Ənənə, yenilik və davamlı inkişaf

Bakı:

19 °C

88 %

10 m/s

Əlaqə

AZ RU EN

Ana səhifə / Arxiv / Ənənə, yenilik və davamlı inkişaf

Ənənə, yenilik və davamlı inkişaf

20.10.2026 [08:51]

Etibarlı enerji təminatı iqtisadi inkişafın dayağıdır...

Enerji təhlükəsizliyi hər bir ölkənin iqtisadi və milli təhlükəsizliyinin vacib tərkib hissəsidir. Elektrik enerjisinin sabit istehsalı, etibarlı ötürülməsi və fasiləsiz paylanması insanların gündəlik həyatına, müəssisələrin fəaliyyətinə və dövlət xidmətlərinin davamlılığına təsir göstərir. Azərbaycan üçün bu məsələnin əhəmiyyəti ölkənin həm zəngin enerji resurslarına, həm də regional enerji əməkdaşlığında tutduğu mövqeyə bağlıdır. Enerji sisteminin möhkəmləndirilməsi daxili tələbatın etibarlı qarşılanmasına, iqtisadi inkişafın dəstəklənməsinə və ölkənin beynəlxalq enerji əlaqələrinin genişlənməsinə şərait yaradır.

Artıq 22 ildir ki, oktyabrın 20-si ölkəmizdə energetiklərin peşə bayramı kimi qeyd olunur. Energetiklər Günü Azərbaycanın həyatında xüsusi əhəmiyyət kəsb edən əlamətdar hadisə ilə bağlıdır: 45 il əvvəl, 1981-ci il oktyabrın 20-də “Azərbaycan” istilik elektrik stansiyasının (İES) birinci enerji bloku Heydər Əliyevin təşəbbüsü və bilavasitə rəhbərliyi ilə istifadəyə verilib. Bununla da Azərbaycan elektroenergetikasının inkişafında yeni mərhələnin əsası qoyulub. Prezident İlham Əliyevin 2004-cü il 13 oktyabr tarixli Sərəncamı ilə həmin tarixin ölkəmizdə Energetiklər Günü kimi təsis edilməsi milli elektroenergetika salnaməmizin daha bir parlaq səhifəsi, ölkə rəhbərliyinin bu sahədə çalışan insanların fədakar əməyinə verdiyi böyük dəyərin ifadəsidir.

100 faiz enerji təhlükəsizliyi...

Ötən illər ərzində respublikamızın energetika kompleksinin, o cümlədən elektrik enerjisi sisteminin inkişafına xüsusi diqqət yetirib, bu sahədə misilsiz işlər görüb. Ölkə başçısı tərəfindən uğurla həyata keçirilən sosial-iqtisadi islahatlar Azərbaycanın güclənməsinə və qüdrətlənməsinə yönəlib. Prezidentin təşəbbüsü və rəhbərliyi ilə iqtisadiyyatın bütün sahələri, o cümlədən elektroenergetika üzrə də mükəmməl proqramlar qəbul edilərək reallaşdırılıb.

Bu gün Prezidentin rəhbərliyi ilə həyata keçirilən enerji siyasəti sovet dövründə və müstəqillik illərində bu sahədə görülmüş işləri, əldə edilmiş nəticələri nəinki məntiqi cəhətdən tamamlayır, eyni zamanda, elektroenergetika sisteminin müasir qlobal trendlərə uyğun inkişafını təmin edir. Azərbaycan dünya miqyasında nadir ölkələrdəndir ki, öz potensialı hesabına enerji təhlükəsizliyinin təminatına 100 faiz nail ola bilib.

Ənənədən müasirliyə: Azərbaycanın enerji salnaməsi

Azərbaycanın energetika tarixi ölkənin sənaye inkişafı, təbii sərvətləri və iqtisadi yüksəlişi ilə sıx bağlıdır. Neft sənayesinin formalaşması ilə başlayan böyük enerji təcrübəsi zaman keçdikcə elektrik enerjisi istehsalını, ötürülməsini və paylanmasını əhatə edən geniş bir sistemin yaranmasına zəmin yaradıb. Bu gün ölkəmizin energetika sektoru uzun illər ərzində toplanmış təcrübəni müasir texnologiyalarla birləşdirərək yeni inkişaf mərhələsinə qədəm qoyub. Elektrik stansiyalarının yenilənməsi, enerji sisteminin dayanıqlığının gücləndirilməsi, ötürücü və paylayıcı şəbəkələrin təkmilləşdirilməsi, rəqəmsal idarəetmə imkanlarının genişləndirilməsi bu istiqamətdə həyata keçirilən mühüm işlər sırasındadır.

Energetika sahəsində inkişafın əhəmiyyəti yalnız istehsal göstəriciləri ilə məhdudlaşmır. Etibarlı enerji təchizatı sənayenin rəqabət qabiliyyətinə, kənd təsərrüfatının inkişafına, xidmət sektorunun fəaliyyətinə və yeni iş yerlərinin yaradılmasına birbaşa təsir göstərir. Başqa sözlə, enerji sisteminə yatırılan sərmayə iqtisadiyyatın müxtəlif sahələrində yeni imkanların yaranmasına xidmət edir.

Ölkəmizin enerji siyasətində etibarlı təchizat, mövcud infrastrukturun müasirləşdirilməsi və enerji resurslarından səmərəli istifadə prioritet istiqamətlər kimi diqqət mərkəzindədir. Bu hədəflərin həyata keçirilməsində isə müasir avadanlıq qədər onu idarə edən, işlək saxlayan və daim təkmilləşdirən mütəxəssislərin bilik və bacarıqları da mühüm rol oynayır.

Qarabağda və Şərqi Zəngəzurda qurulan yeni enerji gələcəyi

İşğaldan azad edilmiş ərazilərdə aparılan bərpa və quruculuq işləri energetika sahəsi qarşısında da yeni vəzifələr müəyyənləşdirib. Burada yollar, yaşayış məntəqələri, sənaye və sosial obyektlərlə yanaşı, müasir enerji infrastrukturunun yaradılması da genişmiqyaslı quruculuğun mühüm istiqamətlərindən biridir.

Qarabağ və Şərqi Zəngəzurda elektrik yarımstansiyalarının və ötürücü xətlərin qurulması, mövcud şəbəkələrin yenidən təşkili, yeni yaşayış məntəqələrinin enerji təminatının yaradılması ərazilərin dayanıqlı inkişafı üçün mühüm əhəmiyyət daşıyır. Bu işlər doğma yurda qayıdan insanların rahat yaşayışı, sahibkarlıq fəaliyyətinin genişlənməsi və yeni iqtisadi imkanların formalaşması baxımından xüsusi önəm kəsb edir.

Azad edilmiş ərazilərdə həyata keçirilən hidroenerji layihələri də diqqətəlayiqdir. Su ehtiyatlarından istifadə etməklə elektrik enerjisi istehsal edən kiçik su elektrik stansiyalarının bərpası və yenilərinin yaradılması həm yerli enerji təminatına töhfə verir, həm də bərpaolunan enerji mənbələrinin inkişafını sürətləndirir.

Burada görülən işlərin simvolik mənası da var: uzun müddət quruculuqdan kənarda qalmış ərazilərdə işıqların yanması həyatın yenidən canlanmasının, inamın və gələcəyə ümidin rəmzinə çevrilir. Hər yeni enerji obyekti yalnız texniki qurğu deyil, həm də Böyük Qayıdışın infrastruktur dayaqlarından biridir!

Yeganə BAYRAMOVA

Paylaş:

Baxılıb: 19 dəfə

Xəbər lenti

Hamısına bax