Yeni etiraz aksiyalarının başlanması məğlub Ermənistanda siyasi gərginliyin hökm sürdüyünü göstərir

Bakı:

26 °C

45 %

5 m/s

AZ RU EN

Ana səhifə / Dünya / Yeni etiraz aksiyalarının başlanması məğlub Ermənistanda siyasi gərginliyin hökm sürdüyünü göstərir

Yeni etiraz aksiyalarının başlanması məğlub Ermənistanda siyasi gərginliyin hökm sürdüyünü göstərir

26.06.2021 [08:27]

Ermənistanda seçkisonrası mərhələdə siyasi gərginlik davam edir. Xüsusilə seçkidən sonra müxalifət nümayəndələrinə təzyiqlər göstərilməsi Ermənistanda yeni etiraz aksiyalarının baş verməsinə səbəb olub. Belə ki, müxalif siyasi qüvvələrin təmsilçiləri repressiyalarla bağlı baş prokurorluğun qarşısında aksiyalar keçirirlər. Digər tərəfdən, vətəndaşlar da müxtəlif səbəblərdən hökumət binası qarşısında fasiləsiz aksiyaya başlayıblar. Erməni mediası yazır ki, bütün bunların fonunda həm seçkilərdə qalib gələn Paşinyan, həm də seçkilərin nəticələrini tanımayan müxalifət növbəti addım üçün seçkilərin rəsmi nəticələrinin elan olunacağı 27 iyun tarixini gözləyir.

Yeri gəlmişkən, “Newsarmenia.am” yazır ki, Ermənistan Mərkəzi Seçki Komissiyasının (MSK) qərarına əsasən, 70 seçki məntəqəsində yenidən sayım aparıldıqdan sonra seçkinin ilkin nəticələrinə təsir edəcək rəqəmlər ortaya çıxmayıb. Saytın digər məlumatına görə, əvvəlki parlamentdə ikinci müxalifət partiyası kimi təmsil olunan “Maariflənən Ermənistan” partiyasının sədri Edmon Marukyan seçkinin ilkin nəticələrini qəbul etdiklərini söyləyib. Paşinyanla görüşü də şərh edən E.Marukyan deyib ki, ona vəzifə təklif edilməyib: “Görüş zamanı Paşinyan parlamentdənkənar qüvvələrlə əməkdaşlıq formatı yaratmaq fikrinin olduğunu söylədi, ancaq onun hansı formada olacağı hələ aydın deyil”.

Qeyd edək ki, hələlik hökuməti qura bilməsə də, Paşinyanın yeni hökumətdə nazir vəzifələrinə kadr axtarışındadır. “Joğovurd” qəzeti yazır ki, hakimiyyət xüsusilə boş qalan xarici işlər naziri vəzifəsinə münasib namizəd axtarır. Qəzetin yazdığına görə, bu məsələ “Vətəndaş müqaviləsi” partiyasında qızğın şəkildə müzakirə olunur.

“News.am” isə yazır ki, hakimiyyət yeni hökumət formalaşana qədər müdafiə nazirliyində də “təmizləmə” işləri aparmağa başlayıb. Belə ki, 25 iyunda Ermənistan prezidentinin müvafiq fərmanları ilə mühəndis qoşunlarının rəisi İşxan Matevosyan və hava hücumundan müdafiə qoşunlarının rəisi Armen Vardanyan vəzifələrindən azad olunublar.

Polittexnoloq Armen Badalyan isə “Aysor.am”a verdiyi açıqlamada Ermənistanda qurulacaq yeni hökumətin uğur qazanacağına şübhə ilə yanaşdığını dilə gətirib. Onun sözlərinə görə, problem hakim siyasi qüvvənin və onun liderinin 2018-ci ildən bu günə qədər Ermənistanın inkişafı barədə heç bir konkret proqramının olmamasındadır. Müxalifətin fəaliyyətinə toxunan ekspert bütün hallarda hüquqi proseslərin izlənilməli olduğunu, qanun pozuntularına Ermənistanda və ölkə xaricindəki məhkəmə orqanlarında baxılmasının vacibliyini bildirib.

Beləliklə, məğlub ölkədə müşahidə edilənlər göstərir ki, Ermənistanda siyasi böhran aradan qalxmayıb. Hələ formalaşmayan hökumətin fəaliyyətinin səmərəsiz olacağı barədə söylənilənlər də yaxın zamanlarda Ermənistanda vəziyyətin sabitləşməyəcəyindən xəbər verir.

Qaşqay ZİYƏDDİNOĞLU

Paylaş:

Baxılıb: 881 dəfə