Azərbaycan-Türkiyə münasibətləri ortaq dəyərlərə söykənir

Bakı:

19 °C

82 %

2 m/s

Əlaqə

AZ RU EN

Ana səhifə / Gündəm / Azərbaycan-Türkiyə münasibətləri ortaq dəyərlərə söykənir

Azərbaycan-Türkiyə münasibətləri ortaq dəyərlərə söykənir

14.03.2012 [00:52]

Prezident İlham Əliyev: Biz yaxın xalqıq. Bir-birimizə çox yaxınıq. Bizim dilimiz də bir-birinə çox oxşayır, tariximiz də, kökümüz də birdir. Ən önəmlisi ondan ibarətdir ki, bizim maraqlarımız da üst-üstə düşür
Azərbaycanla Türkiyə arasında mövcud olan dostluq və qardaşlıq münasibətləri bu iki ölkənin regional və qlobal miqyasda mövqeyinə, uğurlar əldə etməsinə müsbət təsir göstərən mühüm amildir. İki ölkə arasında yüksək siyasi əlaqələr, müxtəlif sahələrdə genişmiqyaslı əməkdaşlıq mövcuddur. Həmçinin, Azərbaycan-Türkiyə münasibətləri öz xüsusiyyətlərinə görə dünyada unikal hesab oluna bilər. çünki bu münasibətlər sadəcə siyasi xarakter daşımır. Daha dəqiq desək, iki ölkəni strateji-coğrafi əhəmiyyət daşıyan siyasi, iqtisadi maraqlarla yanaşı, ortaq tarix, milli-mənəvi dəyərlər, etnik köklər də birləşdirir. Ulu öndər Heydər Əliyevin dillər əzbəri olan “Bir millət - iki dövlət” kəlamı da, əslində, Azərbaycan və Türkiyə xalqlarının qardaşlığını, birliyini, daimi münasibətlərini ifadə edən konseptual əsaslara malikdir.
Ən əsası odur ki, həm Azərbaycan, həm də Türkiyə xalqı iki ölkəni birləşdirən dəyərlərə böyük hörmət və rəğbətlə yanaşır. 70 ildən artıq bir müddətdə “xalqlar dostluğu” adı altında milli-etnik kimliyimizi yox etməyə çalışan Sovetlər Birliyinin, daha öncələr isə uzun illər boyu şovinist siyasət yeridən çar Rusiyasının əsarəti altında olmasına baxmayaraq, Azərbaycan xalqı milli dəyərlərini unutmadı, qoruyub yaşatdı. Buna görə də, təsadüfi deyil ki, bu gün Azərbaycan Avropa ilə Asiyanın qovuşuğunda yerləşən milli köklərinə sahib bir ölkə kimi Türk dünyasını birləşdirən önəmli həlqə rolunu oynayır.
Bu baxımdan, Azərbaycan-Türkiyə münasibətlərində xalqların qardaşlığı faktoru mühüm dəyər kimi çıxış edir. Məhz bu amil regionda gedən proseslərin mürəkkəbliyinə, xarici qüvvələrin təzyiqlərinə, daxildəki bəzi təxribatçı dairələrin fəaliyyətinə, Ermənistanın və erməni lobbisinin hiylələrinə baxmayaraq, Azərbaycan-Türkiyə münasibətlərini yüksək səviyyədə saxlamağa kömək edir. çünki hər iki ölkənin əhalisi regionda və dünyada gedən proseslərə ayıq yanaşır, Azərbaycanla Türkiyənin maraqlarına zidd olan istənilən təxribata öz təpkisini göstərir. Fevral ayının 26-da Xocalı soyqırımının 20-ci ildönümü ilə əlaqədar Azərbaycanda və Türkiyədə keçirilən yürüş-mitinqlər də iki ölkənin bir-birinə dəstəyinin nümayişi idi. Eyni zamanda, fevralın 28-də Fransanın Konstitusiya Şurasının bu ölkə parlamentinin qəbul etdiyi qondarma “erməni soyqırımı”nı inkar edənlərin cəzalandırılmasını nəzərdə tutan qanunu ləğv etməsi də məhz Azərbaycanla Türkiyənin həm dövlət rəhbərlikləri, həm də xalqları arasındakı birliyinin, həmrəyliyinin, bu məsələyə göstərilən birgə təpkinin nəticəsidir. Yəni, gündən-günə möhkəmlənən Azərbaycan-Türkiyə dostluq və qardaşlıq münasibətləri həm Ermənistana və erməni lobbisinə, həm də dünyadakı ermənipərəstlərə, bu ölkənin havadarlarına, antitürk düşüncəli dairələrə mühüm mesajdır.
Bu gün Azərbaycanla Türkiyə arasındakı siyasi münasibətlərin yüksək səviyyədə qorunub saxlanmasında iki ölkə xalqlarının qardaşlığı və dostluğu önəmli təsirə malikdir. Bu yaxınlarda Türkiyənin “TRT” kanalına müsahibə verən Prezident İlham Əliyev iki qardaş ölkəni birləşdirən dəyərləri yüksək qiymətləndirib: “Biz yaxın xalqıq. Bir-birimizə çox yaxınıq. Bizim dilimiz də bir-birinə çox oxşayır, tariximiz də, kökümüz də birdir. Ən önəmlisi ondan ibarətdir ki, bizim maraqlarımız da üst-üstə düşür”.
Bir sözlə, dostluq və qardaşlıq münasibətləri iki ölkə əlaqələrini daha möhkəm və davamlı edir. Rəsmi Bakı və rəsmi Ankara prinsipial məsələlərdə bir-birinin mövqeyini dəstəkləyirlər. Ermənistan-Azərbaycan, Dağlıq Qarabağ münaqişəsinin həllində Türkiyə hər zaman Azərbaycanın yanındadır. Eyni zamanda, Türkiyəyə qarşı yönələn qondarma “erməni soyqırımı” ittihamları ilə mübarizədə Azərbaycan aktiv fəaliyyət göstərir.
Qeyd etdiyimiz kimi, bəzi antitürkçü qüvvələrin Azərbaycanla Türkiyə arasındakı dostluq və qardaşlıq münasibətlərinə zərbə vurmaq cəhdlərinə baxmayaraq, strateji müttəfiqlik xarakteri daşıyan iki ölkənin əlaqələri yüksək səviyyədədir. Regionda mühüm siyasi, iqtisadi aktorlar olan Azərbaycanla Türkiyənin müxtəlif sahələrdə qurduğu bərabərhüquqlu və qarşılıqlı-faydalı əlaqələr daim inkişaf etməkdədir. Məlum olduğu kimi, Azərbaycanla Türkiyə arasındakı iqtisadi əlaqələr elə bir yüksək inkişaf səviyyəsinə çatıb ki, artıq bu əlaqələr iki ölkə münasibətləri çərçivəsindən çıxaraq regional və qlobal əhəmiyyətli əməkdaşlığa çevrilib. Hazırda fəaliyyət göstərən Bakı-Tbilisi-Ceyhan və Bakı-Tbilisi-Ərzurum neft və qaz kəmərləri, tikilməkdə olan Bakı-Tbilisi-Qars dəmiryol xətti də ortaq maraqlar əsasında qurulan əməkdaşlığın nəticəsidir.
Beləliklə, Azərbaycan-Türkiyə dostluğu və qardaşlığı möhkəm əsaslar üzərində inkişaf edir. Heç bir təxribat və yalan bu münasibətlərin inkişafına mane olmaq gücündə deyil.

Paylaş:

Baxılıb: 1197 dəfə