Anım Günündən Zəfərə uzanan şanlı tarix

Bakı:

22 °C

68 %

2 m/s

Əlaqə

AZ RU EN

Ana səhifə / Arxiv / Anım Günündən Zəfərə uzanan şanlı tarix

Anım Günündən Zəfərə uzanan şanlı tarix

25.09.2026 [15:11]

27 Sentyabr – Anım Günü Azərbaycan xalqının yaddaşında dərin iz buraxmış, Vətən uğrunda canından keçən şəhidlərimizin müqəddəs xatirəsinin ehtiramla yad edildiyi tarixi gündür. Bu tarix həm böyük bir mübarizənin başlanğıcını, həm də xalqımızın milli iradəsinin, həmrəyliyinin və Vətən sevgisinin dünyaya nümayiş etdirildiyi şanlı bir salnamənin mühüm səhifəsini özündə yaşadır.
2020-ci il sentyabrın 27-də Ermənistan silahlı qüvvələrinin Azərbaycanın yaşayış məntəqələrini və hərbi mövqelərini atəşə tutması növbəti hərbi təcavüzə səbəb oldu. Azərbaycan Ordusu Ali Baş Komandanın rəhbərliyi ilə əks-hücum əməliyyatına başladı və 44 gün davam edən Vətən müharibəsi Azərbaycan tarixində misilsiz Zəfərlə başa çatdı. Müharibə ərzində Azərbaycan əsgər və zabitləri böyük qəhrəmanlıq, fədakarlıq və döyüş əzmi nümayiş etdirdilər.
Vətən müharibəsi Azərbaycan xalqının qarşısında dayanan ən mühüm tarixi məsələlərdən birinin həllinə yol açdı. Cəbrayıl, Füzuli, Zəngilan, Qubadlı rayonları, Şuşa şəhəri və digər yaşayış məntəqələri azad edildi. Azərbaycan Ordusunun döyüş meydanında qazandığı üstünlük nəticəsində uzun illər davam edən işğala son qoyulması istiqamətində həlledici nəticələr əldə olundu. Bu Qələbə dövlətimizin hərbi qüdrətini, xalqımızın milli birliyini və Vətən uğrunda mübarizə əzmini nümayiş etdirdi.
Lakin bu Zəfərin arxasında böyük itkilər və ağır sınaqlar dayanır. Azərbaycan torpaqlarının azadlığı uğrunda minlərlə hərbçimiz canından keçərək şəhidlik zirvəsinə ucaldı. Onların hər biri Azərbaycan tarixinin qəhrəmanlıq səhifəsinə öz adını yazdı. Şəhidlərin müqəddəs qanı ilə yazılan bu tarix gələcək nəsillər üçün Vətənə sədaqətin, milli iradənin və fədakarlığın nümunəsidir.
Məhz şəhidlərimizin əziz xatirəsinin əbədiləşdirilməsi məqsədilə Azərbaycan Respublikasının Prezidenti İlham Əliyevin 2 dekabr 2020-ci il tarixli Sərəncamı ilə sentyabrın 27-si ölkəmizdə Anım Günü elan edildi. Sərəncamda Vətən müharibəsində qəhrəmanlıq göstərən hərbçilərimizin, eləcə də arxa cəbhədə fədakarlıq göstərən vətəndaşlarımızın xidmətləri xüsusi vurğulanır.
Anım Günü yalnız keçmişi xatırlamaq deyil, həm də şəhidlərimizin bizə miras qoyduğu dəyərləri yaşatmaq deməkdir. Şəhidlərin xatirəsinə ehtiram onların ailələrinə göstərilən diqqət və qayğıda, qazilərimizin xidmətlərinin yüksək qiymətləndirilməsində, gənc nəslin vətənpərvərlik ruhunda tərbiyəsində, dövlətçilik və milli həmrəylik ideallarının qorunmasında öz ifadəsini tapır.
Bu gün şəhidlərimizin həyat yolu və qəhrəmanlığı Azərbaycan gəncləri üçün əsl məktəbdir. Onların Vətən qarşısındakı borcunu canları bahasına yerinə yetirməsi göstərdi ki, dövlətçilik yalnız siyasi və hüquqi institutlardan ibarət deyil; onun təməlində Vətənə bağlılıq, milli birlik, məsuliyyət və fədakarlıq kimi ali dəyərlər dayanır.
Anım Gününün əsas mənalarından biri də şəhidlərin xatirəsinin yalnız bir gün deyil, daim yaşadılmasıdır. Çünki tarixini unutmayan xalq gələcəyini daha möhkəm qurur. Şəhidlərin adı məktəblərdə, küçələrdə, park və xiyabanlarda yaşadılır, onların həyat yolu gənc nəsilə çatdırılır. Bu, həm milli yaddaşın qorunması, həm də gələcək nəsillərin Vətənə məsuliyyət hissinin gücləndirilməsi baxımından mühüm əhəmiyyət daşıyır.
Bu müqəddəs tarixdə xalqımız bir daha şəhidlərimizin qarşısında baş əyir, onların ruhuna ehtiramını ifadə edir. Onların uğrunda can verdiyi Azərbaycan bu gün ərazi bütövlüyünü və suverenliyini təmin etmiş, Qarabağ və Şərqi Zəngəzurda genişmiqyaslı bərpa və quruculuq işləri aparan dövlət kimi öz inkişaf yolunu davam etdirir.
27 Sentyabr – Anım Günü bizə bir həqiqəti daim xatırladır: Vətən torpağının hər qarışının arxasında böyük bir tarix, böyük bir fədakarlıq və böyük bir insan taleyi dayanır. Şəhidlərimizin əziz xatirəsi Azərbaycan xalqının yaddaşında əbədi yaşayacaq, onların göstərdiyi qəhrəmanlıq gələcək nəsillərə Vətən sevgisinin ən uca nümunəsi kimi ötürüləcək.
Allah bütün şəhidlərimizə rəhmət eləsin! Onların əziz və müqəddəs xatirəsi daim uca tutulacaq.

Kamran Əmirov,

YAP Qusar rayon təşkilatının sədri

Paylaş:

Baxılıb: 87 dəfə