“Alov Qoruyanlar”

Bakı:

17 °C

88 %

2 m/s

Əlaqə

AZ RU EN

Ana səhifə / İdman / “Alov Qoruyanlar”

“Alov Qoruyanlar”

13.05.2015 [10:13]

Azərbaycan Avropanın müasir infrastruktura malik aparıcı idman ölkələrindən biridir. Bu baxımdan, “Bakı-2015” ilk Avropa Oyunlarının ölkəmizə etibar edilməsi heç də təsadüfi xarakter daşımır. Eyni zamanda, ölkəmiz Avropanın tarixində ilk dəfə keçiriləcək bu yarışmanı Yay Olimpiya Oyunları səviyyəsində keçirmək əzmindədir. İyunun 12-dən 28-nə kimi dünyanın diqqəti Azərbaycanda keçiriləcək beynəlxalq idman yarışlarına yönələcək. Həmin vaxt Odlar Yurdu daha bir mötəbər yarışa ev sahibliyi edəcək. Bakıda ilk Avropa Oyunları start götürəcək. 17 gün ərzində paytaxtda əsl idman bayramı yaşanacaq. Avropanın ən güclü idmançıları qalib adı uğrunda mübarizə aparacaqlar. Belə bir mötəbər yarışın ölkəmizdə keçirilməsi isə hər bir azərbaycanlı üçün qürur mənbəyi olmalıdır.
Sevindirici haldır ki, bu beynəlxalq tədbirin yüksək səviyyədə təşkili üçün ölkə ictimaiyyəti ilə yanaşı, bu gün gənclər, eləcə də, “Bakı-2015”in könüllüləri də fəallıq göstərirlər.
Bildiyiniz kimi, artıq bir neçə gündür ki, “Yeni Azərbaycan” qəzeti “Alov Qoruyanlar” adlı yeni rubrikaya start verib. Bu rubrikada mütəmadi olaraq ilk Avropa Oyunlarında fəaliyyət göstərəcək könüllü gənclərimizi oxucularımıza təqdim edirik.
“İlk Avropa Oyunlarının ölkəmizdə keçirilməsi uğurumuzun daha bir göstəricisidir”. Bunu qəzetimizə açıqlamasında Qafqaz Universitetinin IV kurs tələbəsi, “Bakı-2015”in könüllüsü Azər Alməmmədov deyib. Onun sözlərinə görə, Azərbaycan qitə üçün çox maraqlı, cəlbedici və yeni idman yarışları ilə ilk Avropa Oyunlarına ev sahibliyi etməyə hazırlaşır. Bu isə Oyunlar zamanı idmançılar da daxil olmaqla, ölkəmizə gələn minlərlə qonağa Azərbaycandakı güclü iqtisadi inkişafın, müxtəlif sahələrdə əldə edilən uğurların və ideal tolerantlıq mühitinin şahidi olmalarına imkan yaradacaq: “Bu Oyunların ölkəmizdə keçirilməsi Azərbaycanın nüfuzunun daha da artmasına, eyni zamanda, anti-Azərbaycan dairələrin, o cümlədən, erməni lobbisinin ölkəmizə qarşı apardığı “qara piar” kampaniyasının iflasa uğramasına səbəb olacaq. Ona görə də, düşünürəm ki, peşəsindən, statusundan və siyasi mövqeyindən asılı olmayaraq, hər kəs ilk Avropa Oyunlarına öz töhfəsini verməlidir”.
Azər Alməmmədov könüllü olaraq ilk Avropa Oyunlarına öz töhfəsini verəcəyini də bildirib: “Qonaqları qarşılayacağam. Onlar necə gülərüzlə gəlirlərsə, gülərüzlə də getməlidirlər. Biz Bakıya gələcək minlərlə xarici qonağa Azərbaycan mədəniyyəti, ölkənin inkişafı haqqında məlumat verəcəyik. Bu iş çox xoşuma gəlir. Düşünürəm ki, mənim kimi minlərlə “Bakı-2015”in könüllüləri sıralarına qatılan gənclər də bu fikirdədilər”.
Azərbaycan Dillər Universitetinin III kurs tələbəsi, “Bakı-2015”in könüllüsü Günel Salmanova isə “könüllü kimi fəaliyyət göstərdiyim üçün qürur hissi keçirirəm”, - deyib. Qəzetimizə açıqlamasında könüllülərin görəcəyi işlər barədə də danışan Günel Salmanova bildirib ki, Azərbaycana gələn xarici qonaqlar özlərini rahat, öz ölkələrindəki kimi hiss etməlidirlər: “Biz həm bunun üçün var qüvvəmizlə çalışacaq, həm də Azərbaycanı tanıdacağıq. Bu, xarici arenada ölkəmizin piarıdır. Düşünürəm ki, birinci Avropa Oyunlarında iştirak etmək və bütün Avropanı Bakı şəhərində salamlamaq imkanı biz “Bakı-2015”in könüllüləri üçün çox gözəl və önəmli bir fürsətdir. Biz könüllülər bu Oyunlarda iştirakamızla, eyni zamanda, bir iş, ünsiyyət təcrübəsi qazanmış oluruq. Nə yaxşı ki, bu Oyunlara az da olsa öz töhfəmi vermək imkanım olacaq”.
Vüsalə CAVANŞİR

Paylaş:

Baxılıb: 2059 dəfə