Almaniya parlamentində miqrasiya siyasəti ilə bağlı yeni qanun layihəsi müzakirə olunur

Bakı:

26 °C

53 %

3 m/s

Əlaqə

AZ RU EN

Ana səhifə / Dünya / Almaniya parlamentində miqrasiya siyasəti ilə bağlı yeni qanun layihəsi müzakirə olunur

Almaniya parlamentində miqrasiya siyasəti ilə bağlı yeni qanun layihəsi müzakirə olunur

31.01.2025 [21:53]

Almaniya parlamentinin yanvarın 31-də keçirilən iclasında Xristian Birlik (CDU/CSU) partiyalarının irəli sürdüyü miqrasiya siyasəti ilə bağlı yeni qanun layihəsi müzakirə olunur. Ölkəyə miqrant axınının məhdudlaşdırılmasını nəzərdə tutan layihə ilə bağlı müzakirələrdən sonra səsvermə keçiriləcək.

AZƏRTAC xəbər verir ki, bu layihə parlamentdə qəbul olunduqdan sonra Federal Əyalətlərin Nümayəndələri Şurası (Bundesrat) tərəfindən təsdiqlənməlidir. Burada da lazımi səs çoxluğu təmin edildiyi təqdirdə qanun hüquqi qüvvəyə minməsi üçün Federal Prezident Frank-Valter Ştaynmayer tərəfindən imzalandıqdan sonra rəsmi qaydada yayımlanmalıdır.

Layihədə üçüncü ölkələrdən Almaniyaya axının məhdudlaşdırılması nəzərdə tutulur. 2023-cü ildə “məhdudlaşdırma” ifadəsi qanunun mətnindən çıxarılmışdı.

Qanun layihəsində ciddi mübahisələrə səbəb olan maddələrdən biri də mühacirlərin ailə üzvlərini də Almaniyaya gətirməsini nəzərdə tutan “ailə birləşməsi”nin dayandırılmasıdır. Bundan başqa, layihədə miqrantların deportasiya prosesi zamanı polisin səlahiyyətlərinin artırılması da yer alıb.

İfrat sağçı Almaniya üçün Alternativ Partiyası bu dəfə də CDU-ya dəstək verir. AfD ilə yanaşı, koalision hökuməti tərk edən liberal Azad Demokrat Partiyası (FDP) və sol populist Sahra Vaqenknext İttifaqı (BSW) qanun layihəsinin lehinə səs verəcəklərini açıqlayıb. Bu vəziyyətdə qanun layihəsinin qəbulu üçün lazımi yetərsay (367) təmin edilmiş olur.

Xatırladaq ki, əsas müxalifət partiyası olan Birlik partiyalarının hazırladığı və Almaniyadakı miqrasiya siyasətinin sərtləşdirilməsini nəzərdə tutan beş maddəlik qətnamə yanvarın 29-da parlamentdəki səsvermədə AfD-nin də dəstəyi ilə 345 səsə qarşı 348 səslə qəbul edilmişdi. AfD səsvermədən əvvəl qətnamənin lehinə səs verəcəyini bəyan etmişdi. Fridrix Mertsin isə əvvəllər dəfələrlə verdiyi açıqlamaların əksinə, AfD ilə əməkdaşlıqdan imtina etməməsi ciddi müzakirələrə yol açmışdı. Çünki CDU/CSU-nun bununla “yanğın divarı” olaraq adlandırılan, digər partiyaların AfD ilə heç bir əməkdaşlığa getməməsi barədə siyasətə qarşı çıxdığı hesab edilir. Bu da ölkədə seçkiqabağı siyasi mühitin daha da gərginləşməsinə səbəb olub.

Almaniyanın müxtəlif şəhərlərində, o cümlədən Berlin, Münxen, Frayburq, Hannover, Drezden, Mayntsda on minlərlə insan meydan və küçələrə axışaraq CDU/CSU-nun təklifinin AfD-nin dəstəyi ilə qəbul olunmasına sərt etirazlarını bildiriblər.

Partiyanın üzvü, tanınmış publisist Mişel Fridman CDU sıralarından istefa verdiyini açıqlayıb.

2005-2021-ci illərdə Almaniyanın Kansleri, 2000-2018-ci illərdə isə CDU-nun lideri olmuş Angela Merkel partiyanın hazırkı rəhbəri və Birliyin Kansler vəzifəsinə namizədi Fridrix Mertsin hazırladığı təklifin AfD-nin dəstəyi ilə parlamentdə qəbul olunmasını tənqid edib. O, Bundestaqdakı səsvermədə ilk dəfə AfD-nin səsləri ilə üstünlüyün təmin edilməsinin doğru olmadığını bildirib.

Paylaş:

Baxılıb: 507 dəfə