Azərbaycan biznes mühitinin inkişafına görə əksər ölkələri qabaqlayıb

Bakı:

19 °C

63 %

9 m/s

Əlaqə

AZ RU EN

Ana səhifə / İqtisadiyyat / Azərbaycan biznes mühitinin inkişafına görə əksər ölkələri qabaqlayıb

Azərbaycan biznes mühitinin inkişafına görə əksər ölkələri qabaqlayıb

31.10.2012 [02:49]

“Doing Business 2013” hesabatına görə Azərbaycan 185 ölkə arasında 67-ci yerdədir
İnkişaf sürətinə görə əksər ölkələri qabaqlayan Azərbaycan iqtisadiyyatın ayrı-ayrı göstəriciləri üzrə də yüksək nailiyyətlər əldə edib. Belə ki, oktyabrın 23-də Dünya Bankı və Beynəlxalq Maliyyə Korporasiyası tərəfindən hazırlanan və biznes mühitinin əlverişliliyi üzrə qiymətləndirməni özündə əks etdirən nüfuzlu “Doing Business 2013” hesabatı açıqlanıb. İqtisadi İnkişaf Nazirliyinin yaydığı məlumata görə, hesabatda 185 ölkə arasında 67-ci yerdə qərarlaşmış Azərbaycan bir sıra göstəricilər üzrə yenə də qabaqcıl ölkələr sırasındadır. Belə ki, keçənilki hesabatda Azərbaycan iqtisadiyyatı dünyanın 117 iqtisadiyyatını geridə qoyurdursa, builki hesabatda belə ölkələrin sayı 118-dir.
Hesabatda əksini tapan göstəricilər üzrə Azərbaycanın tutduğu yerlər ölkəmizdə aparılan islahatların nəticələrinin beynəlxalq səviyyədə təsdiqidir. Bildiyimiz kimi, iqtisadi sahədə aparılan islahatların mühüm istiqamətlərindən birini biznes mühitinin yaxşılaşdırılması, sahibkarlıq fəaliyyətinə başlayanlar üçün qeydiyyat və digər sənədləşdirmə prosedurlarının asanlaşdırılmasıdır. Bu məqsədlə ölkədə “bir pəncərə” sistemi də tətbiq olunur.
Qeyd olunan sahələrdəki irəliləyişlər sözügedən hesabatda ölkənin digər dövlətlər arasındakı yerinə müsbət təsir göstərib. Belə ki, “Doing Business 2013” hesabatında biznes mühitin yaxşılaşdırılması sahəsində 2005-ci ildən etibarən Azərbaycanın əldə etdiyi nailiyyətlər yüksək qiymətləndirilib, ölkəmiz bu sahədə məqsədyönlü islahatlar həyata keçirən 15 ölkə sırasına daxil olaraq, bir çox ölkələri geridə qoyub.
Azərbaycan, həmçinin, “müəssisənin yaradılması” göstəricisi üzrə 18-ci, “əmlakın qeydiyyatı” üzrə 9-cu yerdə qərarlaşıb. Hesabatda “əmlakın qeydiyyatı” göstərici üzrə ölkəmiz ilk onluğa daxil edilib və bu sahədə Böyük Britaniya, Malayziya və Yeni Zelandiya kimi qabaqcıl dövlətlərlə yanaşı, dünyada ən yaxşı təcrübəyə malik ölkə kimi qeyd olunub.
Azərbaycan iqtisadiyyatının davamlı inkişafı xarici investorların ölkəmizə marağını daim yüksək səviyyədə saxlayır. Azərbaycan iqtisadiyyatına ümumilikdə 120 milyard dollardan artıq sərmayə yatırılıb. Bunun mühüm hissəsi xarici investisiyaların payına düşür. Dövlət Statistika Komitəsinin məlumatına görə, ölkə iqtisadiyyatına qoyulmuş xarici investisiyaların həcmi 2012-ci ilin birinci yarısında 5,2 faiz artaraq 1,7 milyard dollara çatıb. Azərbaycana olan marağı və iqtisadi mənafelərimizi nəzərə alan dövlət xarici investorların ölkəmizdəki fəaliyyətinə şərait yaradır. Ölkədə investisiya mühitinin əlverişli olması xarici sərmayədarları cəlb edən ən mühüm amillərdən biridir. Azad sahibkarlığa, yerli və xarici sərmayədarlara yaradılan münasib şərait, təhlükəsiz investisiya mühiti iqtisadi inkişaf üçün gərəkli olan investisiyaların yatırımını stimullaşdırır.
Təsadüfi deyil ki, Prezident İlham Əliyev Nazirlər Kabinetinin 2012-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasındakı çıxışında bu məsələyə toxunaraq demişdi: “Xarici investorlar bizə inanır, biz xarici investorlar üçün gözəl şərait yaradırıq. Hökumət nümayəndələri ilə böyük şirkətlər arasında əlaqələr də çox müsbətdir. Yerli istehsalın artırılmasında xarici sərmayədarlar bizə kömək göstərirlər”.
Həqiqətən də, Azərbaycan iqtisadiyyatının çoxşaxəliliyi, ayrı-ayrı sahələrin inkişafı üçün potensialın geniş olması, ölkədə biznes mühitinin əlverişliliyi müxtəlif ölkələrin nüfuzlu şirkətlərinin, transmilli korporasiyaların ölkə iqtisadiyyatına marağını daha da artırır.
Hesabatda ölkəmizin bu sahədə də böyük irəliləyiş əldə etməsi əksini tapıb. “İnvestorların maraqlarının qorunması” göstəricisi üzrə 25-ci pillədə olan Azərbaycan hesabatın dərc edildiyi tarixdən, bu göstərici üzrə öz mövqeyini köklü surətdə yaxşılaşdırıb və bu sahədə islahatlar aparan ölkə kimi ilk onluğa daxil olub. “Müqavilələrin icrasının təmin edilməsi” göstəricisi üzrə 25-ci yerdə qərarlaşan ölkəmiz kommersiya mübahisələrinə baxılma müddətinə görə Sinqapur, Yeni Zelandiya və Koreya ilə yanaşı, dünyada 7-ci iqtisadiyyat kimi qeyd olunub. “Vergilərin ödənişi” göstəricisi üzrə Azərbaycan mövqeyini köklü surətdə yaxşılaşdıraraq, uğurlu islahatlar aparan ilk beş ölkə sırasına daxil edilib.
Göründüyü kimi, Azərbaycanın daxili biznes mühiti üzrə dünya ölkələri ilə müqayisədə qazandığı uğurlar diqqətəlayiqdir. Azərbaycan iqtisadiyyatının müxtəlif göstəricilərinə görə bir sıra digər hesabatlarda da yüksək pillələrdə dayanır. Bu, bir daha ölkəmizin düzgün və etibarlı inkişaf yolunda irəlilədiyini təsdiq edir.
Hülya MƏMMƏDLİ

Paylaş:

Baxılıb: 1948 dəfə