Maliyyə Nazirliyi ilə UNCTAD Borcların İdarə olunması və Maliyyə Təhlili Sisteminin satın alınması və tətbiqi üzrə İş Planını imzalayıb

Bakı:

26 °C

38 %

6 m/s

AZ RU EN

Ana səhifə / İqtisadiyyat / Maliyyə Nazirliyi ilə UNCTAD Borcların İdarə olunması və Maliyyə Təhlili Sisteminin satın alınması və tətbiqi üzrə İş Planını imzalayıb

Maliyyə Nazirliyi ilə UNCTAD Borcların İdarə olunması və Maliyyə Təhlili Sisteminin satın alınması və tətbiqi üzrə İş Planını imzalayıb

26.10.2019 [09:59]

Maliyyə naziri Samir Şərifov oktyabrın 25-də Qoşulmama Hərəkatının XVIII Zirvə Görüşündə iştirak etmək üçün ölkəmizə səfərə gələn Birləşmiş Millətlər Təşkilatının Ticarət və İnkişaf Konfransının (UNCTAD) baş katibi Mukhisa Kituyi ilə görüşüb.
Maliyyə Nazirliyinin mətbuat xidmətindən AZƏRTAC-a bildirilib ki, görüşdə Azərbaycanın BMT strukturlarında fəaliyyəti məmnunluqla qeyd olunub, cari ilin sentyabrında nazirlik ilə UNCTAD arasında Borcların İdarə olunması və Maliyyə Təhlili Sistemi (DMFAS) Proqramının satın alınması və tətbiqi barədə imzalanan sənədin əhəmiyyətindən bəhs olunub.
S.Şərifov Prezident İlham Əliyevin rəhbərliyi ilə ölkəmizdə dövlət maliyyə idarəetməsi, o cümlədən dövlət borcunun idarə olunması sahəsində həyata keçirilən islahatlar, dövlət borcunun idarə edilməsi strategiyası, habelə bu sahəyə ayrılan diqqət barədə məlumat verib.
Bu günlərdə dövlətimizin başçısının Fərmanı ilə Maliyyə Nazirliyi yanında Dövlət Borcunun və Maliyyə Öhdəliklərinin İdarə Edilməsi Agentliyinin yaradıldığını qeyd edən nazir bildirib ki, dövlət borcunun idarə olunması strategiyasının ardıcıl şəkildə həyata keçirilməsi borcun uzunmüddətli dayanıqlı səviyyədə saxlanılmasına, Azərbaycanın investorlar üçün cazibədar olaraq qalmasına, borc almaq qabiliyyətinin yüksək olmasına xidmət edir: “Müasir maliyyə sisteminin inkişafını borclanma olmadan təsəvvür etmək çətindir. Düzgün borclanma ölkələrin inkişafına, iqtisadi artıma şərait yaradır. Lakin düşünülmüş borclanma strategiyasının, dövlət borclanması sahəsində hesabatlılığın və uçotun olmaması ifrat borclanmaya səbəb olmaqla ölkələrin və xalqların rifahı üçün ağır maliyyə yükünə çevrilə, ölkələrin iqtisadi artımı üçün təhdid yarada bilər”.
“Dövlət borcunu idarə edən effektiv sistem dayanıqlı iqtisadi artım, idarəetmənin təkmilləşdirilməsi və yoxsulluğun azaldılması üçün zəruridir”, - deyən Mukhisa Kituyi isə Azərbaycanın dövlət borcunun idarə olunması sahəsində qazandığı nailiyyətləri yüksək qiymətləndirib. Baş katib 70-dək ölkənin maliyyə nazirliklərində və mərkəzi banklarında borc məlumatlarının etibarlı şəkildə idarə edilməsinə dəstək verən Borcların İdarə olunması və Maliyyə Təhlili Sisteminin Azərbaycanda da tətbiqinin borc idarəetmə prosedurlarının daha da asanlaşdıracağını, daha geniş təhlillərin aparılmasını, həmçinin borcla əlaqədar hesabatların daha şəffaf və qəbul olunmuş standartlara uyğun hazırlanmasını təmin edəcəyini vurğulayıb.
Sonra maliyyə naziri S.Şərifov və UNCTAD-ın baş katibi M.Kituyi Maliyyə Nazirliyi ilə UNCTAD arasında DMFAS Proqramının satın alınması və tətbiqi üzrə İş Planını imzalayıblar. Ümumi dəyəri 545 min İsveçrə frankı və icra müddəti 3 il olan layihə Asiya İnkişaf Bankı (ADB) və İsveçrənin İqtisadi İşlər üzrə Dövlət Katibliyinin (SECO) maliyyə dəstəyi (qrant şəklində) ilə həyata keçiriləcək. Layihə çərçivəsində proqram təminatının Maliyyə Nazirliyinin daimi istifadəsinə verilməsi və nazirliyin əməkdaşlarına müvafiq təlimlərin keçirilməsi nəzərdə tutulur.
Borcların İdarə olunması və Maliyyə Təhlili Sistemi proqramının tətbiqi Azərbaycana borc məlumatlarının etibarlı saxlanılması, daha səmərəli şəkildə idarə edilməsi dövlət borcları ilə əlaqədar risklərin effektiv qiymətləndirilməsini, dövlət borcunun və zəmanətlərin hesabatlılığının daha da təkmilləşdirilməsi üzrə strateji məqsədlərə nail olmaq üçün mühüm töhfə verəcək.

Paylaş:

Baxılıb: 904 dəfə