Ermənistanda seçki baş tutsa da, siyasi qarşıdurma səngimir

Bakı:

26 °C

49 %

2 m/s

Əlaqə

AZ RU EN

Ana səhifə / Dünya / Ermənistanda seçki baş tutsa da, siyasi qarşıdurma səngimir

Ermənistanda seçki baş tutsa da, siyasi qarşıdurma səngimir

22.06.2021 [08:49]

Məlum olduğu kimi, 20 iyun tarixində Ermənistanda növbədənkənar parlament seçkiləri keçirilib. İlkin nəticələrə görə, baş nazir vəzifəsini icra edən Nikol Paşinyanın rəhbərlik etdiyi “Vətəndaş müqaviləsi” partiyası seçkilərdə qalib gəlib.
Qeyd edək ki, iyunun 21-də səhərə yaxın Ermənistan ərazisində mövcud olan 2008 seçki məntəqəsində səslərin sayılması prosesi yekunlaşdıqdan sonra Ermənistan Mərkəzi Seçki Komissiyasının (MSK) sədri Tiqran Mukuçyan mətbuat konfransı keçirərək ilkin nəticələri elan edib. “News.am”ın yaydığı məlumata görə, seçicilərin 53,92 (687,414) faizi Paşinyanın sədri olduğu “Vətəndaş müqaviləsi” partiyasına, 21,04 (268,300) faizi Robert Koçaryanın rəhbərlik etdiyi “Ermənistan” blokuna, 5,23 (66,647) faizi təhlükəsizlik xidmətinin keçmiş direktoru Artur Vanetsyanın rəhbəri olduğu “Şərəfim var” blokuna səs verib. İş adamı Qagik Çarukyanın “Çiçəklənən Ermənistan” partiyası 3,95 (50.419) faiz səslə dördüncü yerlə kifayətlənməli olub. MSK sədri T.Mukuçyanın qeyd edib ki, təqdim olunan məlumatlar ilkindir, yekun nəticələr səsvermədən yeddi gün sonra elan olunacaq.
Erməni mediası yazır ki, ənənəyə uyğun olaraq Ermənistanda keçirilən budəfəki seçkilər də insidentsiz ötüşməyib. Eyni zamanda, seçki günü ciddi qanun pozuntularına da rast gəlinib. Belə ki, bəzi məntəqələrdə çox sayda bülletenin seçki qutularına bir nəfər tərəfindən atılması halları da qeydə alınıb.
“Panorama.am” yazır ki, Ararat vilayətində seçki məntəqələrindən birində atışma olub. İnsident Ararat vilayətinin Masis rayonunun Azataşen kəndindəki seçki məntəqəsinin yaxınlığında baş verib. Ermənistan polisinin verdiyi məlumata görə, seçki məntəqəsinin kənarında iki siyasi qüvvənin - “Çiçəklənən Ermənistan” partiyası ilə Verelk (“Yüksəliş”) partiyası nümayəndələri arasında mübahisə tapançadan atəş açılmasına qədər gedib çıxıb. Sayt yazır ki, seçki günü “Şirinyan-Babacanyan demokratlar alyansı” blokundan baş nazir vəzifəsinə namizəd, keçmiş deputat Arman Babacanyanın avtomobili də atəşə tutulub.
Bu arada, N.Paşinyan “Vətəndaş müqaviləsi” partiyasının Ermənistanın yeni hökumətini quracağını bildirib. “Aysor.am”ın yazdığına görə, Paşinyan bəyan edib ki, yeni parlamentdə “Vətəndaş müqaviləsi” partiyası konstitusiya çoxluğuna malik olduğu üçün hökuməti qurmaq hüququ əldə edəcək.
Göründüyü kimi, seçki baş tutsa da, məğlub ölkədəki hazırkı vəziyyət onu deməyə əsas verir ki, Ermənistanda siyasi qarşıdurma səngiməyəcək. Belə ki, hakim partiyanın əsas rəqibi “Ermənistan” blokunun deputat mandatlarından imtina məsələsi də gündəmdədir. Ekspertlərin fikrincə, ölkədə yenidən kütləvi etiraz aksiyaları başlaya bilər.
Qaşqay ZİYƏDDİNOĞLU

Paylaş:

Baxılıb: 966 dəfə