O bizim Mehribandır

Bakı:

26 °C

52 %

4 m/s

Əlaqə

AZ RU EN

Ana səhifə / Gündəm / O bizim Mehribandır

O bizim Mehribandır

05.05.2022 [09:46]

Mehriban Əliyeva: Əziz analar, mən bir ana kimi sizin qarşınızda baş əyirəm. Siz elə övladlar böyütmüsünüz ki, bu gün bütün xalq onlarla fəxr edir.

İlhamə HƏKİMOĞLU

Qarabağ uğrunda müqəddəs müharibəmizin ilk günləriydi. Qəhrəman ordumuzun zəfərlərinin ardı-arası kəsilmirdi. Amma şəhid, qazi xəbərləri də alırdıq. Heç bir qələbə itkisiz qazanılmır çünki. Prezident İlham Əliyev və Birinci vitse-prezident Mehriban Əliyeva qazilərin görüşünə getmişdi. Dövlət başçısı ilə görüş yaralı hərbiçilərə ruh verir, vətən uğrunda sağlamlıqlarını itirsələr də, gözləri qürurla parlayırdı. Yalnız onun gözlərində yaş gilələnmişdi. Mehriban xanım kövrəlmiş, göz yaşlarını, qəhərini, şəhidlərimiz üçün ürək sızıltısını gizləyə bilməmişdi. Hər görüşdə öz doğma qardaşlarını, balalarını görürmüş kimi yaxınlaşırdı hərbçilərə. Bu görüşlərə dövlət başçısının xanımı, Birinci vitse-prezident kimi yox, ana şəfqəti, ana nəvazişi, ana böyüklüyü ilə gəlirdi. Mehriban xanım bundan öncə də şəhid və qazi ailələrinə öz himayəsini, qayğısını əsirgəməmiş, bir rəhbər təmkini ilə yanaşı, həm də el anası qayğısını sərgiləmişdi.

Hələ 2016-cı ildə Heydər Məscidində Mehriban Əliyeva adından Aprel döyüşlərində şəhid olmuş hərbçilərə ehsan verildi. Azərbaycanın birinci xanımı balasını itirmiş analara, atasız qalmış uşaqlara, ərini itirmiş gəlinlərə başsağlığı verəndə də kövrəldiyini gizlədə bilməmişdi, lakin hər kəs yaxşı bilirdi ki, bu zəiflik deyil. Ürəyi şəhid yarası almış hər qadın yaxşı bilirdi ki, bundan sonra arxasında Mehriban xanım kimi böyük bir dayaq olacaq.

O, Vətən uğrunda canından keçmiş şəhidlərin ailələrinə qayğı məqsədilə başlatdığı hər yeni layihəyə, keçirdiyi hər bir tədbirə qadın zərifliyini, ana ürəyinin hərarətini qatırdı.

Hər dəfə qazilərlə görüşdə onlara olan dərin hörmətini, belə qardaşları olduğu üçün qürurlandığını dilə gətirirdi: “Siz hər bir insan üçün çox dəyərli olan sağlamlığınızı Vətən, torpaq yolunda qurban vermisiniz. Siz güllələr, bombalar altında Azərbaycan uğrunda, torpağımız, Vətənimiz uğrunda həyatınızı qurban verməyə hazır olmusunuz. Mən fəxr edirəm ki, Azərbaycanın belə oğulları var, mənim belə qardaşlarım var”.

O, İlham Əliyevin xanımı olmaqla yanaşı, sədaqətli yol yoldaşıdır. Bu illər ərzində dövlət başçısının dəmir iradəsini, qətiyyətini Mehriban xanımın şəfqəti və mərhəməti tamamladı. Onlar dövləti himayə edən qoşa qanad kimidirlər. Biri digərinə güc verir. İlham Əliyevin yanında və arxasında ən birinci o dayandı, ona arxa-dayaq olduğunu hiss etdirdi. Atdığı hər bir addım İlham Əliyevin yürütdüyü siyasətin davamı oldu, Mehriban xanım Azərbaycanda humanizmin, yumşaq gücün simvoluna çevrildi.

2018-ci ilin aprelində yenidən dövlət başçısı seçildikdən sonra Prezident İlham Əliyevin ilk imzaladığı Fərman məhz şəhid ailələri ilə bağlı idi. Şəhid ailələrinə və müharibə veteranlarına qayğı dövlətin prioritetinə çevrilmişdi və bu vəzifəni öz üzərinə məhz Mehriban xanım çəkmişdi.

Müharibə əlillərinin əksəriyyəti Birinci vitse-prezidentin köməyi ilə dünyanın nüfuzlu xəstəxanalarında müalicə alır. Onun hamiliyi ilə Heydər Əliyev Fondu “2016-cı ilin Aprel döyüşlərində yaralanmış əsgər və zabitlərin yüksək texnologiyalı protezlərlə təmin edilməsi” layihəsini həyata keçirir. Ötən müddət ərzində yüzlərlə zabit və əsgər yüksək texnologiyalı protezlərlə təmin olunub. II Qarabağ müharibəsində şəhid və qazi olanların ailələrinə də eyni şəkildə qayğı göstərilir. İllər keçdikcə şəhid və qazi ailələrinin sosial müdafiəsi daha da gücləndiriləcək.

Onun humanitar yöndə zəngin, fədakar, səriştəli fəaliyyəti digər dövlətlərin birinci xanımlarına örnək olmalıdır. Mehriban xanımın ictimai-siyasi istiqamətdə gördüyü bütün işlər Azərbaycanın daha da qüdrətlənməsi, çiçəklənməsi istiqamətində verilmiş töhfədir.

Sevgi və hörmət elə bir duyğudur ki, kimsə onu zorla və ya sifarişlə əldə edə bilməz. Sevgi və hörmət insanın öz şəxsi keyfiyyətləri, xarakter özəllikləri əsasında qazanılır. Xalq onun mərhəmətini, şəfqətini, diqqətini, qayğısını sevdi. Mehriban xanım əyilib yaşlı bir ananın qarşısında diz çökəndə, bir şəhid anasını qucaqlayıb, ürəyi onunla birlikdə yananda, ağbirçək bir nənənin əllərindən öpəndə, şəhid balasını köksünə sıxanda, qazimizin yarasına sığal çəkəndə könlümüzdə taxt qurdu.

Başqalarının dərdinə şərik olmaq, köməyə ehtiyacı olana yardım əlini uzatmaq, sosial problemləri yalnız dövlətə yükləmədən, həllinə elliklə çalışmaq, cəmiyyətin bütün təbəqələrini həmin problemlərin həllinə cəlb etmək, xalqın birliyi, sosial rifahının yüksəlməsi naminə fəaliyyət - bax, budur onun missiyası. Ona inam sonsuzdur. Təsadüfi deyil ki, hər gün ünvanına minlərlə ümid dolu məktublar uçur. O, Azərbaycan ailələrinin güvəndiyi, inandığı xeyirxah mələkdir. Müraciət edən hər kəs mütləq şəkildə dəstək alacağına əmindir. Çünki öz dediyi kimi, o, bizdən biridir, bizim Mehribandır.

Paylaş:

Baxılıb: 1104 dəfə