Ermənistanda siyasi böhranın növbəti mərhələsi...

Bakı:

20 °C

68 %

2 m/s

Əlaqə

AZ RU EN

Ana səhifə / Dünya / Ermənistanda siyasi böhranın növbəti mərhələsi...

Ermənistanda siyasi böhranın növbəti mərhələsi...

22.01.2021 [20:54]

Siyasi qüvvələr arasındakı qarşıdurma və hökümət daxilindəki yeni istefa dalğası məğlub ölkədə tənəzzülün dərinləşməsini şərtləndirir

Məlum olduğu kimi, məğlub Ermənistanda artıq neçə aydır davam edən xaos və siyasi böhran özünün növbəti mərhələsinə qədəm qoyub. Parlamentdən kənarda olan və hökumətin istefasını tələb edən siyasi qüvvələrin istəklərinə etinasız yanaşan baş nazir Nikol Paşinyan yaranmış vəziyyətdə guya növbədənkənar parlament seçkilərinə razı olduğunu nümayiş etdirir. Erməni mediası isə yazır ki, bu məsələni ortaya atmaqla Paşinyan etirazların səngiməsi üçün vaxt qazanmağa çalışır. Buna baxmayaraq, etiraz aksiyaları və hakim komandadan yeni istefa dalğası hökumətin gələcəyi üçün yaxşı heç nə vəd etmir.

Belə ki, son günlər hökumət daxilində yeni istefa dalğasının başlanması müşahidə edilir. “News.am” yazır ki, Təhsil, elm, mədəniyyət və idman nazirinin müavini Narine Xaçatryan istefa verib. Hökumətin mətbuat xidmətindən bu məlumatı təsdiq etsələr də, istefanın səbəbi dəqiq açıqlanmır. Bu arada, Şirak vilayətinin qubernatoru Tiqran Petrosyanın vəzifəsindən istefa verməsi də yeni istefa dalğasının ilk təzahürləri kimi qiymətləndirilir.

“Joxovurd” qəzeti isə yazır ki, Ermənistan hakimiyyəti növbədənkənar seçki təklifini gündəmdən çıxarmayıb. Qəzetin yazdığına görə, Paşinyan müxtəlif siyasi xadimlərlə görüşüb, eyni seçki blokunda seçkilərə getməyi təklif edib. Nəşrin yaydığı digər məlumata görə, baş nazir Arman Babacanyanın “Respublika uğrunda” partiyasını və Edmon Marukyanın partiyasını bu bloka daxil etmək niyyətindədir. “Maariflənən Ermənistan” partiyasının və parlamentdəki fraksiyasının rəhbəri E.Marukyan isə bu müzakirələri öz arzusunu yerinə yetirmək üçün şans hesab edib. “News.am”ın yazığına görə, müxalifət partiyasının sədri baş nazir olmaq istəyini Ermənistan hakimiyyətinə böhrandan alternativ çıxış yolu kimi təqdim edib: “Mən baş nazirə və komandasına baş nazir seçilməyimlə bağlı memorandum imzalamağı təklif etdim”.

E.Marukyanın təklifinə görə, parlamentdə təmsil olunan 3 siyasi qüvvə arasında baş nazir postuna öz namizədlərini irəli sürməmək üçün razılıq əldə edilir, 2021-ci ilin 1 oktyabrında parlament buraxılır və növbədənkənar seçkilərə gedilir. Qeyd edək ki, E.Marukyanın bu təklifini bir çox ekspertlər ölkə daxilində ciddi ittihamlarla üz-üzə qalan Paşinyanın xilası üçün hazırlanmış plan kimi dəyərləndirirlər.

Bu arada “168.am” saytının “Pressing” proqramına müsahibə verən Ağası Yenokyan Ermənistandakı mövcud vəziyyəti dəyərləndirərkən deyib ki, biz ölkəni idarə edə bilməyən hakimiyyətə və bu hakimiyyəti devirə bilməyən müxalifətə sahib olduğumuzu görürük: “Hakimiyyətlərin artıq heç bir mənəvi və siyasi haqqı yoxdur, müxalifət isə hökumətə mitinqlərlə mənəvi təzyiq göstərməyə çalışır. Hakimiyyətdəkilər şərəf, vicdan, ləyaqət kimi mənəvi dəyərlərə malik olmadıqları üçün onlara mənəvi təzyiq göstərmək mənasız vaxt itkisidir, əlavə yollar axtarmaq lazımdır”.

Ekspert onu da bildirib ki, müharibədəki itkilərin 5000-dən çox olması ortaya çıxdığı halda, baş verəcək iğtişaşlardan qorxan Paşinyan hakimiyyəti “hərbi əsir” məsələsi ilə manipulyasiya edir.

Göründüyü kimi, müharibədən məğlubiyyətlə çıxmış Ermənistanda bütün sahələr iflic vəziyyətinə düşdüyü üçün çıxış yolu tapa bilməyən baş nazir N.Paşinyan vaxt qazanmaq istəyir. Amma cəmiyyətin əksər hissəsinin istefasını tələb etdiyi halda kreslodan əl çəkməyən Paşinyanın uğur qazanacağı şübhəlidir. Ekspertlərin fikrincə, Paşinyan Ermənistanı məhvə aparır, çünki hələ də apatiya vəziyyətindən çıxa bilməyən cəmiyyət onun ölkəyə vurduğu zərərin təsirini indi hiss etməsə də, yaxın gələcəkdə mütləq görəcək.

Qaşqay ZİYƏDDİNOĞLU

Paylaş:

Baxılıb: 944 dəfə