Humanitar sahələrin inkişafı Azərbaycan hökumətinin prioritetləri sırasındadır

Bakı:

25 °C

59 %

7 m/s

Əlaqə

AZ RU EN

Ana səhifə / Gündəm / Humanitar sahələrin inkişafı Azərbaycan hökumətinin prioritetləri sırasındadır

Humanitar sahələrin inkişafı Azərbaycan hökumətinin prioritetləri sırasındadır

04.02.2010 [10:19]

Kifayət qədər geniş elmi potensiala malik olan Azərbaycanda müxtəlif sahələr üzrə yüksək səviyyəli savadlı və peşəkar kadrların yetişməsi üçün hər cür şərait yaradılıb
Azərbaycanda həyata keçirilən daxili siyasətin əsas istiqamətlərindən birini də humanitar sahələrin, o cümlədən, elmin, təhsilin, informasiya texnologiyalarının inkişafı təşkil edir. Təsadüfi deyil ki, sözügedən sahələrin inkişafı hər zaman dövlətin diqqət mərkəzindədir. Bu məqam dövlət büdcəsindən bu sahələrin inkişafına ayrılan vəsaitlərin ilbəil artmasında da özünü göstərir. Belə ki, 2008-ci illə müqayisədə ötən il təhsil xərcləri 17,2 faiz, səhiyyə xərcləri 16,2 faiz, mədəniyyət, incəsənət, informasiya xərcləri 12,9 faiz artıb. Qeyd edək ki, 2009-cu ilin böhran ili olduğunu nəzərə alsaq, bu, kifayət qədər yüksək göstəricidir.
Hər zaman olduğu kimi, bu gün də təhsilin inkişafı prioritet məsələlərdəndir. Məlumdur ki, bu məsələ bilavasitə ölkənin gələcəyini müəyyən edən amillər sırasındadır. Sevindirici haldır ki, kifayət qədər geniş elmi potensiala malik olan Azərbaycanda müxtəlif sahələr üzrə yüksək səviyyəli savadlı və peşəkar kadrların yetişməsi üçün hər cür şərait var. Dövlət başçımızın da bildirdiyi kimi, neft kapitalını insan kapitalına çevirmək bu gün qarşıya əsas məqsəd kimi qoyulub. Bu məqsədlə də təhsil sahəsinin inkişafına hər il böyük miqdarda vəsait ayrılır. Artıq neçə illərdir ki, tendensiya halını almış yeni orta məktəblərin tikintisi respublikamızın ən ucqar regionlarını da əhatə edir. Təkcə 2009-cu ildə 64 məktəbin inşa olunması faktı görülən işlərin miqyasından xəbər verir. Təhsilin inkişafı üzrə həyata keçirilən tədbirlər ali təhsil ocaqlarını da əhatə edir. Hazırda ali məktəblərdə Avropa təhsil sisteminə keçidlə əlaqədar mütərəqqi islahatlar həyata keçirilir. Eləcə də, təhsil işçilərinin əmək haqları müntəzəm olaraq artırılır. ümumilikdə, təhsil sahəsinin inkişafı məqsədilə artıq 15 proqram qəbul edilib və əldə olunan nəticələr bu proqramların uğurla reallaşdırılmasını göstərir. Eyni zamanda, azərbaycanlı gənclərin müxtəlif ölkələrdə keçirilən elm-təhsil olimpiadalarında yüksək səviyyədə iştirakı və respublikamızda təşkil olunan beynəlxalq olimpiadalar sayəsində Azərbaycan dünyada elm, təhsil ölkəsi kimi tanınır.
Təhsillə yanaşı, müasir cəmiyyət həyatını informasiya-kommunikasiya texnologiyaları (İKT) olmadan təsəvvür etmək çətindir. Təqdirəlayiq haldır ki, Azərbaycanda bu sahə çox sürətlə inkişaf edir. Təkcə onu demək kifayətdir ki, 2009-cu ildə ölkəmizdə İKT-nin inkişaf tempi dünya üzrə göstəricilərdən yüksək olub. Sözügedən sahənin inkişafı təhsil sisteminə də müsbət təsir göstərir. Belə ki, ölkəmizdə internet şəbəkəsinin genişləndirilməsi çərçivəsində bir çox məktəblərin şəbəkəyə qoşulması təmin edilib. Rabitə və İnformasiya Texnologiyaları Nazirliyi ilə Təhsil Nazirliyinin birgə həyata keçirdiyi “Xalq kompüteri” layihəsi isə vətəndaşlara bazar qiymətlərindən aşağı və faizsiz kreditlə kompüter almağa imkan verir. İKT sahəsinin inkişafının daha bir göstəricisi ölkəmizdə 2009-cu ilin dekabrından etibarən geniş imkanlar yaradan 3G xidmətlərinin tətbiqinə başlanılmasıdır. Hazırda Azərbaycanda kosmik sənayenin yaradılması istiqamətində də ciddi işlər görülür. Belə ki, “Azərbaycan Respublikasında kosmik sənayenin yaradılması və inkişafı üzrə Dövlət Proqramı” və dövlət başçısının bu məsələ ilə bağlı Sərəncamına uyğun olaraq həyata keçirilən tədbirlər nəticəsində xarici şirkətlərlə əməkdaşlıq qurulub və 2012-ci ildə Azərbaycana məxsus süni peykin orbitə çıxarılacağı gözlənilir. Prezident İlham Əliyevin Nazirlər Kabinetinin 2009-cu ilin sosial-iqtisadi inkişafının yekunlarına həsr olunmuş iclasında da bildirdiyi kimi, Azərbaycanda İKT-nin inkişafı üçün çox gözəl imkanlar var: “Xüsusilə, dünyada sürətlə inkişaf edən informasiya texnologiyaları sahəsində biz hər zaman bir addım öndə olmalıyıq, rəqibləri də, zamanı da qabaqlamalıyıq”.
Qeyd etmək lazımdır ki, təhsil, elm, kommunikasiya texnologiyalarının inkişafı regionların sosial-iqtisadi inkişaf proqramlarında da öz əksini tapıb və bu proqramların uğurla reallaşdırılması humanitar sahələr üzrə gələcəkdə daha böyük nailiyyətlərin əldə olunacağını əminliklə söyləməyə imkan verir.
Hülya MƏMMƏDLİ

Paylaş:

Baxılıb: 1412 dəfə