış edib.
İşgüzar səfərin zəngin proqramında “Kalibr” Texnoloji Parkını ziyarət də yer alıb.
Səfər birgə işçi qrupun iclası ilə başa çatıb. İclasa Rusiya tərəfdən İqtisadi İnkişaf nazirinin müavini Oksana Tarasenko rəhbərlik edib. Toplantıda səfərin yekunları barədə danışılıb, həmçinin “Yol xəritəsi” layihəsinin əsasnaməsi müzakirə edilib, qarşıya qoyulan məsələlərin icrası istiqamətində atılacaq addımlar müəyyənləşdirilib.

Paylaş:

Baxılıb: 750 dəfə