FIA prezidenti Azərbaycan Avtomobil Federasiyasının fəaliyyəti ilə tanış olub

Bakı:

25 °C

69 %

5 m/s

Əlaqə

AZ RU EN

Ana səhifə / İdman / FIA prezidenti Azərbaycan Avtomobil Federasiyasının fəaliyyəti ilə tanış olub

FIA prezidenti Azərbaycan Avtomobil Federasiyasının fəaliyyəti ilə tanış olub

21.06.2016 [10:15]

Beynəlxalq Avtomobil Federasiyasının (FIA) prezidenti Jan Tod iyunun 19-da Azərbaycan Avtomobil Federasiyasının (AAF) fəaliyyəti və federasiyanın həyata keçirdiyi bir sıra layihələrlə tanış olub.
AZƏRTAC xəbər verir ki, Azərbaycan Avtomobil Federasiyasının prezidenti Anar Ələkbərov ilə FIA prezidenti arasında keçirilən görüşdə federasiyanın son illərdəki fəaliyyəti barədə ətraflı məlumat verilib.
Qeyd edilib ki, AAF ölkəmizdə avtomobil idmanının inkişafı, gənclər arasında təbliği baxımından bir sıra layihələr həyata keçirib. Bu istiqamətdə müxtəlif avtomobil idmanı yarışları təşkil olunub, eyni zamanda, yol hərəkəti təhlükəsizliyi ilə bağlı bir sıra tədbirlər görülüb. Yol hərəkəti təhlükəsizliyi ilə bağlı maarifləndirici müxtəlif nəşrlər hazırlanaraq yayımlanıb. Bu çərçivədə keçirilən idman yarışları, azərbaycanlı pilotların hazırlanması, müxtəlif yaş həddindən olan şəxslər arasında yol hərəkəti təhlükəsizliyi ilə bağlı aparılmış maarifləndirici layihələr müzakirə edilib.
Bildirilib ki, son illər keçirilən avtomobil yarışları bu idman növünün təşviqi, gənclərin avtomobil treklərində yarışlara marağının artması baxımından müsbət nəticələrini verir.
Beynəlxalq Avtomobil Federasiyasının prezidenti Jan Tod, həmçinin Azərbaycan Avtomobil Federasiyasının mütəmadi olaraq təşkil etdiyi “Yol hərəkəti qaydalarını öyrənək” təlimlərinin növbəti məşğələsində iştirak edib. Qeyd edilib ki, müxtəlif yaş həddindən olan şəxslər arasında keçirilən bu təlimlərdə yol hərəkəti qaydaları, yol hərəkəti təhlükəsizliyinin sürücü və piyadalar üçün vacibliyi ilə bağlı məqamlar nəzəri və praktik qaydada öyrədilir.
Təlim iştirakçıları ilə eyni zamanda Azərbaycan Avtomobil Federasiyasının “Uşaqlar üçün yol hərəkəti qaydaları”, “Rəngləyək və öyrənək” və digər nəşrlər əsasında nəzəri kurslar aparılır.
Beynəlxalq Avtomobil Federasiyasının prezidenti Jan Tod daha sonra Heydər Əliyev Mərkəzində Azərbaycan Avtomobil Federasiyasının dəstəyi ilə hazırlanan “Klassik avtomobil sərgisi” ilə tanış olub.
Bildirilib ki, bu sərgi avtomobil tarixinin öyrənilməsi və klassik avtomobillərlə yaxından tanışlıq üçün avtomobilsevərlərə gözəl fürsət yaradıb.
Jan Tod, eyni zamanda, Mərkəzdəki “Azərbaycan inciləri: tarixin axarında”, “Mini Azərbaycan”, amerikalı rəssam Corc Kondonun fərdi sərgiləri ilə tanış olub.
FIA prezidenti ölkəmizdə Azərbaycan Avtomobil Federasiyası tərəfindən görülən işləri yüksək qiymətləndirərək bu layihələrin davam etdirilməsinin vacibliyini vurğulayıb. O, ölkə daxilində keçirilən avtomobil yarışlarının, pilotların hazırlanması, azərbaycanlı idmançıların digər ölkələrdəki yarışlarda iştirakının avtomobil idmanının inkişafı baxımından əhəmiyyətli olduğunu qeyd edib. Jan Tod, həmçinin Azərbaycanda avtomobil yarışı trekinin tikintisinin idmanın bu növünün inkişafı üçün vacib olduğunu bildirib.

Paylaş:

Baxılıb: 1157 dəfə